Kuli Akolose 2:1-23
2 Nufuna kuti muziŵe mavuto akulu ŵanukumana nawo chifukwa cha mwewo na ŵanthu aku Laodikaya komasoti chifukwa cha ŵanthu onse amene akaliye niwonapo menso na menso.*
2 Nuchita vamene ivi kuti mitima yawo ilimbikisiwe komasoti kuti onse ankhale okatijana mu chikondi komasoti kuti alondele chuma chonse chamene chuwela chifukwa chomvwisha luweme vinthu, paliye kukaikila chilichonse, na cholinga chakuti aziŵe luweme chisinsi chopatulika cha Mulungu, chamene ni Khilisitu.
3 Chuma chonse chokhuzana na nzelu komasoti kuziŵa vinthu chifisiwa luweme muli yove.
4 Nulaŵila vamene ivi kuti munthu aliyense osati akusempheni na mfundo zangafune kukusemphani nazo.
5 Olo kuti nililini kwamene uko, nuganizila mphela za mwewo. Nakondwela kumvwa kuti muchita vinthu mwadongosolo komasoti kuti muli na chikhulupililo chotang’a mwa Khilisitu.
6 Lomba pakuti mukhulupilila Khilisitu Yesu Ambuye wasu, pitilijani kuyenda mokatijana naye.
7 Mokatijana na vemwiphunzila, chikhulupililo chanu mwa Khilisitu chinkhale na miju yotang’a, chipitilije kukula ndipo chinkhale chotang’a komasoti nthawe zonse mukotembeja Mulungu.
8 Samalani kuti muyakine osati akukateni nonkhala akapolo,* pokatishila ntchito nzelu za ŵanthu na chinyengo chatyala-tyala, mokatijana na miyambo ya ŵanthu komasoti mfundo zakuyendela ŵanthu a muli ichi chalo, osati mokatijana na Khilisitu,
9 chifukwa yove ali na minkhalidwe yonse ya Mulungu.
10 Musoŵalini kanthu kalikonse chifukwa cha yove, wamene ni mutu wa boma iliyonse na ulamulilo uliwonse.
11 Pakuti muli naye pa ushamwali mwichitiwa mdulidwe ndipo mdulidwe wake wenzelini wochitiwa na manja a ŵanthu koma wichitika pemwivula muŵili wa uchimo chifukwa mdulidwe wa atumiki a Khilisitu niye mwaunkhalila.
12 Vili tetyo chifukwa mwiikiwa naye pamozi mmanda pobatiziwa ubatizo wolingana na wake. Ndipo pakuti muli naye pa ushamwali komasoti mukhulupilila vinthu vechipanga Mulungu wamene emuusha kwa akufwa na mphamvu zake, mwiushiwa naye pamozi.
13 Kuyangijila pamene apo, olo kuti mwenze akufwa chifukwa cha machimo ŵanu komasoti chifukwa chakuti mwenze osachitiwa mdulidwe, Mulungu ekupasani moyo kuti munkhale okatijana na Khilisitu. Mowama ntima etikhululukila machimo ŵasu onse
14 ndipo esilija Chilamulo chamene chenze na malamulo anyinji amene enzetishusha. Yove echichosa pochikhomelela pachimuti chotamanilapo.*
15 Pokatishila ntchito chimuti chotamanilapo chamene icho, yove evula maboma na olamulila noŵasiya chinthaku ndipo eŵawonesha patuŵa kuti ŵanthu onse awone kuti waŵagonjesa noyenda nawo monga ni adjeli.
16 Tetyo osati muvomele kuti munthu aliyense akuweluzeni chifukwa cha chakulya na vakumwa olo chikondwelelo chiyakine olo kusunga nsiku yawawoneka mwezi wanyowani olosoti kusunga nsiku ya sondo.
17 Vinthu vamene ivi venzewonesha tyala vinthu venzekuza kusogolo, koma vinthu ngavo-ngavo vikwanilishiwa na Khilisitu.
18 Osati muvomele kuti munthu aliyense wamene osangalala na kulichefya kwachinyengo komasoti kulambila angelo* akukangisheni kuzalondela mphoto. “Munthu wotetyo oyumilila” vinthu vawawona ndipo maganizo ŵake ochimwa omuchitisha kuti akolitumba paliye chifukwa chomvwika.
19 Okonkhejalini mutu wamene kupitila muli yove, muŵili wonse ufwana vonse vaufunikila ndipo vizo vake ni volundikijana luweme na majoini ŵake komasoti mizipe ndipo yukula mphela moyavyiwa na Mulungu.
20 Keno mwichifwa pamozi na Khilisitu ndipo mukonkhejalinisoti mfundo zakuyendela ŵanthu a muli ichi chalo, ndaŵa yanji mupitilija kunkhala monga mukali mbali ya ichi chalo, pogonjelasoti malamulo akuti:
21 “Osatola ichi, osalaula ichi, olo osakumya ichi”?
22 Malamulo amene aŵa onena za vinthu vamene vusila munthu akovikatishila ntchito ndipo ni malamulo komasoti vinthu vakuphunzisa ŵanthu.
23 Olo kuti vinthu vamene ivo vuwoneka monga ni vanzelu, amene awo ovichita osankha ŵeka njila yolambilila. Ove otamanisha muŵili wawo kuti ŵanthu akowona monga ni olichefya. Koma vamene ivo ni vosayavya kuli munthu wamene olimbana na vinthu vaufuna muŵili.
Malizu a m'nyansi
^ Mu Chigiliki, “amene akaliye wonako chinso changu.”
^ Olo kuti, “osati akukateni monga ni nyama.”
^ Onani matanthauzo a mawu ayakine.
^ Olo kuti, “kulambila monga ni mwakuchitila angelo.”
