Kuli Ahebeli 3:1-19
3 Tetyo, akwasu atuŵa, amene muli mu gulu ya ŵanthu oitiwa kululu, ganizilani za Yesu, ntumwi na nkulu wa ansembe wamene tumuvomekeja.
2 Yove enze wokhulupilika kwa Mulungu wamene emuika kunkhala ntumwi na nkulu wa ansembe, monga ni mwenzelesoti Mose wamene enze wokhulupilika m’ng’anda yonse ya Mulungu.
3 Yesu oyenelela kupasiwa ulemelelo ukulu kupambana Mose, chifukwa womanga ng’anda onkhala wolemekezeka kupambana ng’anda yamene iyo.
4 N’chendi kuti ng’anda iliyonse imangiwa na munthu muyakine, koma wamene epanga vinthu vonse ni Mulungu.
5 Mose enze ntumiki wokhulupilika m’ng’anda yonse ya Mulungu ndipo utumiki wake wamene uyo wenze umboni wa vinthu vikuti vizalaŵiliwe kusogolo.
6 Koma Khilisitu enze mwana ndipo enzelolela ng’anda ya Mulungu mokhulupilika. Sewo tinkhale mphela ng’anda ya Mulungu wamene uyo tikapitilija kunkhala na ufulu wolaŵila komasoti kukata mwamphamvu chiyembekezo chatumekela mpaka pamapeto.
7 Tetyo mokatijana na vaunena mzimu utuŵa kuti: “Lelo mukamvwa mawu a Mulungu,
8 osati muyumishe mitima yanu monga ni mwevinkhalila, makolo ŵanu pechinikalifya ngako, monga ni mwevenzele pa nsiku yechiniyesa m’chipululu.
9 M’chipululu mwamene umo, makolo ŵanu eniyesa olo kuti enze ewona ntchito zangu kwa vyaka 40.
10 N’chifukwa chake ninyansiwa na mbadwo wamene uyo, ndipo ninena kuti, ‘Mitima yawo yuluŵila nthawe zonse ndipo njila zangu oziziŵalini.’
11 Tetyo nilumbila nilikalipe kuti, ‘Azaloŵelini mu mpumulo wangu.’”
12 Chenjelani akwasu kuti pakati panu, muyakine osati achoke kwa Mulungu wamoyo nonkhala na ntima uipa uliye chikhulupililo.
13 Mmalo mwake, pitilijani kutang’ishana nsiku na nsiku, nthawe iliyonse yamukuti “Lelo,” kuti chinyengo champhamvu cha uchimo osati chiyumishe ntima wa aliyense wa mwewo.
14 Chifukwa sewo nase tuchitako vakuchita Khilisitu, keno vinthu vetenzedalila poyamba tavikata mwamphamvu mpaka pamapeto.
15 Pala Malemba onena kuti: “Lelo mukamvwa mawu a Mulungu, osati muyumishe mitima yanu monga ni mwevinkhalila na makolo ŵanu pechinipyesha ntima ngako.”
16 Kansi ni ŵani pala wamene echimvwa koma nopyesha ntima Mulungu? Kansi ni ŵanthu onselini amene efuma m’chalo cha Iguputo mosogolelewa na Mose?
17 Komasoti, kansi Mulungu enyansiwa na ŵani kwa vyaka 40? Kansi ni ŵalalini ŵanthu echimwa, amene efwila m’chipululu?
18 Lomba kansi euja ŵani mochita lumbila kuti azaloŵelini mu mpumulo wake? Kansi ni ŵalalini amene aliye mumvwile?
19 Tetyo, tuwona kuti sembe aliye kwanishe kuloŵa mu mpumulo wamene uyo chifukwa enzeve chikhulupililo.
