Kuli Aloma 11:1-36
11 Lomba nikonshe kuti, kansi Mulungu ekana ŵanthu ŵake? Yayi n’tetyolini. Pala nanesoti nine mmozi wa Aisilaeli, mbadwa* ya Abulahamu wa m’banja ya Benjamini.
2 Mulungu aliyekane ŵanthu ŵake amene enze oyambilila kuŵavomekeja. Kansi muziŵalini vayunena lemba iyakine vokhuza Eliya, pechipapatila Mulungu poshusha Aisilaeli? Yunena kuti:
3 “Yehova, ove apaya aneneli ŵanu ndipo awisha maguwa ŵanu ansembe mwakuti newo nasala neka-neka. Lomba ayambasoti kunisakila-sakila kuti anipaye.”
4 Koma kansi Mulungu emuuja chinji? Emuuja kuti: “Newo nasiya ŵanthu 7.000 amene nkhokola zawo zikaliye gwadilapo Baala.”
5 Tetyo pa nthawe inosoti alipo ayakine atontho amene esankhiwa mwakuwama ntima kukulu.
6 Koma lomba keno esankhiwa mwakuwama ntima kukulu, aliyesankhiwe chifukwa cha ntchito zawo yayi. Kuti vinkhale tetyo, kuwama ntima kwamene uko kungankhalelinisoti kuwama ntima kukulu.
7 Kansi vili tyani pamene apa? Chenzefunishisha Aisilaeli aliyechifwane, koma ŵanthu osankhiwa niye echifwana. Ayakine amene awo eyumisha mitima yawo
8 monga ni mwakunenela Malemba kuti: “Mulungu waŵapasa mzimu wa tulo twakufwanato, menso asalola na matu asamvwa, mpaka lelo.”
9 Komasoti Davite enena kuti: “Maphwando ŵawo ankhale liŵa, ukuka, chokhumudwisha na chilango kuli ove.
10 Menso ŵawo achite mfinzi kuti osati awone, ndipo aŵelamisheni na ntolo wolema.”
11 Lomba nikonshe kuti, kansi Ayuda ekhubulwa mpaka kuwilatu? Yayi. Koma chifukwa cha kuphoniya kwawo, ŵanthu amitundu iyakine afwana chipulumuso, ndipo vamene ivi vachitisha kuti Ayuda amene awo achite nsanje.
12 Kuphoniya kwawo kwaleta chuma m’chalo ndipo kuchepa kwawo kutanthauza chuma kuli ŵanthu a mitundu iyakine. Tetyo pazankhale madaliso anyinji chiŵelengelo chawo chikazakwanila.
13 Lomba nulaŵila na mwewo ŵanthu a mitundu iyakine. Pakuti nine ntumwi wotumiwa kuli ŵanthu amitundu iyakine, nulemekeza utumiki wangu,
14 kuti payakine ningachitishe ŵanthu a ntundu wangu kuchita nsanje nopulumushako ayakine mwa ove.
15 Chifukwa cha kukaniwa kwawo, vachitisha kuti ŵanthu ayakine pa chalo ankhale paushamwali na Mulungu, keno yove angaŵalondele lomba vingankhale monga waŵausha kufumila kuli akufwa.
16 Komasoti, keno mbali ya ntanda wa nkate yamene yapelekewa nsembe monga chitwazi choyambilila ni ituŵa, niyekuti ntanda wonse ni utuŵasoti. Ndipo keno muju wachimuti ni utuŵa, niyekuti misambo nayo ni ituŵa.
17 Keno misambo iyakine itendewa, ndipo wewo olo kuti niwe msambo wachimuti cha maolivi cha msanga, wilundikijiwa pakati pa misambo isala ndipo wiyamba kufwana vonse vofunika kufumila ku muju wachimuti cha maolivi chamene icho,
18 koma osaganiza kuti wewo niwe muweme ngako kupambana misambo iyakine yutendewa. Koma keno uganiza kuti niwe muweme ngako, kumbukila kuti niwewolini unyamula miju, koma miju niye yunyamula wewo.
19 Payakine unena kuti: “Etenda misambo iyakine kuti alundikijepo newo.”
20 Vamene ivo n’vachendi, ove etendewa chifukwa enzeve chikhulupililo, koma wewo ukalilundikijiwe kuchimuti chamene icho, chifukwa cha chikhulupililo. Chosa maganizo olikuja amene awo, koma nkhala na wowa.
21 Chifukwa keno Mulungu aliyelekelele misambo ya chilengedwe, nawesoti azakulekelelelini.
22 Ukoganizila kuwama ntima komasoti kusalekelela kwa Mulungu. Amene awo epona ewoneshewa kuti Mulungu olekelelalini koma wewo wiwoneshewa kuwama ntima kwa Mulungu. Vingakhale bwino kuti upitilije kunkhala woyenelela kuwoneshewa kuwama ntima kwake. Ukalekachita tetyo, wewosoti uzatendewe.
23 Ndipo keno Ayuda angayambe kunkhala na chikhulupililo, azalundikijiwe ku chimuti chamene icho, chifukwa Mulungu angakwanishe kuŵalundikijasoti.
24 Keno wewo witendewa ku chimuti cha Maolivi chamene chumela mwachilengedwe msanga ndipo mosiyana na chilengedwe wilundikijiwa ku chimuti cha Maolivi cha mmunda, kansi n’vipepulini kulundikija misambo yamene iyi ku chimuti chake kweitendewa?
25 Chifukwa nufunalini kuti munkhale osaziŵa akwasu za chisinsi chopatulika chamene ichi, kuyopela kuti mungaliwone monga nimwe anzelu. Chisinsi chamene icho n’chakuti ayakine mu Isilaeli ayumisha mitima yawo mpaka chiŵelengelo chonse cha ŵanthu ofumila mmitundu iyakine chizakwane.
26 Aisilaeli onse azapulumushiwe mwa njila yamene iyi mokatijana na vakunena Malemba kuti: “Mpulumusi azafumile mu Ziyoni ndipo azachosele Yakobo vochita vonse visalemekeza Mulungu.
27 Yamene iyi ni pangano yanikuti nizachite nawo nikazaŵachosela machimo ŵawo.”
28 N’chendi kuti ayakine mwa Ayuda ni adani a uthenga uweme, ndipo vamene ivi vakuyavyani mwewo koma Mulungu eŵasankha ndipo oŵakonda chifukwa cha makolo ŵawo akale.
29 Mulungu azadandaulelini chifukwa cha mphaso zake komasoti chifukwa chakuti eŵaita.
30 Mwewo mwenze osamvwila Mulungu, koma lomba mwawoneshewa chifundo chifukwa cha kusamvwila kwa Ayuda.
31 Ove lomba ni ŵanthu asamvwila ndipo Mulungu wakuwoneshani chifundo. Koma angakwanishe kuŵawonesha chifundo monga ni mwechichitila na mwewo.
32 Mulungu walola kuti onse ankhale akaidi akusamvwila kuti onse amene awo aŵawoneshe chifundo.
33 Kulaŵila chendi, madaliso ŵakupeleka Mulungu ni anyinji ngako. Nzelu zake ni zinyinji komasoti yove oziŵa ngako vinthu. Viweluzo vake ni vovuta kuvimvwisha, ndipo niŵani angamvwishe njila zake?
34 “Niŵani oziŵa maganizo a Yehova, olo niŵani angankhale mulangizi wake?”
35 Olosoti “niŵani eyamba kumupasa kanthu, kuti yove amujoshele?”
36 Chifukwa vinthu vonse vufumila kuli yove, ni yove evipanga komasoti ni vake. Ulemelelo unkhale wake mpaka kalekale. Ame.
Malizu a m'nyansi
^ Mu Chigiliki, “Mbewu.”