Kuli Akolose 4:1-18
4 Mwewo ŵanthu amene nimwe mabwana, mukochitila akapolo ŵanu vinthu vachilungamo na viweme, chifukwa muziŵa kuti namwesoti muli na Wokulolelani kululu.
2 Mukolimbikila kupemphela. Munkhale tuni pa nkhani yopemphela ndipo mukotembeja.
3 Komasoti mukotipemphelela sewo kuti Mulungu atisegulile njila kuti tikwanishe kulalikila mawu nolaŵila za chisinsi chopatulika chokhuza Khilisitu chamene chechitisha kuti nimangiwe nonkhala muno mu djeli,
4 kuti nizalalikile za chisinsi chamene icho momvwika luweme monga ni mwanufunikila kuchitila.
5 Pitilijani kuchita vinthu mwanzelu pamunkhala na ŵanthu osakhulupilila, ndipo mukokatishila ntchito luweme nthawe yanu.*
6 Nthawe zonse mawu ŵanu akowonesha kuti nimwe aweme ntima ndipo akonkhala aweme monga kuti mwaŵaika munyu, kuti muziŵe mwamungayankhile munthu aliyense.
7 Tukiko wamene ni nkwasu wapantima, ntumiki wokhulupilika komasoti kapolo muyangu mwa Ambuye, azakuujeni vonse vokhuza newo.
8 Numutumija kuli mwewo kuti muziŵe mwatilili komasoti kuti atang’ishe mitima yanu.
9 Awele pamozi na Onesimo, nkwasu wokhulupilika na wapantima, wamene efumila kwamene uko. Ove azakuujeni vonse vuchitika kuno.
10 Alisitako wadjeli muyangu akuti moni monse. Komasoti Maliko mkhazeni wa Balanaba, (wamene nikulangizani kuti mumulondele nthawe iliyonse akazafwika kuli mwewo),
11 na Yesu, wamene oziŵikasoti kuti Yusito, akuti moni. Ove ali mu gulu ya ŵanthu ochitiwa mdulidwe. Amene aŵa ŵeka ni antchito ayangu pa vinthu vokhuzana na Ufumu wa Mulungu ndipo onitang’isha ngako.
12 Epafula, wamene efumila kwamene uko, kapolo wa Khilisitu Yesu, akuti moni. Yove okupemphelelani mwakhama nthawe zonse kuti mupitilije kunkhala otang’a mwauzimu komasoti kuti osati mukokaikila olo patontho vinthu vonse vati azachite Mulungu.
13 Numuchitila chendi umboni kuti olipeleka ngako chifukwa cha mwewo komasoti chifukwa cha akwasu aku Laodikaya na ku Helapoli.
14 Luka dokota wapantima, akuti moni monse. Dema nayesoti opeleka moni.
15 Munipelekele moni kuli akwasu aku Laodikaya komasoti kwa Numfa na mpingo wamene usonkhana pa ng’anda pake.
16 Kalata yamene iyi mukaiŵelenga kwamene uko kwanu, mukonze zakuti ikaŵelengewesoti ku mpingo wa Alaodikaya, komasoti kuti mwewo muŵelenge yofuma ku Laodikaya.
17 Komasoti Alikipo mumuuje kuti: “Uwonesheshe kuti utumiki weulondela mwa Ambuye uukwanilisha.”
18 Lomba londelani moni wangu wochita lemba neka na kwanja yangu, newo Paulo. Pitilijani kukumbukila matcheni ŵanimanga nawo kuno ku djeli. Kuwama ntima kukulu kunkhale namwe.
Malizu a m'nyansi
^ Mu Chigiliki, “ndipo mukogula nthawe yoikiliwatu.”