Kuli Ahebeli 9:1-28
9 Pangano yala yoyamba yenze na malamulo ŵake a utumiki wopatulika komasoti malo ŵake atuŵa a pa chalo.
2 Chifukwa pemangiwa chipinda choyamba cha chitenti ndipo mu chipinda mwamene umo mwenze choikapo laiti, thebo na mikate yowonesha kwa Mulungu, ndipo chenzeitiwa kuti “Malo atuŵa.”
3 Koma kuseli kwa nyula yochingilijila yachiŵili kwenze chipinda chiyakinesoti choitiwa kuti “Malo Atuŵa Ngako.”
4 Mu chipinda mwamene umu mwenze chiwaya cha golide choputijila nsembe na likasa ya pangano yokukutijiwa na golide. Mu likasa mwamene umo mwenze nongo ya golide yamene yenzenkhala na mana, ndodo ya Aloni yala itumba komasoti myala yoŵaza ya pangano.
5 Palulu pa likasa yamene iyo penze akelubi aulemelelo amene vithunzi-thunzi vawo venzefwika pa chovwinikilila.* Koma ino ni nthawelini yakuti tingafotokozeletu vinthu vonse vamene ivi.
6 Vinthu vamene ivi pevikonzewa teti, nthawe zonse ansembe enzeloŵa m’chipinda choyamba kuyachita mautumiki opatulika.
7 Koma mu chipinda chachiŵili chamene icho, ni nkulu wa ansembe tyala wamene enzeloŵamo kamozi pa chaka, ndipo enzeloŵamolini paliye kunyamula milopa. Milopa yamene iyo enzeipeleka chifukwa cha yove, komasoti chifukwa cha machimo a ŵanthu ŵechichita mosaziŵa.
8 Tetyo mzimu utuŵa utiyavya kumvwisha luweme kuti njila yoloŵela ku malo atuŵa yenze ikaliye wonekela pechenze chikalipo chitenti chala choyamba.
9 Chitenti chamene icho chenze chifanizilo cha nthawe ino ndipo mokatijana na chifanizilo chamene icho, mphaso komasoti nsembe vupelekewa. Koma olo n’tetyo, vamene ivi vuchitishalini munthu wamene ochita utumiki wopatulika wamene uyo kunkhala na chikumbuntima chituŵa.
10 Mmalo mwake vukhuza tyala vakulya, vakumwa na miyambo yosiyana-siyana yotuŵisha vinthu na manzi.* Vamene ivo venze vofunika mokatijana na malamulo okhuza muŵili ndipo evinkhazikisha mpaka pa nthawe yowamyasoti vinthu.
11 Koma olo n’tetyo, Khilisitu pechiwela monga nkulu wa ansembe wa vinthu viweme vamene vakwanilishiwa, epitila mu chitenti chikulu na changwilo ngako chamene chiliye pangiwe na manja a ŵanthu, kutanthauza kuti chupezekalini pano pa chalo.
12 Yove eloŵa mmalo atuŵa na milopa yake, osati na milopa ya mbuzi olo ya ng’ombe zitontho-zitontho zinalume. Eloŵa kamozi tyala mmalo atuŵa amene awo ndipo etipulumusha kosasila.
13 Chifukwa keno milopa ya mbuzi na ya ng’ombe zinalume komasoti mulota wa ng’ombe inakazi,* vakutila navo ŵanthu oipishiwa, vuŵatuŵisha mpaka nonkhala chendi atuŵa pamenso pa Mulungu,
14 kuli tyani na milopa ya Khilisitu, wamene elipeleka aliye chilema kwa Mulungu kupitila mu mzimu utuŵa?* Kansi milopa yamene iyo izatuŵishelini vikumbuntima vasu ku ntchito zakufwa, kuti tichite utumiki wopatulika kwa Mulungu wa moyo?
15 Lomba n’chifukwa chake yove ni mnkhalapakati wa pangano yanyowani kuti ŵanthu amene aitiwa alondele lonjezo ya moyo wosasila. Ivi vakwanishika chifukwa cha imfwa yake, yamene yenze monga ni dipo yoŵamasula ku machimo ŵenze nawo mu pangano yala yakale.
16 Pamene pali pangano, pofunikasoti kuti munthu wochita naye pangano wamene uyo afwe.
17 Chifukwa pangano yukata ntchito keno muyakine wafwa, pakuti yukatalini ntchito keno munthu wawachita naye pangano wamene uyo ali na moyo.
18 Lomba n’chifukwa chake olo pangano yala yoyamba iliyenkhazikishiwe paliye milopa.
19 Mose akauja ŵanthu onse amene awo lamulo iliyonse ya m’Chilamulo, enzetola milopa ya ng’ombe zitontho-zitontho zinalume, milopa ya mbuzi komasoti manzi noŵaja buku yamene iyo* na ŵanthu onse pokatishila ntchito usako wa mbelele usweta ngako na tumiti twa hisope.
20 Yove enzeŵauja kuti: “Iyi ni milopa ya pangano yawakulamulani Mulungu kuti muisunge.”
21 Ndipo ewajasoti yala milopa pa chitenti na viya vonse vokatishila ntchito pa utumiki wopatulika.
22 Mokatijana na Chilamulo, pafupi-fupi vinthu vonse vutuŵishiwa na milopa ndipo paliye kukhesa milopa, ŵanthu angakhululukiliwelini machimo ŵawo.
23 Tetyo venze vofunika kuti vifanizilo va vinthu vakululu vituŵishiwe mwa njila yamene iyi. Koma vinthu ngavo-ngavo vakululu vufunika kutuŵishiwa na nsembe ziweme kupambana zamene izi.
24 Khilisitu aliyeloŵe mmalo atuŵa opangiwa na manja a ŵanthu, amene ni chithunzi cha malo ngawo-ngawo amene awo, koma eloŵa kululu ngako-ngako. Palipano yove ali kululu kuti akowonekela pamenso pa Mulungu mmalo mwa sewo.
25 Yove aliyelute kululu kwamene uko kuti akolipeleka nsembe moweleja-weleja, monga ni mwakuchitila nkulu wa ansembe. Pala nkulu wa ansembe oloŵa mmalo atuŵa chaka chilichonse alinyamule milopa ya nyama, osati yake.
26 Kuti venze tetyo, sembe etamana moweleja-weleja kufumila pechinkhazikishiwa chalo. Koma lomba yove wawonekela kamozi tyala pa mapeto a nthawe* ino kuti achose uchimo kupitila mu nsembe yake.
27 Molingana na mwavuchitikila kuti ŵanthu oyembekezela kufwa kamozi tyala, pavuli pake nakuzalondela chiweluzo,
28 nayesoti Khilisitu epelekewa nsembe kamozi tyala kuti anyamule machimo a ŵanthu anyinji. Nthawe yachiŵili yakuti azawonekele, azawonekelelini na cholinga chofuna kuchosa uchimo. Ndipo akuti azamuwone ni ŵanthu amene omuyembekezela na ntima wonse kuti aŵapulumushe.
Malizu a m'nyansi
^ Mawu a Chigiliki amene eŵamasulila kuti “chovwinikilila” angatanthauzesoti nsembe yakupeleka munthu kuti Mulungu amukhululukile.
^ Mu Chigiliki, “maubatizo osiyana-siyana.”
^ Olo kuti, “ng’ombe inakazi yamene ikaliye vyalapo.”
^ Mu Chigiliki, “mzimu wosasila.”
^ Olo kuti, “mpukutu wamene uyo.”
^ Onani matanthauzo a mawu ayakine.
