Kuli Akolose 3:1-25
3 Koma olo n’tetyo, keno mweushiwa pamozi na Khilisitu, pitilijani kusakila vinthu vakululu, kwamene Khilisitu alinkhale ku kwanja ngayo ya Mulungu.
2 Pitilijani kuganizila vinthu vakululu, osati vinthu va pano pa chalo.
3 Chifukwa mwichifwa ndipo moyo wanu wafisiwa pamozi na Khilisitu wamene ali katijane na Mulungu.
4 Khilisitu, wamene ni moyo wasu, akazawonesha mphamvu zake,* mwewosoti muzawoneshe naye pamozi mphamvu zanu mu ulemelelo.
5 Tetyo chitishani vizo va muŵili wanu pano pa chalo kunkhala vakufwa ku chiwelewele,* vinthu vuipisha, chilakolako chisalamulilika cha kuyonana, kukumbwila vinthu viipa komasoti dyela yamene ni kulambila mafano.
6 Mulungu azawoneshe ukali wake kuli ŵanthu amene ochita vamene ivi.
7 Namwesoti mwenzechita vamene ivo pemwenzenkhala na moyo wolingana na ŵanthu amene awo.
8 Koma lomba mufunikila kutaya vonse vamene ivo kutali na mwewo. Mutaye ukali, kupya ntima, kuipa komasoti mawu onyoza ndipo pakamwa panu osati pakofuma nkhani zotukila.
9 Osati mukotalijana wenye. Vulani umunthu* wakale pamozi na ntchito zake,
10 ndipo muvwale umunthu wanyowani wakupeleka Mulungu. Umunthu wanyowani wamene uyu ni wopangiwa mokatijana na chifanizilo cha Mulungu. Tetyo pamumuziŵa luweme Mulungu, pitilijani kuchitisha umunthu wanu kunkhala wanyowani.
11 Mukachita tetyo, pazankhalelini Mugiliki olo Muyuda, kuchitiwa mdulidwe olo kusachitiwa mdulidwe, mulwendo, Msukuti,* kapolo olo womasuka, chifukwa Khilisitu ochita vinthu vonse ndipo sewo nise okatijana naye.
12 Tetyo monga ŵanthu osankhiwa na Mulungu, atuŵa na apantima, vwalani chifundo chikulu, kuwama ntima, kulichefya, kufasa komasoti kuleza ntima.
13 Pitilijani kulolelana nokhululukilana na ntima wonse, olo muyakine ali na chifukwa chodandaulila za muyake. Molingana na Yehova wamene ekukhululukilani na ntima wonse, namwesoti mukochita chimozi-mozi.
14 Koma kuyangijila pa vonse vamene ivi, vwalani chikondi, chifukwa chukatanija ŵanthu mwamphamvu ngako kupambana chinthu chiyakine chilichonse.
15 Komasoti vomelani kuti ntendele wa Khilisitu ulamulile mmitima yanu, pakuti mweitiwa ku ntendele wamene uyu monga vizo va muŵili umozi. Ndipo oneshani kuti mutembeja.
16 Mawu a Khilisitu ankhazikike muli mwewo ndipo akupaseni nzelu zonse. Pitilijani kuphunzisana notang’ishana na masalimo, nyimbo zotamanda Mulungu komasoti nyimbo zauzimu zotembeja. Pitilijani kuimbila Yehova mmitima yanu.
17 Chilichonse chamuchita mmawu olo mu vochita, mukochita vonse mu zina ya Ambuye Yesu, ndipo mukotembeja Mulungu Atata kupitila muli yove.
18 Mwewo anakazi, mukogonjela analume ŵanu, chifukwa vamene ivi ni vofunika kuli ŵanthu okonkheja Ambuye.
19 Mwewo analume, pitilijani kukonda anakazi ŵanu ndipo osati mukoŵapyila ntima ngako.*
20 Mwewo mwaŵana, mukomvwila makolo ŵanu pa vinthu vonse, chifukwa vamene ivi vukondwelesha Ambuye.
21 Mwewo atata, osati mukokalipisha* ŵana ŵanu, kuti osati akonkhala okhumudwa.
22 Mwewo akapolo, mukomvwila ŵanthu amene ni mabwana ŵanu pa vinthu vonse, osati tyala pakukuwonani pofuna tyala kukondwelesha ŵanthu,* koma mwachilungamo komasoti moyopa Yehova.
23 Chilichonse chamuchita, mukochichita na moyo wanu wonse monga kuti muchitila Yehova, osati ŵanthu,
24 chifukwa muziŵa kuti mphoto yati muzalondele ni chuma chofumila kwa Yehova. Tumikilani Ambuye wanu Khilisitu monga akapolo.
25 Kulaŵila chendi, wamene ochita vophoniyeka azalondele chilango chifukwa cha vophoniya vamene ivo vakuchita, chifukwa Mulungu okondelalini.
Malizu a m'nyansi
^ Mu Chigiliki, “akazawoneshewa.”
^ Mu Chigiliki por·nei′a. Onani matanthauzo a mawu ayakine.
^ Mu Chigiliki, “munthu.”
^ Mawu akuti “Msukuti” otanthauza munthu wachiminzi-minzi; munthu wakumunzi.
^ Olo kuti, “ndipo osati mukoŵachitila nkhanza.”
^ Olo kuti, “osati mukopyisha ntima.”
^ Mu Chigiliki, “osati mwachinyengo monga ni munthu wamene ofuna tyala kukondwelesha ŵanthu ayakine.”
