Kuli Ahebeli 8:1-13
8 Pa vinthu vamene ivi vatunena, mfundo ikulu ni yakuti: Tili na nkulu wa ansembe monga ni wamene uyu, ndipo yove wankhala ku kwanja ngayo ya mpando wachifumu wa Wolemekezeka kululu.
2 Yove ni ntumiki wa mmalo atuŵa amene awo komasoti mu chitenti ngacho-ngacho, chomangiwa na Yehova osati munthu.
3 Nkulu wa ansembe aliyense oikiwa kuti akopeleka mphaso komasoti nsembe. Tetyo uyusoti enzefunika kunkhala na chinthu chiyakine chakuti apeleke.
4 Kuti yove epitilija kunkhala pa chalo sembe aliyenkhale wansembe, chifukwa pali kale analume opeleka mphaso zamene izo mokatijana na Chilamulo.
5 Utumiki wakuchita analume amene aŵa uli monga ni chifanizilo komasoti chithunzi cha vinthu vakululu. Ivi vulingana na lamulo yechipasiwa Mose na Mulungu pechisala patontho kumanga chitenti. Lamulo yake yenze yakuti: “Uwonesheshe kuti wapanga vinthu vonse mokonkheja chisanzo chawawoneshewa mulupili.”
6 Koma Yesu walondela utumiki wapalulu ngako, chifukwa yovesoti ni mnkhalapakati wa pangano iweme ngako, yamene yankhazikishiwa mwalamulo pa malonjezo awemesoti.
7 Kuti pangano yala yoyamba yenzeve vophoniyeka sembe paliyefunikilesoti pangano yachiŵili.
8 Chifukwa Mulungu owona kuti ŵanthu ophoniyesha vinthu viyakine, tetyo yove onena kuti: “Onani masiku akuza panikuti nizachite pangano yanyowani na ng’anda ya Isilaeli komasoti na ng’anda ya Yuda,’ wanena tetyo Yehova.
9 ‘Koma izankhalelini pangano yolingana na yenichita na makolo ŵawo pa nsiku yenikata kwanja yawo kuti niŵafumye m’chalo cha Iguputo. Pakuti aliyepitilije kusunga pangano yangu yamene iyo, nileka kuŵasamalila,’ wanena tetyo Yehova.”
10 “‘Pangano yanikuti nizachite na ng’anda ya Isilaeli pavuli pa masiku amene awo ni iyi: Nizaike malamulo ŵangu mmaganizo mwawo komasoti kuŵalemba mmitima yawo. Newo nizankhale Mulungu wawo ndipo ove azankhale ŵanthu ŵangu,’ wanena tetyo Yehova.
11 ‘Munthu azaphunziselinisoti nzika iyake olo nkwake kuti, “Mumuziŵe Yehova!” Chifukwa aliyense azaniziŵe kuyambila ntontho mpaka nkulu.
12 Newo nizaŵachitile chifundo pa vochita vawo vosalungama, ndipo nizakumbukilelinisoti machimo ŵawo.’”
13 Pakunena kuti “pangano yanyowani,” yove wachitisha kuti yoyamba yamene iyo isile ntchito. Pangano yamene yasila ntchito komasoti yamene yukalamba niye kuti yasala patontho kusila.
