Kuli Aloma 2:1-29
2 Tetyo keno niwe ŵani, keno uweluza ayakine uliye chifukwa chomvwika choliwoneshela kuti niwe wolungama. Pakuti ukoweluza ayakine, unkhala kuti ulishusha weka, chifukwa nawesoti uchita vamene ivo.
2 Tuziŵa kuti Mulungu akoweluza ŵanthu amene ochita vamene ivi kuti owamila kulondela chilango, oŵaweluza mokatijana na choonadi.
3 Koma wewo ukoweluzasoti ŵanthu ochita vinthu vauchita wewo, kansi uganiza kuti uzapewe chiweluzo cha Mulungu?
4 Kansi uziŵalini kuti Mulungu okuwonesha kuwama ntima kwake kukulu, kusakalipa kamangu komasoti kuleza ntima na cholinga chakuti ulape?
5 Koma chifukwa chakuti ufunalini kuchinja, ndipo uwonesha ntima wosalapa, kulaŵila chendi Mulungu azakulange pa nsiku ya ukali wake pati azaulule chiweluzo chake cholungama.
6 Yove azaweluze aliyense mokatijana na vochita vake.
7 Azapeleke moyo wosasila kuli ŵanthu amene opitilija mphela kuchita viweme. Ŵanthu amene aŵa oyeja-yeja kufwana ulemelelo, ulemu na moyo usawonongeka.
8 Koma ŵanthu okonda mikangano, okonkhejalini choonadi komasoti ochita vinthu viliye chilungamo, Mulungu azaŵawoneshe ukali wake.
9 Munthu aliyense ochita viipa, olo ankhale Muyuda olo Mugiliki, azakumane na mavuto komasoti voŵaŵa.
10 Koma aliyense ochita viweme azalondele ulemelelo, ulemu na ntendele, choyamba Muyuda pavuli pake Mugiliki.
11 Chifukwa Mulungu aliye sankho.
12 Ŵanthu onse amene echimwa asaziwa Chilamulo, azafwe asaziŵa Chilamulo. Koma onse amene echimwa oziŵa Chilamulo, azaweluziwe mokatijana na Chilamulo chamene icho.
13 Pala ŵanthu akumvwa tyala Chilamulo, Mulungu oŵawonalini kuti ni olungama koma amene okonkheja Chilamulo niye akuti azawonewe kuti ni olungama.
14 Ŵanthu amitundu iyakine aliye Chilamulo. Koma akochita mwachibadwa vinthu vili mu Chilamulo, olo kuti aliye Chilamulo, owonesha kuti ali na Chilamulo mu ntima mwawo.
15 Amene aŵa owonesha kuti mfundo za m’Chilamulo zilembewa mmitima mwawo ndipo chikumbuntima chawo chuŵachitila umboni. Ŵanthu amene aŵa maganizo ŵawo oŵashusha olosoti kuŵavomekeja.
16 Vamene ivi vizawonekele pa nsiku yamene Mulungu kupitila muli Khilisitu Yesu, azaweluze vinthu vachisinsi vakuchita ŵanthu komasoti kuganiza. Ndipo azaweluze mokatijana na uthenga uweme wanulalikila.
17 Mwewo mwayakine muliita kuti nimwe Ayuda, mudalila Chilamulo komasoti mulitumba kuti muli pa ushamwali na Mulungu.
18 Muziŵa vakufuna Mulungu komasoti mukondwela na vinthu viweme ngako komasoti chifukwa mwiphunzisiwa Chilamulo.
19 Mukhulupilila kuti mungakwanishe kusogolela ŵanthu asalola komasoti kusanikila ŵanthu ali mu mfinzi.
20 Muganiza kuti mungakwanishe kuyondolola ŵanthu aliye nzelu. Muganizasoti kuti mungakwanishe kuphunzisa ŵana chifukwa mumvwisha komasoti kuziŵa choonadi chupezeka m’Chilamulo.
21 Kansi wewo uphunzisa ayako, ndaŵa yanji uliphunzisalini weka? Ulalikila kuti, “Osaiŵa,” lomba nawesoti uiŵa?
22 Wewo wamene unena kuti, “Osachita chigololo,” kansi uchitasoti chigololo? Wewo wamene ulaŵila vuwonesha kuti unyansiwa na mafano, lomba uiŵasoti vamukachisi?
23 Wewo umekela Chilamulo, kansi unyozasoti Mulungu pofwaya Chilamulo?
24 “Zina ya Mulungu yunyozewa pakati pa ŵanthu amitundu chifukwa cha mwewo,” monga ni mwakunenela Malemba.
25 Mdulidwe uli na pindu peka-peka keno wewo ukonkheja Chilamulo. Koma keno ufwaya Chilamulo, mdulidwe wako uliye ntchito.
26 Tetyo keno munthu aliyechite mdulidwe okonkheja mfundo zolungama za m’Chilamulo, kusachitiwa mdulidwe kwake kuzawonewe monga ni mdulidwe, kansi n’tetyolini?
27 Munthu wamene aliyechite mdulidwe akokonkheja mfundo za m’Chilamulo, azakuweluze. Azakuweluze wewo wamene ufwaya Chilamulo olo kuti uli na malamulo olembewa komasoti ulichitiwe mdulidwe.
28 Munthu wamene ni Muyuda kunja kweka, ni Muyudalini, ndipo mdulidwe wakunja kweka wochitiwa pa muŵili, ni mdulidwelini.
29 Kunkhala Muyuda ngaye-ngaye kuli muntima ndipo mdulidwe wake unkhalasoti wamuntima wochitiwa na mzimu, osati na malamulo olembewa. Munthu wotetyo otamandiwa na Mulungu, osati ŵanthu.