Kuli Ahebeli 12:1-29
12 Tetyo, pakuti tazengulukiwa na gulu ikulu teti ya mboni,* tiyeni titaye chinthu chilichonse cholema na chimo yamene yutikasha mosavuta. Ndipo tiutuke mopilila mpikishano wamene uyu wataloŵa.
2 Tichite vamene ivi patuloleshesha Ntumiki Nkulu na Wokwanilisha chikhulupililo chasu, Yesu. Chifukwa choziŵa kuti kusogolo azasangalale, epilila pa chimuti chotamanilapo.* Yove aliyeikile nzelu za vinthu vochitisha nsoni vingamuchitikile ndipo palipano wankhala ku kwanja ngayo ya mpando wachifumu wa Mulungu.
3 Tetyo ganizilani ngako za munthu wamene epilila kalaŵilidwe konyoza ka ŵanthu ochimwa amene awo, amene polaŵila vamene ivo enzeliwononga ŵeka. Ganizilani za munthu wamene uyu kuti osati muŵeŵe notaya ntima.
4 Polimbana na chimo yamene iyi, sikuti mwaniyata nkhondo mpaka notaya milopa yanu.
5 Ndipo mwaluŵilatu malangizo okudandaulilani monga ni mwakuchitila makolo pouja ŵana ŵawo kuti: “Mwana wangu, osapepusha chilango* cha Yehova, olo kutaya ntima yove pakukuzuzula.
6 Chifukwa Yehova olanga aliyense wakukonda, ndipo okwapula aliyense wakuwona yove kuti ni mwana wake.”
7 Mufunikila kupilila kuti muphunzisiwe.* Mulungu ochita namwe vinthu monga ni ŵana ŵake. Ni mwana wanji wamene atata ŵake omupasalini chilango?
8 Koma keno muliyelondele chilango chatufunikila kulondela tonse, niye kuti nimwe ŵana amunthu muyakine, osati ŵana ŵake ngawo-ngawo.
9 Makolo ŵasu etivyala enzetilanga ndipo tenzeŵalemekeza. Lomba kuli tyani na Atata a moyo wasu wauzimu? Kansi tufunikalini kuŵagonjela kupambana pamene apa kuti tinkhale na moyo?
10 Chifukwa makolo ŵasu etivyala amene awo etilanga kwa nthawe itontho mokatijana na venzewona kuti ni viweme, koma Mulungu otilanga kuti vinthu vitiyendele luweme komasoti kuti tinkhale atuŵa monga ni yove.
11 N’chendi kuti paliye chilango chamene chunkhala chiweme pa nthawe yauchilondela, koma chunkhala choŵaŵa. Koma pavuli pake, kuli ŵanthu amene aphunzilapo kanthu pa chilango chamene icho, chutwala chitwazi cha ntendele, chamene ni chilungamo.
12 Tetyo tang’ishani manja ofoka komasoti nkhokola zozizila,
13 ndipo pitilijani kuyondolola njila zakuyendamo mendo ŵanu kuti chizo chamene chachitika osati chiwonongekeletu, koma chipojekewe.
14 Mukoyeja-yeja kunkhala mwantendele na ŵanthu onse komasoti kunkhala atuŵa chifukwa keno munthu ni ntuŵalini, azawonelini Ambuye.
15 Muwonesheshe kuti muyakine osati akangiwe kulondela kuwama ntima kukulu kwa Mulungu, kuti osati pafume muju wa poizoni noyambisha mavuto komasoti kuchitisha kuti anyinji aipishiwe.
16 Muwonesheshesoti kuti pakati panu osati pankhale munthu wachiwelewele* olo aliyense asatembeja vinthu vopatulika monga ni Esau, wamene epeleka udindo wake monga woyamba kuvyalika pouchinjanisha na chakulya, chakulya kamozi tyala.
17 Muziŵa kuti pavuli pake, yove penzefuna kulondela madaliso* emukanila. Olo kuti eyeja-yeja na ntima wonse uku olila, kuti atata ŵake achinje maganizo, viliyekwanishike.
18 Mwewo muliyefwike palupili yamene mungakwanishe kuikumya, yoyaka mulilo, yonkhala na nkumbi ufipa, mfinzi ikulu ngako, yuniyatiwa na mphepo ya nkuntho
19 komasoti yamene pemvwika kulila kwa lipenga na mawu amuyakine ndipo ŵanthu pechimvwa mawu amene awo, esenga kuti osati aŵaujesoti mawu ayakine.
20 Chifukwa echita wowa ngako na lamulo yakuti: “Olosoti chinyama chilichonse chamene chingakumye lupili yamene iyo, chitemewe na myala.”
21 Komasoti, vechiwona kwamene uko venze voyofya ngako mwakuti Mose enena kuti: “Nuchita wowa ndipo nunjenjemela.”
22 Koma mwafwika kulupili ya Ziyoni na tauni ya Mulungu wamoyo, Yelusalemu wakululu, kwamene kuli angelo anyinji ngako,*
23 pa nsonkhano wawo ukulu. Kwamene ukosoti kuli mpingo wa woyamba kuvyalika wamene uyo, mpingo wa ŵala amene mazina ŵawo alembewa kululu. Kwamene uko kulisoti Mulungu woweluza wa onse. Kulisoti olungama amene onkhala na moyo mokatijana na mphamvu ya mzimu utuŵa amene ayavyiwa kunkhala angwilo.
24 Kulisoti Yesu mnkhalapakati wa pangano yanyowani, komasoti milopa yamene yuwajiwa, yamene yulaŵila mu njila yomvwika luweme kupambana milopa ya Abele.
25 Samalani kuti osati muleke* kumvwila wamene uyo olaŵila. Chifukwa keno amene ekana kumvwila wala wamene epeleka chenjezo ya Mulungu pa chalo aliyepulumuke, lomba kuli tyani na sewo? Nasesoti tizapulumukelini tikaleka kumvwila wala wamene olaŵila ali kululu.
26 Pa nthawe yamene iyo mawu ŵake enyang’anyisha chalo, koma lomba walonjeza kuti: “Nizanyang’anyishesoti kululu, osati chalo tyala.”
27 Mawu akuti “nizanyang’anyishesoti,” owonesha kuti vinthu vamene ivo vakuti azanyang’anyishe vizachosewe ndipo vinthu vamene ivi viliye pangiwe na Mulungu. Azavichose kuti vala visanyang’anyika visale.
28 Tetyo pakuti tizalondele Ufumu wamene unganyang’anyikelini, tiyeni tinkhale mphela okhulupilika kuti Mulungu apitilije kutiwonesha kuwama ntima kukulu, kuti tikochita utumiki wopatulika mu njila yovomelejeka, moyopa Mulungu komasoti mwaulemu ngako.
29 Chifukwa Mulungu wasu ali monga ni mulilo uwononga.
Malizu a m'nyansi
^ Mu Chigiliki, “na nkumbi ukulu wa mboni.”
^ Onani matanthauzo a mawu ayakine.
^ Mawu a Chigiliki amene amasuliliwa kuti “chilango” ali na matanthauzo anyinji. Angatanthauze malangizo, kuphunzisa, kuzuzula, kulimbikisa olo kulanga.
^ Olo kuti, “chinkhale chilango chanu.”
^ Onani matanthauzo a mawu ayakine.
^ Olo kuti, “kulondela madaliso monga ni chuma.”
^ Olo kuti, “masauzande anyinji.”
^ Olo kuti, “osati mufwane vifukwa vokanila; osati munyalanyaze.”
