Kuli Ahebeli 2:1-18
2 N’chifukwa chake vinthu vetichimvwa tufunikila kuviganizila ngako kupambana mwa nthawe zonse, kuti osati tikopeke patontho-patontho noleka kunkhala na chikhulupililo.
2 Chifukwa keno mawu ŵechinena angelo enze achendi, ndipo chilango chipelekewa mwachilungamo pa chimo iliyonse na kusamvwila kulikonse,
3 lomba tizapulumuke tyani keno tinganyalanyaze chipulumuso chikulu teti? Ambuye wasu niye eyamba kunena za chipulumuso chamene ichi ndipo ŵanthu amene emumvwa etisimikijila vamene ivo.
4 Nayesoti Mulungu echitila umboni za chipulumuso chamene ichi pokatishila ntchito vizindikilo, vinthu vodabwisa, ntchito zamphamvu zosiyana-siyana komasoti mzimu utuŵa wamene eupeleka mokatijana na kufuna kwake.
5 Chalo chamene icho chikuza, chatunena sewo, aliye chiike pansi pa ulamulilo wa angelo.
6 Koma pali munthu muyakine wamene nthawe iyakine echitila umboni polemba kuti: “Munthu ni ŵani kuti mukomuganizila, olo kansi mwana wa munthu ni ŵani kuti mukomusamalila?
7 Mwemuselusha patontho polinganija na angelo. Mwemuvwalika ulemelelo na ulemu monga ni chisote chachifumu ndipo mwemuika kuti akolamulila ntchito za manja ŵanu.
8 Mwaika vinthu vonse pansi pa mendo ŵake.” Pakuti Mulungu eika vinthu vonse pansi pa Mwana wake, niyekuti paliye chilichonse chechisiya osachiika pansi pa Mwana wamene uyo. Koma olo n’tetyo, palipano tuwonalini kuti vinthu vonse vili pansi pake.
9 Koma tuwona Yesu, wamene emuselusha patontho polinganija na angelo. Palipano amuvwalika ulemelelo na ulemu monga ni chisote chachifumu chifukwa chakuti echifwa. Chifukwa cha kuwama ntima kukulu kwa Mulungu, vamene ivi vemuchitikila kuti alaule imfwa mmalo mwa munthu aliyense.
10 Vinthu vonse vinkhalapo kuti vipeleke ulemelelo kwa Mulungu komasoti vinkhalapo kupitila muli yove. Tetyo kuti ayavye ŵana anyinji kunkhala na ulemelelo, venze voyenelela kuti achitishe Ntumiki Nkulu wachipulumuso chawo kunkhala wangwilo kupitila mmavuto ŵechikumana nawo.
11 Chifukwa wotuŵisha na otuŵishiwa amene awo, onse ofumila kuli mmozi. Tetyo yove ochitalini nsoni kuŵaita kuti “akwake”
12 pakunena kuti “Nizalengeze zina yanu kuli akwangu. Nizakutamandeni poimba nyimbo pakati pa mpingo.”
13 Komasoti pakunena kuti: “Newo nizamudalile.” Na pakunenasoti kuti: “Onani! Newo pamozi na ŵana awanipasa Yehova.”
14 Pakuti “ŵana” onse amene awo ni a milopa na nyonfu, yovesoti enkhala wa milopa na nyonfu. Echita vamene ivi kuti kupitila mu imfwa yake, awononge Mdyelekezi, wamene ali na njila yoletela imfwa.
15 Echitasoti vamene ivi kuti amasule onse amene enze mu ukapolo wa moyo wawo wonse chifukwa choyopa imfwa.
16 Chifukwa sikuti yove oyavya angelo, koma oyavya mbadwa* za Abulahamu.
17 Tetyo yove enzefunikila kunkhala monga ni “akwake” pa vinthu vonse, kuti ankhale nkulu wa ansembe wachifundo komasoti wokhulupilika pa vinthu vokhuza Mulungu, na cholinga chakuti apeleke nsembe yoziŵilija machimo a ŵanthu kuti tikatijanesoti na Mulungu.
18 Pakuti yove etamana penzeyesewa, okwanisha kuyavya ŵanthu amene oyesewa.
Malizu a m'nyansi
^ Mu Chigiliki, “mbewu.”
