Kuli Aifenso 5:1-33
5 Tetyo mukokonkheja Mulungu, monga ŵana ŵake apantima,
2 ndipo pitilijani kuwonesha chikondi monga ni mwechitikondela* Khilisitu nolipeleka yeka chifukwa cha sewo* monga chopeleka komasoti monga ni nsembe yonunkhila luweme kwa Mulungu.
3 Nkhani za chiwelewele* komasoti chinthu chiipa cha ntundu uliwonse olo chigolo* osati vitomolewe olo patontho pakati panu, chifukwa ŵanthu atuŵa ofunikalini kuchita vamene ivi.
4 Osati mukotomola olo nkhani zokhuza nkhalidwe yochitisha nsoni, nkhani zopusa olo nthabwala zotukila chifukwa ni vinthu vosayenela. Mmalomwake mukotembeja Mulungu.
5 Chifukwa mfundo iyi muiziŵa ndipo muimvwisha luweme, kuti munthu wachiwelewele* olo woipishiwa na wachigolo,* kwamene ni kulambila mafano, azaloŵelini mu Ufumu wa Khilisitu na wa Mulungu.
6 Munthu osati akusempheni na mawu atyala-tyala, chifukwa ukali wa Mulungu uzafwike pa ŵana a ŵanthu asamvwila, amene ochita vinthu vamene ivi vanatomola.
7 Tetyo osati mukochita vakuchita ove.*
8 Chifukwa poyamba mwenze monga ni mfinzi, koma lomba muli monga ni kungweleŵela pakuti nimwe okatijana na Ambuye. Pitilijani kuyenda monga ŵana a kungweleŵela.
9 Chifukwa vitwazi va kungweleŵela ni chilichonse chiweme, chilichonse cholungama na cha chendi.
10 Nthawe zonse mukosimikijila kuti chovomelejeka kwa Ambuye ni chotyani.
11 Ndipo muleke kuchita nawo ntchito zosapindulisha za mu mfinzi. Mmalomwake, mukowonesha patuŵa kuti ni vinthu viipa.
12 Chifukwa vinthu vakuchita ove mwachisinsi ni vochitisha nsoni olo kuvitomola.
13 Lomba vinthu vamene vuululiwa* vuwonekela patuŵa chifukwa cha kungweleŵela, pakuti chilichonse chamene chawonekela chunkhala kungweleŵela.
14 N’chifukwa chake pali mawu akuti: “Uka, wewo uli yone! Uka kwa akufwa ndipo Khilisitu azangweleŵele pali wewo.”
15 Tetyo samalani ngako kuti pamuyenda, osati mukoyenda monga ni ŵanthu aliye nzelu koma monga ŵanthu anzelu.
16 Mukokatishila ntchito luweme nthawe yanu* chifukwa masiku amene aŵa ni aipa.
17 Pa chifukwa chamene ichi lekani kuchita vinthu monga ni ŵanthu aliye nzelu, koma pitilijani kuziŵa chifunilo cha Yehova.
18 Komasoti osati mukokolwa na vinyu, chifukwa kukolwa kungachitishe kuti muchite vinthu viipa ngako, koma pitilijani kuzujiwa na mzimu.
19 Mukoimba pamozi masalimo, nyimbo zotamanda Mulungu komasoti nyimbo zauzimu. Mukoimba nyimbo zotamanda Yehova mmitima yanu.
20 Nthawe zonse mukotembeja Mulungu, Atata ŵasu, pa vinthu vonse mu zina ya Ambuye wasu Yesu Khilisitu.
21 Mukogonjelana poyopa Khilisitu.
22 Anakazi akogonjela analume ŵawo monga ni mwakugonjelela Ambuye,
23 chifukwa mwanalume ni mutu wa mwanakazi wake molingana na Khilisitu wamene ni mutu wa mpingo, pakuti yove ni mpulumusi wa muŵili* wamene uyu.
24 Ndipo, molingana na mwauchitila mpingo kugonjela Khilisitu, anakazisoti akogonjela analume ŵawo pa chilichonse.
25 Mwewo analume, pitilijani kukonda anakazi ŵanu monga ni mwechichitilasoti Khilisitu kukonda mpingo nolipeleka yeka chifukwa cha mpingo wamene uyo,
26 na cholinga chakuti autuŵishe pousambika mmanzi a mawu a Mulungu.
27 Echita vamene ivi kuti yove alondele mpingo wamene uyo uli uweme komasoti waulemelelo, uliye maŵala olo maniya olosoti chilichonse cha vinthu vamene ivi, koma kuti unkhale utuŵa na uliye kalema.
28 Molingana na vamene ivi, analume akokonda anakazi ŵawo monga ni mwakukondela miŵili yawo. Mwanalume wamene okonda mwanakazi wake olikonda yeka,
29 chifukwa paliye munthu wamene ezondapo kale muŵili wake, koma oulyesha noukonda monga ni mwakuchitila Khilisitu na mpingo
30 chifukwa nise vizo va muŵili wake.
31 “Chifukwa cha vamene ivi mwanalume azasiye atata ŵake na amayi ŵake nolipamikija kuli* mwanakazi wake ndipo aŵili amene awo azankhale muŵili umozi.”
32 Chisinsi chopatulika chamene ichi ni chikulu. Lomba nulaŵila za Khilisitu na mpingo.
33 Koma olo n’tetyo, aliyense wa mwewo akokonda mwanakazi wake monga ni mwakulikondela yeka komasoti mwanakazi akolemekeza ngako mwanalume wake.
Malizu a m'nyansi
^ Mabaibolo ayakine onena kuti, “mwechikukondelani.”
^ Mabaibolo ayakine onena kuti, “mwewo.”
^ Mu Chigiliki por·nei′a. Onani matanthauzo a mawu ayakine.
^ Olo kuti, “makunu.”
^ Onani matanthauzo a mawu ayakine.
^ Olo kuti, “wamakunu.”
^ Olo kuti, “Tetyo osati mukotandala nawo.”
^ Olo kuti, “vuzuzuliwa.”
^ Mu Chigiliki, “Mukogula nthawe yoikiliwatu.”
^ Kutanthauza mpingo.
^ Olo kuti, “na kuyankhala na.”
