Kuli Aloma 10:1-21
10 Akwasu, chanufunishisha mu ntima mwangu komasoti pemphelo yangu yopapatila kwa Mulungu ni yakuti ŵanthu a ntundu wangu apulumushiwe.
2 Chifukwa nuŵachitila umboni kuti ni olipeleka potumikila Mulungu, koma omuziŵalini luweme.
3 Ndipo chifukwa chosaziŵa chilungamo cha Mulungu, ove aliye gonjele chilungamo chamene icho koma efuna kunkhazikisha chawo-chawo.
4 Khilisitu niye kusila kwa Chilamulo, kuti aliyense okhulupilila ankhale wolungama.
5 Pala Mose elemba vokhuza mwangachitile munthu chilungamo mokatijana na Chilamulo, yove enena kuti: “Aliyense wamene ochita vamene ivi azankhale na moyo chifukwa cha malamulo.”
6 Koma pa nkhani yachilungamo chamene chuwela chifukwa cha chikhulupililo, Malemba onena kuti: “Mu ntima mwako osanena kuti, ‘Kansi niŵani akuti azalute kululu?’ kuti akaselushe Khilisitu.
7 Olo kuti, ‘Kansi niŵani akuti azalute kuchisengu?’ kuti akaushe Khilisitu.”
8 Koma kansi lemba yunena chinji? Yunena kuti: “Mawu a chilamulo amene awo ali pafupi namwewo, ali nkamwa mwanu na mu ntima mwanu,” amene aŵa ni “mawu” a chikhulupililo ŵatulalikila.
9 Chifukwa keno ulengeza ‘mawu ali nkamwa mwako amene awo,’ akuti Yesu ni Ambuye, ndipo mu ntima mwako ukhulupilila kuti Mulungu emuusha, uzapulumuke.
10 Kuti munthu ankhale wolungama ofunikila kunkhala na chikhulupililo mu ntima mwake, koma na pakamwa pake olengeza patuŵa chikhulupililo chake kuti apulumuke.
11 Pala lemba iyakine yunena kuti: “Paliye okhulupilila yove wamene akuti azakalipishiwe.”
12 Paliye kusiyana pakati pa Muyuda na Mugiliki, pakuti kuli onse amene awo Ambuye ni mmozi, wamene opeleka na ntima wonse kuli onse oita pa zina yake.
13 Chifukwa “aliyense oita pa zina ya Yehova azapulumuke.”
14 Koma lomba, kansi angaite tyani pa zina yake keno omukhulupililalini? Angakhulupilile tyani keno akaliye mvwapo za yove? Lomba angamvwe tyani za yove paliye muyakine kumulalikila?
15 Ndipo angalalikile tyani keno aliye tumiwe? Vili monga ni mwakunenela Malemba kuti: “Mendo a ŵanthu olengeza uthenga uweme wa vinthu viweme, ni aweme ngako.”
16 Olo vili tetyo, ni onselini amene okonkheja uthenga uweme. Chifukwa Yesaya enena kuti: “Yehova, kansi niŵani wakhulupilila vechimvwa kuli sewo?”
17 Tetyo munthu onkhala na chikhulupililo chifukwa cha vinthu vawamvwa. Ndipo vamene ivo vawamvwa, vufumila mmawu onena za Khilisitu.
18 Koma nikonshe teti. Kansi kumvwa aliye umvwe? “Pala mawu ŵawo emvwika pa chalo chonse, ndipo uthenga wawo wemvwika mpaka kwachulekejela chalo kwamene kuli ŵanthu.”
19 Komasoti nikonshe kuti. Kansi n’chendilini kuti Aisilaeli enzeziŵa? Poyamba Mose enena kuti: “Nizakuchitisheni nsanje pokatishila ntchito ŵanthu amene ni Aisilaelilini. Nizakukalipisheni ngako pokatishila ntchito ntundu wopusa.”
20 Koma Yesaya elaŵila motang’a ntima ngako kuti: “Ŵanthu enifwana niyelini enzenisakila-sakila. Niziŵika kuli ŵanthu amene aliyekonshe za newo.”
21 Koma ponena za Aisilaeli yove enena kuti: “Natambulula manja ŵangu nsiku yonse kuli ŵanthu asamvwila komasoti anthota.”
