Kuli Aifenso 4:1-32
4 Tetyo newo wamene nili mu djeli chifukwa cha Ambuye, nukupapatilani kuti mukochita vinthu mokatijana na kuita kwechikuitani.
2 Nthawe zonse mukochita vinthu molichefya,* mofasa, moleza ntima komasoti mukololelana chifukwa cha chikondi.
3 Mukoyeja-yeja na ntima wonse kusunga nkatijano wamene tuufwana moyavyiwa na mzimu utuŵa, ponkhala mwa ntendele wamene uli monga ni chomangila chamene chutikatanija.
4 Pali muŵili umozi na mzimu umozi, mokatijana na chiyembekezo chimozi chechikuitilani.
5 Palisoti Ambuye mmozi, chikhulupililo chimozi, ubatizo umozi,
6 na Mulungu mmozi wamenesoti ni Atata a ŵanthu onse. Yove ni nkulu kupambana muyakine aliyense, ochita vinthu kupitila muli sewo tonse ndipo mphamvu yake yukata ntchito mwa onse.
7 Lomba aliyense wa sewo epasiwa kuwama ntima kukulu mokatijana na mwechichitila Khilisitu pomupimila mphaso yamene iyi yamahala.
8 Chifukwa Malemba onena kuti: “Pechikwela pamalo apalulu, etola ŵanthu enze pa ukapolo ndipo epeleka analume kuti ankhale mphaso.”
9 Lomba kansi mawu akuti “pechikwela” otanthauza chinji? Otanthauza kuti poyamba eseluka pansi, kutanthauza pano pa chalo.
10 Wamene uyo eseluka niyesoti ekwela kuyankhala palulu ngako kupambana kululu konse, kuti vinthu vonse vikwanilishiwe.
11 Ndipo pa mphaso zamene izo zechipeleka, ayakine eŵapeleka kuti ankhale atumwi, ayakine aneneli, ayakine olalikila* ndipo ayakine achiŵeta na aphunzisi,
12 na cholinga chakuti ayavye* atuŵa amene awo kuti akoyenda mu njila yoyenelela kuti akokata ntchito yotumikila ayakine komasoti kuti amange mpingo wamene uli monga muŵili wa Khilisitu,
13 mpaka tonse tizankhale okatijana pa vatukhulupilila komasoti poziŵa luweme Mwana wa Mulungu. Vikazachitika tetyo, tizankhale ŵanthu achikulile amene afwika pa nsinkhu wa munthu nkulu monga ni mwenzele Khilisitu.
14 Tetyo osati tinkhalesoti ŵana. Osati tikotengeka-tengeka monga kuti tukankhiwa-kankhiwa na mafunde komasoti osati tikokankhiwa kuluta uku na uku na mphepo iliyonse ya vinthu vachinyengo vakuphunzisa ŵanthu potala wenye mochenjela.
15 Koma tikolaŵila vachendi komasoti kuwonesha chikondi. Tikachita tetyo tizankhale achikulile mu vinthu vonse ndipo tizakwanishe kuchita vinthu mokatijana na Khilisitu, wamene ni mutu.
16 Tili monga ni muŵili, ndipo chifukwa cha yove, vizo vonse va muŵili wamene uyo ni volundikana luweme ndipo vuyavya muŵili wamene uyo kuti ukokata ntchito luweme. Keno chizo chilichonse cha muŵili chukata ntchito yake, muŵili ukula luweme ndipo tizapitilije kukondana.
17 Tetyo nunena komasoti kuchitila umboni mwa Ambuye, kuti osati mupitilije kuyenda monga mwakuyendela ŵanthu amitundu iyakine pokonkheja maganizo ŵawo a tyala-tyala.
18 Ove ali mu mfinzi ya maganizo ndipo ali kutali na moyo wamene ufumila kwa Mulungu, chifukwa cha ubulutu walinawo komasoti chifukwa cha kuyuma kwa mitima yawo.
19 Pakuti ove okwanishalinisoti kuziŵa minkhalidwe iweme, alipeleka ŵeka ku nkhalidwe iliye nsoni* kuti achite viipa va ntundu uliwonse mwadyela.
20 Koma mwewo muliye phunzile kuti Khilisitu ali tetyo.
21 Yesu enzephunzisa choonadi, mwakuti keno mwechimvwa venzephunzisa, ndipo mwephunzisiwa na yove, niye kuti muviziŵa luweme vinthu vamene ivo.
22 Mwiphunzisiwa kuti muvule umunthu wakale wamene ukatijana na minkhalidwe yanu yakale, wamenesoti uipishiwa chifukwa cha vokumbwa vachinyengo va umunthu wamene uyo.
23 Ndipo mupitilije kuchinja kuti munkhale anyowani pa mwamuganizila komasoti mwamuwonela vinthu.*
24 Ndipo muvwale umunthu wanyowani wamene wilengewa mokatijana na chifunilo cha Mulungu. Mukochita vamene ivi muzakwanishe kuchita chendi volungama na vokhulupilika.
25 Tetyo, pakuti lomba mwataya chinyengo, aliyense wa mwewo akolaŵila vachendi kwa muyake, chifukwa nise vizo volundikana.
26 Keno mwakalipa osati muchimwe. Zuŵa osati ichome mukali kalipe.
27 Osati mumupase mpata Mdyelekezi.*
28 Munthu wamene ni kawalala aleke kuiŵa, koma akolimbikila kukata ntchito. Akokata ntchito iweme na manja ŵake kuti akokwanisha kufwana vinthu vamene angakwanishe kupasako munthu wala aliye.
29 Mawu owola osati akofuma pakamwa panu, koma pakofuma mawu aweme ŵeka kuti atang’ishe ayakine pakafunika kuchita tetyo, kuti ayavye ŵanthu amene omvwishila.
30 Komasoti osati mukomvwisha chisoni mzimu utuŵa wa Mulungu, wechikatishila ntchito Mulungu wamene uyo pokuikani chidindo kuti muzamasuliwe na dipo pa nsiku ya chipulumuso.
31 Chidani chikulu, kupya ntima, ukali, matafu, mawu onyoza komasoti vinthu vonse viipa vifumyiwe muli mwewo.
32 Koma mukowamilana ntima, mukowoneshana chifundo chikulu komasoti mukokhululukilana na ntima wonse, mongasoti ni mwechikukhululukilani Mulungu na ntima wonse kupitila mwa Khilisitu.
Malizu a m'nyansi
^ Olo kuti, “na maganizo olichefya.”
^ Olo kuti, “olalikila uthenga uweme.”
^ Olo kuti, “aphunzise.”
^ Mu Chigiliki a·sel′gei·a. Onani matanthauzo a mawu ayakine.
^ Olo kuti, “komasoti mphamvu yuyendesha maganizo ŵanu.” Mu Chigiliki, “mzimu wa maganizo ŵanu.”
^ Olo kuti, “Osamupasa malo Mdyelekezi.”
