Kuli Ahebeli 4:1-16
4 Tetyo, pakuti lonjezo yoloŵa mu mpumulo wake ikalipo, samalani kuchitila kuti muyakine wa mwewo angakangiwe kukwanilisha vakufunikila kuti akaloŵe mu mpumulo wamene uyo.
2 Uthenga uweme wilengezewa kuli sewo, monga ni mwechiulengezelasoti kuli makolo ŵasu. Koma mawu ŵechimvwa ove aliyepindule nawo, chifukwa enzeve chikhulupililo cholingana na cha ŵala amene emvwila mawu amene awo.
3 Sewo amene tawonesha chikhulupililo tuloŵa chendi mu mpumulo wamene uyo. Ponena za mpumulo wamene uyu yove enena kuti: “Tetyo nilumbila nilikalipe kuti, ‘Azaloŵelini mu mpumulo wangu,’” olo kuti enze esilija ntchito zake pa nthawe yechenzenkhazikishiwa chalo.*
4 Ponena za nsiku ya 7, pali payakine pechinena kuti: “Ndipo Mulungu epumula pa ntchito zake zonse pa nsiku ya 7.”
5 Apasoti onena kuti: “Azaloŵelini mu mpumulo wangu.”
6 Tetyo, pakuti mwayi woloŵa mu mpumulo wamene uyo ukalipo, ndipo amene enze oyamba kumvwa uthenga uweme aliyeloŵemo chifukwa chakuti aliyemvwile,
7 pepapita nthawe, Mulungu enena mu salimo ya Davite, monga ni mwatanenela kale mu kalata yamene iyi kuti: “Lelo mwewo mwaŵanthu mukamvwa mawu a Mulungu, osati muyumishe mitima yanu.” Tetyo wapatula nsiku yamene oitomola kuti “Lelo.”
8 Chifukwa kuti Yoswa enze eŵaloŵesha mmalo a mpumulo, Mulungu sembe aliyenenesoti za nsiku iyakine pavuli pake.
9 Tetyo mpumulo wa nsiku ya sondo ukalipo mphela kuli ŵanthu a Mulungu.
10 Munthu wamene waloŵa mu mpumulo wa Mulungu, niyekuti wapumulasoti pa ntchito zake, monga ni mwechipumulila Mulungu pa ntchito zake.
11 Tetyo, tiyeni tichite vonse vatingakwanishe kuti tiloŵe mu mpumulo wamene uyo, na cholinga chakuti muyakine osati ankhale wosamvwila monga ni makolo ŵasu amene awo.
12 Chifukwa mawu a Mulungu ni amoyo komasoti a mphamvu, ndipo ni olumata kupambana chibemba chilichonse cholumata konse-konse. Olasa munthu mu ntima mpaka kusiyanisha moyo na mzimu komasoti vifupa* na mafuta a m’vifupa. Mawu a Mulungu okwanishasoti kuziŵa vakuganiza munthu komasoti volinga va ntima wake.
13 Paliye cholengewa changalekekwanisha kuwona Mulungu. Chifukwa kuli yove vinthu vonse vili patuŵa ndipo okwanisha kuviwona bwino-bwino mwakuti sewo tizayankhe kwa Mulungu wamene uyo pa vochita vasu.
14 Tetyo, pakuti tili na nkulu wa ansembe wapalulu, Yesu Mwana wa Mulungu, wamene eluta kululu, tiyeni tipitilije kulengeza zakuti tumukhulupilila.
15 Chifukwa nkulu wa ansembe wamene uyu watili naye, ni nkululini wa ansembe wamene angaleke timvwila chisoni pa vofoka vasu. Koma ni nkulu wa ansembe wamene eyesewa pa vinthu vonse monga ni sewo, ndipo enkhala mphela aliye uchimo.
16 Tetyo, tiyeni tikofwika ku mpando wachifumu wa Mulungu ndipo tikopemphela na ufulu wolaŵila kuti atichitile chifundo komasoti kutiwonesha kuwama ntima kukulu pa nthawe iweme.
Malizu a m'nyansi
^ Mu Chigiliki, “kuponya mbewu pansi.” Mbewu zamene izo zutanthauza ŵana ŵa Adamu na Hava.
^ Mu Chigiliki, “malo ŵavulundikijilana vifupa.”
