Kuli Akolose 1:1-29
1 Newo Paulo, ntumwi wa Khilisitu Yesu mwa kufuna kwa Mulungu, nili pamozi na nkwasu Timoteyo.
2 Nulembela atuŵa na akwasu okhulupilika amene ni okatijana na Khilisitu ku Kolose kuti:
Mulungu Atata ŵasu akupaseni kuwama ntima kukulu na ntendele.
3 Nthawe zonse patukupemphelelani, tutembeja Mulungu, Atata ŵa Ambuye wasu Yesu Khilisitu.
4 Tuchita vamene ivi chifukwa tichimvwa za chikhulupililo chanu mwa Khilisitu Yesu komasoti za chikondi chamuwonesha atuŵa onse
5 chifukwa cha chiyembekezo chakuzalondela vinthu vakukusungilani kululu. Mwichimvwa za chiyembekezo chamene ichi kuvuli uku pemwichimvwa uthenga wa choonadi, wamene ni uthenga uweme
6 wamene wifwika kuli mwewo. Uthenga uweme utwala vitwazi komasoti kufalikila pa chalo chonse. Vamene ivi niyesoti vankhala vuchitika kuli mwewo kufumila pa nsiku yemwichimvwa noziŵa luweme kuwama ntima kukulu kwa Mulungu kwamene ni ngako-ngako.
7 Vamene ivi niye vemwiphunzila kwa Epafula, kapolo muyasu wapantima, wamene ni ntumiki wokhulupilika wa Khilisitu mmalo mwa sewo.
8 Yove niyesoti etiziŵisha za chikondi chanu chemwiwonesha moyavyiwa na mzimu wa Mulungu.*
9 N’chifukwa chake nasesoti, kufumila pa nsiku yetichimvwa vamene ivo, tiliye leke kukupemphelelani. Tankhala tusenga kuti muziŵe luweme chifunilo cha Mulungu komasoti kuti munkhale na nzelu zonse nomvwisha vinthu vauzimu.
10 Tachita vamene ivi na cholinga chakuti munkhale na nkhalidwe yokatijana* na vakufuna Yehova kuti mukomukondwelesha pa chilichonse, pamupitilija kutwala vitwazi pa ntchito iliyonse iweme noyangijila kumuziŵa luweme Mulungu.
11 Tusengasoti kuti mulondele mphamvu zikulu mokatijana na mphamvu zake zochitisha wowa, na cholinga chakuti mukwanishe kupilila vinthu vonse moleza ntima na mosangalala,
12 komasoti mukotembeja Atata amene echitisha kuti munkhale oyenelela kulondela nawo chuma cha atuŵa amene ali mukungweleŵela.
13 Yove etipulumusha ku ulamulilo wa mfinzi, notifulushila mu ufumu wa Mwana wake wapantima.
14 Kupitila muli Mwana wake wamene uyo, timasuliwa na dipo* ndipo machimo ŵasu okhululukiliwa.
15 Yove ni chifanizilo cha Mulungu wamene uyo wosawoneka, woyamba kuvyalika wa chilengedwe chonse.
16 Kupitila muli yove, Mulungu elenga vinthu viyakine vonse kululu na pano pa chalo. Elenga vinthu vuwoneka na vinthu visawoneka, keno ni mipando yachifumu, ambuye, maboma komasoti maulamulilo. Ni chendi, elenga vinthu viyakine vonse kupitila muli yove, komasoti chifukwa cha yove.
17 Komasoti yove enzepokale vinthu viyakine vonse vikaliye nkhalapo ndipo vinthu viyakine vonse vinkhalapo kupitila muli yove.
18 Yove ni mutu wa muŵili wamene ni mpingo. Yove ni chiyambi, woyamba kuvyalika kufumila kwa akufwa, kuti azankhale woyamba pa vinthu vonse.
19 Vili tetyo chifukwa chakuti Mulungu vimukondwelesha kuti minkhalidwe yake yonse inkhale mwa Khilisitu.
20 Komasoti kuti kupitila muli Mwana wake wamene uyo akatanijesoti vinthu viyakine vonse na yove, keno vinthu vamene ivo ni vapano pa chalo olo vakululu. Echita vamene ivi ponkhazikisha ntendele kupitila mmilopa yechikhesa Khilisitu pachimuti chotamanilapo.*
21 Kulaŵila chendi, mwewo amene kale mwenze kutali na Mulungu komasoti adani ŵake chifukwa maganizo ŵanu enze pa ntchito ziipa,
22 lomba wakatijana namwesoti kupitila mu imfwa ya mwana wake wamene epeleka muŵili wake wa nyama na cholinga chakuti akupelekeni pamenso pa Mulungu wamene uyo, muli opatulika na muliye chilema komasoti muliye chifukwa chokuyopejelani.
23 Koma mufunikila kupitilija kunkhala mokatijana na chikhulupililo chanu, muli onkhazikika pa fandeshoni, muli otang’a komasoti osanyang’anyika pa chiyembekezo cha uthenga uweme wemwichimvwa, wamenesoti wilalikiliwa pa chalo chonse.* Newo Paulo ninkhala ntumiki wa uthenga uweme wamene uyu.
24 Lomba nusangalala na mavuto ŵanukumana nawo chifukwa cha mwewo. Ndipo newosoti nuwona kuti niliye tamane mphela mokwanila monga chizo cha muŵili wa Khilisitu, wamene ni mpingo.
25 Ninkhala ntumiki wa mpingo wamene uyu mokatijana na udindo wechinipasa Mulungu wakuti nilalikile mawu a Mulungu mokwanila kuti mwewo mupindule.
26 Mawu amene awo opamikijapo chisinsi chopatulika chamene chalo chiliye chiziŵe komasoti chenze chofisika ku mibadwo yakale. Koma lomba chaululiwa kuli atuŵa ŵake.
27 Mulungu vemukondwelesha kuululila atuŵa chisinsi chopatulika chamene ichi pakati pa ŵanthu amitundu iyakine chamene chili na ulemelelo ukulu komasoti chuma chauzimu. Chisinsi chamene ichi ni Khilisitu wamene ni wokatijana na mwewo, kutanthauza kuti muli na chiyembekezo chakuzalondela ulemelelo pamozi na Khilisitu wamene uyo.
28 Tulalikila, tuchenjeja nophunzisa munthu aliyense za yove wamene uyu mu nzelu zonse, kuti tipeleke munthu aliyense kwa Mulungu ali wotang’a mwauzimu mokatijana na Khilisitu.
29 Kuti nikwanishe kuchita vamene ivi, nukata ntchito mwakhama ndipo nuyeja-yeja ngako kudalila mphamvu zake zamene zukata ntchito mwamphamvu muli newo.
Malizu a m'nyansi
^ Mu Chigiliki, “mu mzimu.”
^ Mu Chigiliki, “mukoyenda mokatijana.”
^ Onani matanthauzo a mawu ayakine.
^ Onani matanthauzo a mawu ayakine.
^ Mu Chigiliki, “mu chilengedwe chonse cha pano pa chalo.”