Kuli Aloma 1:1-32
1 Newo Paulo kapolo wa Yesu Khilisitu, niitiwa kuti ninkhale ntumwi komasoti nisankhiwa kuti nilalikile uthenga uweme wa Mulungu.
2 Yove elonjeza uthenga wamene uyu kale ngako m’Malemba atuŵa kupitila muli aneneli ŵake.
3 Uthenga wamene uyo unena za Mwana wake wamene ni mbadwa* ya Davite,
4 ndipo Mulungu eusha Mwana wamene uyo pokatishila ntchito mphamvu ya mzimu wake utuŵa. Wamene uyu ni Yesu Khilisitu Ambuye wasu.
5 Kupitila muli yove, Mulungu etiwonesha kuwama ntima kukulu ndipo nisankhiwa kunkhala ntumwi kuti niyavye ŵanthu amitundu yonse kuti awoneshe chikhulupililo, ankhale omvwila komasoti kuti alemekeze zina yake.
6 Pakati pa ŵanthu amitundu yamene iyo palisoti mwewo amene mweitiwa kuti munkhale ophunzila a Yesu Khilisitu.
7 Kalata yamene iyi nalembela mwewo monse munkhala ku Loma amene mukondewa na Mulungu komasoti mweitiwa kuti munkhale atuŵa:
Munkhale na kuwama ntima kukulu komasoti ntendele wofumila kwa Mulungu Atata ŵasu na Ambuye wasu Yesu Khilisitu.
8 Choyamba nutembeja Mulungu wangu kupitila mwa Yesu Khilisitu chifukwa cha mwewo monse, chifukwa ŵanthu pa chalo chonse olaŵila za chikhulupililo chanu.
9 Nthawe zonse nikopemphela nukutomolani mmapemphelo ŵangu ndipo Mulungu wamene numuchitila utumiki wopatulika na ntima wangu wonse polalikila uthenga uweme unena za Mwana wake, onichitila umboni.
10 Numusenga kuti keno n’vokwanishika komasoti keno niye vakufuna yove, ulwendo uno weka niwele uko kwanu.
11 Chifukwa nufunishisha kukuwonani kuti nikupaseni mphaso iyakine yauzimu kuti munkhale otang’a,
12 olo kuti nizatang’ishiwe na chikhulupililo chanu, namwesoti muzatang’ishiwe na chikhulupililo changu.
13 Koma akwasu nafuna kuti muziŵe kuti kwa nthawe itali nankhala nufuna kuwela kwanu kwamene uko, koma vankhala vukanga. Nufuna nizawone vokonkhapo viweme va ntchito yasu yolalikila monga ni mwavilili pakati pa ŵanthu amitundu iyakine yonse.
14 Newo nili na nkhongole kuli Agiliki na kuli ŵanthu amene ni Agilikilini komasoti kuli ŵanthu anzelu na kuli ŵanthu opusa.
15 Tetyo nufunishisha kuzalalikila uthenga uweme kuli mwewosoti kwamene uko ku Loma.
16 Newo nuchitalini nsoni na uthenga uweme. Kulaŵila chendi, uthenga wamene uyo ni njila yamphamvu yakukatishila ntchito Mulungu pofuna kupulumusha aliyense wamene ali na chikhulupililo, choyamba Ayuda pavuli pake Agiliki.
17 Mu uthenga wamene uyu, Mulungu oulula chilungamo chake kuli ŵanthu amene ali na chikhulupililo. Vikankhala tetyo chikhulupililo cha ŵanthu amene awo chutang’a mokatijana na vakunena Malemba kuti: “Koma wolungama azankhale na moyo chifukwa cha chikhulupililo chake.”
18 Kufumila kululu, Mulungu owonesha ukali wake kuli ŵanthu onse asayopa Mulungu na ochita vinthu viipa amene ochitisha kuti choonadi osati chiziŵike.
19 Vili tetyo chifukwa Mulungu waŵapasa umboni wokwanila woŵayavya kuti amuziŵe.
20 Kufumila pechilengewa chalo, minkhalidwe ya Mulungu isawoneka na menso yuwonekela luweme. Minkhalidwe ya Mulungu yamene iyi, olosoti mphamvu zake zosasila komasoti Umulungu wake, vuwonekela mu vinthu vechipanga mwakuti ŵanthu amene awo aliyesoti chifukwa chomvwika chosakhulupilila kuti kuli Mulungu.
21 Olo kuti enzeziŵa Mulungu, ove aliyemulemekeze monga Mulungu komasoti aliyemutembeje. Mmalo mwake, eyamba kuganiza vinthu viliye nzelu ndipo mitima yawo yopusa yamene iyo ichita mfinzi.
22 Olo kuti onena kuti ni anzelu ove ni opusa.
23 Mmalo molemekeza Mulungu wamene angafwelini, ove olemekeza vifanizilo va ŵanthu amene akufwa komasoti vifanizilo vatunyoni, vinyama vamendo 4 komasoti vinyama vukalaŵa.
24 Tetyo mokatijana na vilakolako va mmitima mwawo, Mulungu eŵaleka kuti achite vonyansa, kuti achite vinthu vochitisha nsoni na miŵili yawo.
25 Choonadi chunena za Mulungu echichinjanisha na wenye ndipo olambila komasoti kutumikila chilengedwe mmalo mwa Nyamalenga wamene ofunikila kutamandiwa mpaka kale-kale. Ame.
26 Niye chifukwa chake Mulungu eŵaleka kuti akonkhe vilakolako visalamulilika vakuyonana, pakuti anakazi pakati pawo esiya njila yachibadwa ya miŵili yawo nochita vinthu visakatijana na chibadwa.
27 Analumesoti chimozi-mozi. Ove esiya njila yachibadwa yofuna anakazi, nothumishana ŵeka-ŵeka mwachiwawa na chilakolako chiipa, analume ŵeka-ŵeka kuchitilana vinthu vonyansa nolondelelatu mphoto yokatijana na kuphoniya kwawo.
28 Pakuti enzewonalini kuti n’vofunika kumuziŵa luweme Mulungu, yove eŵasiya kuti apitilije kuganiza viipa nochita vinthu vosayenelela.
29 Ndipo enzechita vosalungama va ntundu uliwonse, kuipa konse, dyela* komasoti vinthu vonse viipa. Ntima wawo wezula na djalasi, kupaya ŵanthu, ndewo, chinyengo na njilu. Enzekondasoti tonjo
30 komasoti kunena ayawo. Enzezondana na Mulungu, enzelaŵila mawu aipa, olikuja, olitumba, achiwembu, osamvwila makolo,
31 asaziŵa vinthu, asakwanilisha vapangana, aliye chikondi chovyalika nacho komasoti aliye chifundo.
32 Olo kuti ŵanthu amene aŵa oiziŵa luweme lamulo yolungama ya Mulungu, yakuti amene ochita vinthu vamene ivi ofunikila kufwa, ove opitilija kuvichita. Kuyangijila pamene apo okatijanasoti na ŵanthu amene ochita vinthu vamene ivi.
