Kuli Ahebeli 7:1-28
7 Melekizedeki wamene uyu enze mfumu ya mu tauni ya Salemu komasoti wansembe wa Mulungu Wakululu ngako, ndipo echungujila Abulahamu penzejokela kufumila kwenze eluta kuyapaya mafumu ndipo emudalisa.
2 Abulahamu emupasa cha gawo 10 cha vinthu vonse. Zina yake yamene iyi yumasuliliwa kuti “Mfumu Yachilungamo” komasoti mfumu ya Salemu, kutanthauza kuti “Mfumu ya Ntendele.”
3 Pakuti enzeve atata ŵake olo amayi ŵake, komasoti enzeve nzela wa makolo ndipo nsiku yechivyalika na yechimwalila yuziŵikalini, koma emuchitisha kuti alingane na Mwana wa Mulungu, yove ni wansembe mpaka kale-kale.
4 Tetyo mungawone kuti munthu wamene uyu enze wofunika ngako. Mwakuti kolo yasu Abulahamu, emupasa cha gawo 10 pa vinthu viweme ngako vechitola ku nkhondo.
5 Kulaŵila chendi mokatijana na Chilamulo, ŵana analume a Levi amene opasiwa udindo wa unsembe, elamuliwa kuti akolondela va gawo 10 kufumila kuli ŵanthu. Ŵanthu amene aŵa enze akwawo olo kuti akwawo amene awo enze mbadwa za Abulahamu.
6 Koma munthu wamene uyu, wamene aliyefumile mu nzela wovyalikila wa Levi elondela cha gawo 10 kufumila kuli Abulahamu, ndipo edalisa Abulahamu wamene uyo wamene elondela malonjezo kufumila kwa Mulungu.
7 Tetyo paliye angashushe kuti ntontho edalisiwa na nkulu.
8 Alevi enzelondela va gawo 10 ndipo ni ŵanthu akuti akufwa. Koma munthu muyakine wamene elondela va gawo 10, Malemba omuchitila umboni kuti ali moyo.
9 Tinganenesoti kuti olo Levi wamenesoti olondela va gawo 10 epeleka va gawo 10 kupitila mwa Abulahamu.
10 Chifukwa Levi enze akaliye vyalika kolo yake Abulahamu pechikumana na Melekizedeki, koma niye enze kuti azankhale mbadwa ya Abulahamu wamene uyo.
11 Kunkhala na ansembe a m’banja ya Levi yenze mbali ya Chilamulo cha Mose chechipasiwa Aisilaeli. Lomba kuti ansembe a m’banja ya Levi angakwanishe kuyavya ŵanthu kuti ankhale angwilo, kansi sembe penzefunikasoti wansembe monga ni Melekizedeki? Kansi sembe venzelini vokwanila kungonkhala tyala na wansembe monga ni Aloni?
12 Pakuti unsembe wamene uyo uchinjiwa, niye kuti Chilamulo chufunikasoti kuchinjiwa.
13 Munthu wamene ofotokozewa pamene apa ni wa banja iyakine ndipo paliye aliyense wa banja yamene iyo wamene etumikilapo pa guwa ya nsembe.
14 Tonse tuziŵa kuti Ambuye wasu efumila ku banja ya Yuda, koma Mose aliyenenepo kuti ansembe azafumile m’banja yamene iyi.
15 Vamene ivi vumvwika luweme lomba chifukwa pawela wansembe muyakine wolingana na Melekizedeki.
16 Yove wamene uyu wankhala wansembe, osati mokatijana na malamulo, amene odalila vinthu vapano pa chalo, koma mokatijana na mphamvu ya moyo wamene ungawonongekelini.
17 Chifukwa Malemba emuchitila umboni wakuti: “Wewo niwe wansembe mpaka kale-kale molingana na unsembe wa Melekizedeki.”
18 Tetyo malamulo oyamba amene awo ochosewa chifukwa ni opeleŵela komasoti ni osayavya.
19 Chilamulo chiliye chitishe chilichonse kunkhala changwilo. Koma chiyembekezo cha vinthu viweme chechileta, chamene chutiyavya kuvwendela kwa Mulungu, chichita vamene ivi.
20 Komasoti vamene ivi viliye chitike paliye kulumbila.
21 (Chifukwa pali analume ayakine amene ankhala ansembe paliye kuchita lumbilo, koma wamene uyu wankhala wansembe pochita kumulumbilila. Lumbilo yamene iyi ni ya wala wamene enena za wansembe wamene uyo kuti: “Yehova walumbila kuti, ‘Wewo niwe wansembe mpaka kale-kale,’ ndipo azachinjelini maganizo.”)
22 Mokatijana na vamene ivi, Yesu wankhala chizindikilo cha pangano iweme ngako.
23 Komasoti penzefunika ansembe anyinji oloŵa mmalo, chifukwa imfwa yenzechitisha kuti munthu osati apitilije kunkhala wansembe.
24 Koma pakuti yove azankhale na moyo mpaka kale-kale, paliye wansembe wamene akuti azamuloŵe mmalo.
25 Tetyo yove angakwanishe kupulumusha ŵanthu amene opemphela kwa Mulungu mu zina yake, chifukwa azafwelini ndipo akoŵapapatila kwa Mulungu.
26 Nkulu wa ansembe monga ni wamene uyu otiyenelela chendi chifukwa ni wokhulupilika, wosaphoniya, wosaipishiwa, wosiyana na ŵanthu ochimwa ndipo wakwejewa palulu ngako.
27 Mosiyana na akulu a nsembe ayakine, yove ofunikalini kupeleka nsembe za machimo ŵake nsiku iliyonse poyamba, pavuli pake za ŵanthu ayakine. Vili tetyo chifukwa yove elipeleka kamozi tyala kuti ankhale nsembe yoyavya ŵanthu mpaka kale-kale.
28 Chilamulo chuika analume ali na vofoka kunkhala akulu ŵa ansembe. Koma mawu alumbilo amene enenewa pavuli pa Chilamulo eika Mwana, wamene enkhala wangwilo mpaka kale-kale.
