Kuli Aloma 15:1-33
15 Sewo amene nise otang’a tufunikila tikoganizila ŵanthu amene ali na chikhulupililo chofoka, osati kungolikondwelesha seka.
2 Aliyense wa sewo akoyeja-yeja kukondwelesha muyake ndipo akochita vinthu vomulimbikisa.
3 Chifukwa olo Khilisitu enzechitalini vinthu volikondwelesha yove yeka, koma echita vakunena Malemba kuti: “Manyozo a ŵanthu okunyozani awela kuli newo.”
4 Vinthu vonse vilembewa kale ngako vilembewa kuti vitilangize. Malemba amene aŵa otiyavya kupilila komasoti otitang’isha na cholinga chakuti tinkhale na chiyembekezo.
5 Tetyo Mulungu wamene otipasa mphamvu kuti tikwanishe kupilila komasoti wamene otitonthoja akuyavyeni mwewo monse kunkhala na maganizo ŵenze nawo Khilisitu Yesu,
6 kuti monse pamozi komasoti mokatijana, mulemekeze Mulungu, Atata ŵa Ambuye wasu Yesu Khilisitu.
7 Tetyo mukolondelana monga ni mwechitilondelela Khilisitu, kuti ulemelelo ulute kwa Mulungu.
8 Kulaŵila chendi, Khilisitu enkhala ntumiki wa ŵanthu ochitiwa mdulidwe kuti asimikijile kuti Mulungu ni wokhulupilika powonesha kuti malonjezo ŵechipasa Mulungu makolo ŵawo ni osimikijilika.
9 Komasoti kuti ŵanthu amitundu iyakine alemekeze Mulungu chifukwa cha chifundo chake, mokatijana na vakunena Malemba kuti: “N’chifukwa chake nizakulemekezeni pakati pa mitundu ya ŵanthu ndipo nizaimbe nyimbo zotamanda zina yanu.”
10 Komasoti Malemba onena kuti: “Mwewo ŵanthu amitundu iyakine, kondwelani pamozi na ŵanthu ŵake.”
11 Komasoti onena kuti: “Tamandani Yehova mwewo mitundu yonse ya ŵanthu ndipo ŵanthu onse amutamande.”
12 Komasoti Yesaya enena kuti: “Pazankhale muju wa Jese, muyakine wamene akuti azapaname kuti alamulile mitundu. Chiyembekezo cha mitundu ya ŵanthu ayakine chizankhale pali yove.”
13 Mulungu wamene opeleka chiyembekezo akuyavyeni kunkhala osangalala ngako komasoti ponkhala na ntendele wonse pamumukhulupilila, kuti munkhale na chiyembekezo champhamvu moyavyiwa na mzimu utuŵa.
14 Akwasu, newo nukaikilalini kuti nimwe okonzeka kuchita viweme, muziŵa vinyinji komasoti mungakwanishe kulangizana.
15 Koma olo n’tetyo, nakulembelani mfundo ziyakine mosapita mmbali kuti nikukumbushenisoti. Nachita vamene ivi chifukwa cha kuwama ntima kukulu kwawaniwonesha Mulungu.
16 Eniwonesha kuwama ntima kwamene uku kuti nikate ntchito yolengeza uthenga uweme wa Mulungu monga wantchito wa Khilisitu Yesu, wotumikila ŵanthu a mitundu iyakine. Nukata ntchito yopatulika yamene iyi, kuti ŵanthu a mitundu iyakine amene aŵa ankhale monga ni nsembe yovomelejeka kwa Mulungu yamene yatuŵishiwa na mzimu utuŵa.
17 Tetyo nukondwela kunkhala wophunzila wa Khilisitu Yesu komasoti kukata ntchito ya Mulungu.
18 Nizalaŵilelini chilichonse chanachita paneka, koma tyala vala vawachita Khilisitu komasoti kulaŵila kupitila muli newo kuti niyavye ŵanthu amitundu iyakine kunkhala omvwila.
19 Ove ankhala omvwila chifukwa cha vodabwisa vamphamvu komasoti vizindikilo vawachita mzimu wa Mulungu. Tetyo nalalikila mokwanila uthenga uweme unena za Khilisitu kuyambila ku Yelusalemu mpaka ku Iluliko.
20 Pochita vamene ivi nisimikija ntima kuti osati nilengeze uthenga uweme kumalo amene ŵanthu enzeziŵa kale za Khilisitu, na cholinga chakuti osati nimange pa fandeshoni ya munthu muyakine,
21 koma nichite mokatijana na vakunena Malemba kuti: “Wamene aliye ujiweko za yove azamuwone, ndipo wamene aliye umvwe azaziŵe.”
22 N’chifukwa chakesoti nenzekwanishalini kuwela uko kwanu.
23 Koma lomba paliyesoti gawo yanikaliye fwikako mmadela amene aŵa, ndipo kwa vyaka vinyinji* nankhala wofunishisha kufwika kwamene uko kwanu.
24 Tetyo nukhulupilila kuti pakuzaluta ku Sipaniya nizawonane namwe ndipo nikazatandala namwe kwa kanthawe muzanipelekeje pa ulwendo wangu wamene uyo.
25 Koma pali lomba, nasala patontho kuluta ku Yelusalemu kuyatumikila atuŵa.
26 Akwasu aku Makedoniya na aku Akaya apeleka mosangalala mphaso kuli atuŵa ayakine aku Yelusalemu amene ni osauka.
27 N’chendi kuti achita vamene ivo mwakufuna kwawo, koma olo n’tetyo ove enze na nkhongole kuli atuŵa amene awo. Chifukwa keno ŵanthu amitundu iyakine alondelako vinthu vauzimu kufumila kuli atuŵa amene awo, niyekuti nawosoti ofunikila kutumikila atuŵa amene awo kuŵapasa vinthu vofunika pa moyo.
28 Tetyo nikayasilija kuŵapasa mphaso zamene izi, nizapitile na kwamene uko kwanu poluta ku Sipaniya.
29 Komasoti nuziŵa kuti nikazafwika kwamene uko kwanu nizakuleteleni madaliso anyinji ofumila kwa Khilisitu.
30 Tetyo akwasu nukusengani kupitila muli Ambuye wasu Yesu Khilisitu komasoti mu chikondi cha mzimu utuŵa, kuti mukolimbikila kunipemphelela kwa Mulungu ndipo nanesoti nulimbikila kupemphela.
31 Tilimbikile kupemphela kuti nikapulumushiwe kuli ŵanthu osakhulupilila aku Yudeya komasoti kuti atuŵa aku Yelusalemu akalondele luweme mphaso yanatakula.
32 Keno Mulungu angalole, nizawele kuli mwewo mokondwela ndipo tizatang’ishane.
33 Mulungu wamene opeleka ntendele ankhale namwe monse. Ame.
Malizu a m'nyansi
^ Mabaibolo ayakine onena kuti: “voŵelengeka.”
