Kuli Ahebeli 10:1-39
-
Nsembe za nyama zenze zosakwanila (1-4)
-
Chilamulo chenze chitila chithunzi vinthu viweme (1)
-
-
Nsembe ya Khilisitu ni yoyavya mpaka kale-kale (5-18)
-
Njila yanyowani komasoti yamoyo (19-25)
-
Osati tileke kusonkhana pamozi (24, 25)
-
-
Eŵachenjeja vokhuza kuchimwa mwalona (26-31)
-
Tikonkhala otang’a ntima komasoti na chikhulupililo kuti tipilile (32-39)
10 Pakuti Chilamulo chuchitila tyala chithunzi vinthu viweme vamene vikuza ndipo ni vinthulini ngavo-ngavo, chingachitishelini* amene olambila Mulungu kunkhala angwilo pokatishila ntchito nsembe zakupeleka mosalekeja chaka chilichonse.
2 Kuti venze tetyo, kansi sembe aliyeleke kupeleka nsembe zamene izo? Sembe eleka chifukwa chakuti ŵanthu amene ochita utumiki wopatulika wamene uyo atuŵishiwa, ndipo sembe aliyenkhalesoti na chikumbuntima chakuti ni ochimwa.
3 Koma mosiyana na vamene ivo, chaka chilichonse nsembe zamene izi zuŵakumbusha za machimo ŵawo.
4 Chifukwa n’vosakwanishika kuti milopa ya ng’ombe zinalume na ya mbuzi ichoseletu machimo.
5 Tetyo pechiwela pano pa chalo yove enena kuti: “‘Nsembe za nyama komasoti nsembe ziyakine muliye zifune, koma mwenikonzela muŵili.
6 Nsembe zoshoka zamphumbulu na nsembe za machimo muliye zivomekeje.’
7 Lomba newo ninena kuti, ‘Onani! Newo nawela (mu mpukutu mwilembewa za newo) kuzachita chifunilo chanu, mwewo Mulungu wangu.’”
8 Pechinena kuti: “Nsembe za nyama, nsembe zoshoka za mphumbulu, nsembe za machimo komasoti nsembe ziyakine muliye zifune olo kuzivomekeja,” zamene ni nsembe zopelekewa mokatijana na Chilamulo.
9 Enenasoti kuti: “Onani! Newo nawela kuzachita chifunilo chanu.” Ochosa dongosolo yoyamba yamene iyo kuti ankhazikishe yachiŵili.
10 Tatuŵishiwa na “chifunilo” chamene icho, kupitila mmuŵili wa Yesu Khilisitu wamene eupeleka nsembe kamozi tyala.
11 Komasoti, wansembe aliyense opanama pa malo ŵake kuti achite utumiki wake wopatulika komasoti kuti apeleke nsembe zimo na zimo zamene izo moweleja-weleja, zamene zingachoseletulini machimo.
12 Koma munthu wamene uyu epeleka nsembe imozi ya machimo yoyavya mpaka kale-kale, ndipo enkhala ku kwanja ngayo ya Mulungu.
13 Kufumila pa nthawe yamene iyo, yove oyembekezela mpaka pakuti azaikiwe adani ŵake kuti ankhale chokandapo mendo ŵake.
14 Kupitila mu nsembe imozi tyala, yove ochitisha ŵanthu amene otuŵishiwa kunkhala angwilo mpaka kale-kale.
15 Nawosoti mzimu utuŵa uchitila umboni kuli sewo, chifukwa winena kuti:
16 “‘Pangano yanikuti nizachite nawo pavuli pa masiku amene awo ni iyi: Nizaike malamulo ŵangu mmitima yawo ndipo nizaŵalembe mmaganizo mwawo,’ wanena tetyo Yehova.”
17 Pavuli pake winenasoti kuti: “Ndipo nizakumbukilelinisoti machimo ŵawo komasoti vochita vawo vuwonesha kusamvwila malamulo.”
18 Lomba vamene ivi vikakhululukiliwa, nsembe ya machimo yunkhalalinisoti yofunika.
19 Tetyo akwasu, tutang’a ntima kuloŵa mmalo atuŵa chifukwa cha milopa ya Yesu.
20 Yove niye etisegulila njila yamene iyi yamene ni yanyowani komasoti ya moyo ndipo yupita pa ketani yochingilijila, yamene ni muŵili wake.
21 Pakuti tili na wansembe nkulu ngako wololela ng’anda ya Mulungu,
22 tiyeni tifwike kwa Mulungu na ntima wonse komasoti tili na chikhulupililo chonse, chifukwa mitima yasu yatuŵishiwa* kuti osati tinkhalesoti na chikumbuntima chiipa, ndipo miŵili yasu yasambikiwa mmanzi atuŵa.
23 Tiyeni tipitilije kulengeza patuŵa chiyembekezo chasu ndipo osati tinyang’anyike chifukwa wamene watilonjeza ni wokhulupilika.
24 Ndipo tiyeni tiganizilane* kuti tilimbikisane pa nkhani yowoneshana chikondi komasoti kuchita viweme.
25 Osati tileke kusonkhana pamozi monga ni mwakuchitila ayakine amene ali na chiyoloŵezi chosawela pamisonkhano. Koma tiyeni tilimbikisane ndipo tikochita ngako vamene ivi maka-maka palipano pamuwona kuti nsiku yamene iyo yuvwendela.
26 Keno tuchita machimo mwalona pavuli pakuti taziŵa luweme choonadi, paliyesoti nsembe iyakine yamene ingapelekewe chifukwa cha machimo ŵasu amene awo.
27 Koma pali chiyembekezo chiyakine choyofya chachiweluzo, komasoti ukali woyaka mulilo wamene ukuti uzawononge oshusha amene awo.
28 Munthu aliyense wamene wanyalanyaza Chilamulo cha Mose, akufwa paliye kumuchitila chifundo, keno ŵanthu aŵili olo atatu amuchitila umboni.
29 Lomba kuli tyani munthu wamene wakanda-kanda Mwana wa Mulungu, wamene owona milopa ya pangano yechituŵishiwa nayo monga chinthu tyala, wamenesoti wanyoza mzimu wakukatishila ntchito Mulungu powonesha kuwama ntima kwake kukulu? Munthu wamene uyu ofunika kulondela chilango chikulu ngako.
30 Pakuti tumuziŵa wamene enena kuti: “Kuwejela ni kwangu, nizawejele ninewo.” Wamenesoti enena kuti: “Yehova azaweluze ŵanthu ŵake.”
31 Kupasiwa chilango na Mulungu wa moyo ni koyofya.
32 Koma olo n’tetyo, pitilijani kukumbukila masiku akale. Pala pemwilondela kungweleŵela kufumila kwa Mulungu mwekumana na mavuto akulu-akulu.
33 Nthawe ziyakine mwenzenyozewa komasoti kutamanishiwa pa gulu* ndipo nthawe ziyakine mwenzeyavya ŵanthu ayakine amene enzekumana na mavuto monga ni amene aŵa.
34 Mwenzechitila chifundo ŵanthu amene enze mu djeli, ndipo mwenzesangalala mphela olo penzekulondani katundu wanu, poziŵa kuti muli na chuma chiweme ngako komasoti chonkhalisha.
35 Tetyo, osati muleke kunkhala otang’a ntima* chifukwa muzalondele mphoto ikulu ngako.
36 Mufunika kunkhala opilila komasoti kuchita vakufuna Mulungu kuti muzalondele vinthu vawalonjeza.
37 “Kwasala kanthawe katontho” ndipo “wamene uyo akuza afwike chendi, achelwelini.”
38 “Koma wolungama wangu azankhale na moyo chifukwa cha chikhulupililo chake,” ndipo “keno angajokele kuvuli, newo nikondwele nayelini.”
39 Sewo tililini mu gulu ya ŵanthu ojokela kuvuli kuluta kuchiwonongeko, koma nise ŵanthu onkhala na chikhulupililo chamene chingatiyavye kuzafwana moyo.
Malizu a m'nyansi
^ Mabaibulo ayakine onena kuti, “ŵanthu angachitishelini.”
^ Mu Chigiliki “yawajiwa,” kutanthauza kuti yawajiwa milopa ya Yesu.
^ Olo kuti, “tikodelana nkhaŵa.”
^ Mu Chigiliki, “kunkhala monga ni chiwoneselo mmalo ochitila masoŵela.”
^ Olo kuti, “osasiya ufulu wanu wolaŵila.”
