Kuli Ahebeli 5:1-14
5 Nkulu wa ansembe aliyense wotolewa pakati pa ŵanthu, oikiwa kuti akokata ntchito ya Mulungu mmalo mwa ŵanthu, kuti akopeleka mphaso na nsembe zoziŵilija machimo.
2 Onkhala woleza ntima pochita vinthu na ŵanthu amene oziŵalini kanthu komasoti ophoniya,* chifukwa yovesoti ali na vofoka vake.
3 Ndipo chifukwa cha vamene ivo, ofunika kupeleka nsembe za machimo ŵake, monga ni mwakupelekelasoti nsembe za machimo a ŵanthu ayakine.
4 Munthu olondelalini ulemu wamene uyu mwa kufuna kwake, koma ochita pasiwa na Mulungu monga ni mwechichitila Aloni.
5 Vilisoti chimozi-mozi na Khilisitu. Yove aliye lipase yeka ulemelelo poliika yeka kunkhala nkulu wa ansembe. Koma wamene emupasa ulemelelo wamene uyo niye emuuja kuti: “Wewo niwe mwana wangu. Lelo newo nankhala atata ŵako.”
6 Monga ni mwakunenelasoti payakine kuti: “Wewo niwe wansembe mpaka kale-kale, molingana na unsembe wa Melekizedeki.”
7 Khilisitu penze pano pa chalo,* epeleka mapemphelo opapatila komasoti osenga kuli wala wamene sembe ekwanisha kumupulumusha ku imfwa. Epeleka mapemphelo amene aŵa moŵilikija uku oponesha misozi, ndipo emumvwila chifukwa enzeyopa Mulungu.
8 Olo kuti enze Mwana wa Mulungu, ephunzila kumvwila chifukwa cha mavuto ŵechikumana nawo.
9 Ndipo pechinkhala wangwilo, enze na udindo wopulumusha ŵanthu onse kosasila amene omumvwila,
10 chifukwa wasankhiwa na Mulungu kuti ankhale nkulu wa ansembe molingana na unsembe wa Melekizedeki.
11 Tili na vinyinji vatinganene vokhuza yove, koma ni vovuta kuvifotokoza chifukwa chakuti mwewo muchelwa kumvwisha vinthu.
12 Pofwika pano mwenzefunika kunkhala aphunzisi. Koma vililini tetyo, ndipo mufunikilasoti muyakine wakuti akuphunziseni mfundo zoyambilila za mmawu opatulika a Mulungu, kufumila poyambilila. Mwewo mwayambasoti kufuna nkaka osati chakulya chotamfunya.
13 Aliyense wamene akumwa tyala nkaka oziŵalini mawu achilungamo ndipo akali kamwana.
14 Koma chakulya chotamfunya ni cha ŵanthu akulu-akulu mwauzimu, amene okwanisha kusiyanisha vinthu viweme na viipa chifukwa chakuti okatishila ntchito luso yawo yoganiza.*
Malizu a m'nyansi
^ Olo kuti, “oluŵila.”
^ Mu Chigiliki, “penze munthu.”
^ Olo kuti, “mphamvu zawo za kuzindikila.”
