Kuli Aifenso 6:1-24
6 Mwewo mwaŵana, mukomvwila makolo ŵanu mokatijana na vakufuna Ambuye, chifukwa kuchita vamene ivi ni kofunika.
2 “Mukolemekeza atata ŵanu na amayi ŵanu.” Yamene iyi ni lamulo yoyamba yonkhala na lonjezo. Lonjezo yake ni yakuti:
3 “Kuti vinthu vikuyendeleni luweme, komasoti kuti munkhale na moyo utali pano pa chalo.”
4 Mwewo atata, osati mukokalipisha ŵana ŵanu, koma pitilijani kuŵalela poŵapasa malangizo* komasoti kuŵaphunzisa mokatijana na vakunena Yehova.
5 Mwewo akapolo mukomvwila ŵanthu amene ni abwana ŵanu. Mukoŵayopa noŵalemekeza kufumila pansi pa ntima, monga ni mwamuchitila na Khilisitu.
6 Osati mukochita vamene ivi peka-peka ŵanthu pakukuwonani pofuna tyala kuŵakondwelesha,* koma monga akapolo a Khilisitu amene ochita chifunilo cha Mulungu na ntima wonse.
7 Mukotumikila abwana ŵanu molipeleka, monga kuti mutumikila Yehova osati ŵanthu,
8 chifukwa muziŵa kuti pa chiweme chilichonse changachite munthu, Yehova azamupase mphoto, keno munthu wamene uyo ni kapolo olo womasuka.
9 Mwewo mabwana, mukoŵachitilasoti chimozi-mozi akapolo ŵanu. Osati mukoŵayofya chifukwa muziŵa kuti Abwana ŵa mwewo na ŵa akapolo ŵanu amene awo, ali kululu ndipo aliye sankho.
10 Posilijila nunena kuti, pitilijani kufwana mphamvu kufumila kwa Ambuye chifukwa mphamvu zake ni zikulu.
11 Vwalani visulo vonse va nkhondo vofumila kwa Mulungu kuti osati mugonje polimbana na vochita vachinyengo* va Mdyelekezi,
12 chifukwa tulimbanalini na ŵanthu a muŵili wa milopa na nyama, koma tulimbana na viŵanda vili kululu vamene ni maboma komasoti maulamulilo amene olamulila chalo ichi chamene chili mu mfinzi.
13 Pa chifukwa chamene ichi, nyamulani visulo vonse va nkhondo vofumila kwa Mulungu kuti pa nsiku iipa osati muzagonje, ndipo muzakwanishe kuchita vonse bwino-bwino kuti muzatang’e.
14 Tetyo munkhale otang’a, nomanga ngako choonadi muluunda mwanu monga ni bande, mulivwale cholitetezela panganga chachilungamo,
15 komasoti muvwale nsapato kumendo kwanu pokonzekela kulalikila uthenga uweme wa ntendele.
16 Kupambana vonse vamene ivi, nyamulani chishango chikulu chachikhulupililo, chati muzakwanishe kuzimwila mikondo yonse ya Satana yoyaka mulilo.
17 Komasoti vwalani chisote chachipulumuso ndipo nyamulani chibemba cha mzimu, chamene ni mawu a Mulungu.
18 Pamuchita vamene ivi, mukopemphela pa chochitika chilichonse mu mzimu, pokatishila ntchito pemphelo na kupapatila kwa ntundu uliwonse. Kuti muchite vamene ivi nkhalani tuni ndipo nthawe zonse mukopemphela mopapatila mmalo mwa atuŵa onse.
19 Mukopemphelelasoti newo kuti nikayamba kulaŵila nikofwana mawu aweme na cholinga chakuti nikokwanisha kulaŵila motang’a ntima panulalikila vokhuza chisinsi chopatulika cha uthenga uweme,
20 wamene newo nine mbasada* wake womangiwa na tcheni komasoti kuti nilaŵile za uthenga wamene uyo motang’a ntima monga ni mwanufunikila kuchitila.
21 Lomba, kuti muziŵesoti mwavuyendela vinthu pa moyo wangu na mwanilili, Tukiko, nkwasu wapantima komasoti ntumiki wokhulupilika wa Ambuye, azakufotokozeleni vonse.
22 Namutumija kuli mwewo na cholinga chamene ichi, kuti muziŵe za moyo wasu komasoti kuti atonthoje mitima yanu.
23 Ntendele na chikondi komasoti chikhulupililo vofumila kwa Mulungu Atata na kwa Ambuye Yesu Khilisitu, vinkhale pali mwewo akwasu.
24 Kuwama ntima kukulu kunkhale pali onse amene ali na chikondi ngacho-ngacho kwa Ambuye wasu Yesu Khilisitu.
Malizu a m'nyansi
^ Mawu a mu Chigiliki amene amasuliliwa kuti “malangizo” ali na matanthauzo anyinji. Angatanthauze malangizo, kuphunzisa, kuzuzula, kutang’isha, olo kulangiza.
^ Mu Chigiliki, “mwachinyengo pofuna kukondwelesha ŵanthu.”
^ Olo kuti, “na viwembu.”
^ Mbasada ni munthu wamene onkhala mu chalo chiyakine koma opanamila chalo cha kwawo. Tetyo oloŵelelalini mu ndale za mu chalo chamene icho chakunkhala.
