Kuli Aloma 12:1-21
12 Tetyo akwasu, nukudandaulilani mwa chifundo chikulu cha Mulungu kuti mupeleke miŵili yanu monga nsembe yamoyo, ituŵa komasoti yovomelejeka kwa Mulungu, yamene ni utumiki wopatulika pokatishila ntchito luso yoganiza.
2 Osatolelako nzelu za nthawe* ino, koma nkhalani munthu wanyowani pochinja ngako maganizo ŵanu kuti muziŵe chifunilo cha Mulungu, chiweme, chovomelejeka na changwilo.
3 Chifukwa cha kuwama ntima kukulu kwechiniwonesha Mulungu, nuuja aliyense wa mwewo kwamene uko kuti osati mukoliganizila kupambana mwamufunikila kuliganizila. Koma aliyense akoganiza mwanzelu noliweluza mokatijana na chikhulupililo chechimupasa Mulungu.
4 Muŵili unkhala na vizo vinyinji, koma vizo vamene ivo vukatalini ntchito yolingana.
5 N’chimozi-mozisoti na sewo, olo kuti tilipo anyinji nise muŵili umozi mwa Khilisitu ndipo nise vizo volundikijana.
6 Tili na mphaso zosiyana-siyana mokatijana na kuwama ntima kukulu kwetiwoneshewa. Tetyo keno tili na mphaso ya ulosi, tiyeni tikolosela mokatijana na chikhulupililo chasu.
7 Keno tili na mphaso ya utumiki, tiyeni tipitilije kuchita utumiki wamene uyo. Wamene ophunzisa apitilije kuphunzisa.
8 Wamene olimbikisa, akolimbikisa. Oyaŵa, akoyaŵa na ntima wonse. Osogolela, akosogolela mwakhama. Ndipo owonesha chifundo akochita vamene ivo mosangalala.
9 Chikondi chanu osati chinkhale cha chinyengo. Mukozondana na vinthu viipa noyeja-yeja kuchita vinthu viweme.
10 Pokonda akwasu, mukonkhala na chikondi ngacho-ngacho. Pa nkhani yowoneshana ulemu, mukoyamba ni mwewo.
11 Nkhalani akhama osati aulesi. Yakani na mzimu. Tumikilani Yehova monga akapolo.
12 Kondwelani chifukwa cha chiyembekezo. Mukopilila mavuto. Mukolimbikila kupemphela.
13 Yaŵanani na atuŵa mokatijana na vakusoŵa. Mukolondela luweme alwendo.
14 Pitilijani kudalisa ŵanthu okutamanishani. Mukodalisa, osati kutembelela.
15 Mukosangalala na ŵanthu osangalala ndipo mukolila na ŵanthu olila.
16 Mukowona ayakine monga ni mwamuliwonela mwewo. Osati mukoganiza molikuja, koma nkhalani na ntima wolichefya. Osati mukoliwona monga nimwe anzelu.
17 Osawejela chiipa pa chiipa. Mukoganizila vinthu vonse vakuwona ŵanthu kuti n’viweme.
18 Keno nivokwanishika, yeja-yejani mwamungakwanishile kuti mukonkhala mwa ntendele na ŵanthu onse.
19 Mwewo apantima pangu, osawejela viipa, koma siilani Mulungu ukali wake wolungama. Chifukwa Malemba onena kuti: “‘Kuwejela ni kwangu nizaŵawejele ni newo,’ wanena tetyo Yehova.”
20 Koma keno mdani wako ali na njala mpase chakulya. Keno ali na njota mpase chakumwa. Chifukwa ukachita tetyo uzamuunjikile minyeku ya mulilo pa mutu pake.”*
21 Osalola kuti chiipa chikugonjeseni, koma pitilijani kugonjesa chiipa pochita chiweme.
Malizu a m'nyansi
^ Onani matanthauzo a mawu ayakine.
^ Kutanthauza kowombesha komasoti kusambulula ntima wa munthu wovuta.
