Kuli Aloma 16:1-27
16 Nufuna kukuziŵishani za kalongosi wasu Febi, wamene otumikila mu mpingo waku Kenkeleya.
2 Mulondeleni mwa Ambuye monga ni mwamulondelela atuŵa amene awo komasoti kumupasa thandizo iliyonse yangafunikile. Chifukwa nayesoti eteteza akwasu anyinji, kupamikijapo newo.
3 Munipelekele moni kuli Pulisika na Akula, antchito ayangu potumikila Khilisitu Yesu.
4 Ove eika miyoyo yawo pa ngozi chifukwa cha newo, ndipo ni newolini neka nuŵatembeja, koma mipingo yonse ya ŵanthu amitundu iyakine yuŵatembejasoti.
5 Nupelekasoti moni ku mpingo wamene usonkhana m’ng’anda mwawo. Moni kuli munthu wanukonda Epeneto wamene ni chitwazi choyambilila cha Khilisitu ku Asia.
6 Moni kuli Maliya, wamene wachita vinthu vinyinji pokuyavyani.
7 Moni kuli Anduloniko na Yuniya, amene ni enekwangu komasoti adjeli ayangu. Amene aŵa ni analume oziŵika ngako kuli atumwi komasoti ankhala okatijana na Khilisitu kwa nthawe itali kupambana newo.
8 Munipelekele moni kuli Ampiliyato, munthu wanukonda mwa Ambuye.
9 Moni kuli Ulibano wantchito muyasu mwa Khilisitu komasoti wapantima pangu Sitaku.
10 Moni kuli Apele, wokhulupilika mwa Khilisitu. Moni kuli ŵanthu a m’banja ya Alisitobulo.
11 Moni kuli nkwangu Helodiyano. Moni kuli ŵanthu a m’banja ya Nalikiso amene ni ophunzila ŵa Ambuye.
12 Moni kuli Tulufena na Tulufosa, anakazi okata ntchito mwakhama potumikila Ambuye. Moni kuli Pelesida, wapantima pasu. Mwanakazi wamene uyu wakata ntchito mwakhama potumikila Ambuye.
13 Moni kuli Lufu, wosankhiwa mwa Ambuye. Monisoti kuli amayi ŵake amenesoti ni amayi ŵangu.
14 Moni kuli Asunkilito, Felego, Heme, Pateloba, Helemase komasoti akwasu ŵali nawo pamozi.
15 Moni kuli Filologo na Yuliya, Neleya na mulongosi wake komasoti Olumpa na atuŵa onse ŵali nawo pamozi.
16 Mupasane moni mwachikondi. Mipingo yonse ya Khilisitu yupeleka moni.
17 Lomba nukulimbikisani akwasu, musamale na ŵala oyaŵanisha ŵanthu komasoti kuchita vinthu vokhumudwisha ayakine. Vamene ivi ni vosiyana na vemwiphunzila, tetyo mukoŵapewa.
18 Chifukwa ŵanthu otetyo amene awo ni akapololini ŵa Ambuye wasu Khilisitu, koma a maluvumo ŵawo. Ndipo okatishila ntchito mawu okopa komasoti achinyengo kuti asemphe ŵanthu ochita chilungamo.
19 Ŵanthu onse oziŵa kuti nimwe omvwila ndipo nukondwela namwe chifukwa cha vamene ivi. Koma nufuna kuti munkhale anzelu pa vinthu viweme koma asaziŵa kanthu pa vinthu viipa.
20 Mulungu wamene opeleka ntendele afwaye Satana pansi pa mendo ŵanu lombapano. Kuwama ntima kukulu kwa Ambuye wasu Yesu kunkhale namwe.
21 Wantchito muyangu Timoteyo opeleka moni, chimozi-mozisoti Lukiyo, Yasoni na Sosipato amene ni enekwangu.
22 Newo Telitiyo, wamene nalemba kalata yamene iyi, nikuti moni mwa Ambuye.
23 Gayo, wamene nunkhala kung’anda kwawo wamenesoti mpingo usonkhana kung’anda kwawo, opeleka moni. Nayesoti Elasito opanamila tauni, na Kwalito nkwake opeleka moni.
24 ——
25 Mulungu angakutang’isheni pokatishila ntchito uthenga uweme wanulengeza komasoti uthenga unena za Yesu Khilisitu ulalikiliwa. Uthenga wamene uyu ni wokatijana na vaululiwa vokhuza chisinsi chopatulika chamene chankhala chofisika kwa nthawe itali.
26 Koma lomba chisinsi chamene ichi chaululiwa ndipo ŵanthu amitundu yonse achiziŵa kupitila m’Malemba aulosi. Vamene ivi n’vokatijana na lamulo ya Mulungu wamene ankhaleko mpaka kale-kale. Cholinga chake n’chakuti ŵanthu amitundu yonse akomumvwila mwa chikhulupililo.
27 Kuli Mulungu wanzelu yeka wamene uyo, kunkhale ulemelelo mpaka kale-kale kupitila mwa Yesu Khilisitu. Ame.
