Kuli Aloma 3:1-31
3 Kansi kunkhala Muyuda kuli na ubwino wotyani, olo pindu ya mdulidwe ni chinji?
2 Ubwino wake ni unyinji. Choyamba, mawu opatulika a Mulungu eikiwa mmanja mwa Ayuda.
3 Lomba tyani keno ayakine enze osakhulupilika? Kansi kusoŵa chikhulupililo kwawo kwamene uko kutanthauza kuti nayesoti Mulungu ni wosakhulupilika?
4 Yayi. Olo munthu aliyense angankhale wawenye, Mulungu angapezeke mphela kuti olaŵila vachendi mokatijana na vakunena Malemba kuti: “Mukolaŵila, mulaŵila vachilungamo kuti muwine pakukuweluzani.”
5 Koma lomba keno kusalungama kwasu kuwonesha luweme kuti Mulungu ni wolungama, lomba tinganene kuti tyani? Kansi tinganene kuti Mulungu ni wosalungama akowonesha ukali wake? (Nulaŵila monga ni mwakulaŵilila ŵanthu ayakine.)
6 Yayi! Lomba Mulungu akaleka kuchita tetyo, chalo azachiweluze tyani?
7 Koma keno chifukwa cha wenye wangu choonadi cha Mulungu chawonekela ngako ndipo vamene ivo vamuletela ulemelelo, ndaŵa yanji nuweluziwa monga munthu wochimwa?
8 Nilekelenji kulaŵila vala vakutiyopejela ŵanthu ayakine kuti tulaŵila vakuti: “Tiyeni tichite viipa kuti pankhale vinthu viweme”? Ŵanthu olaŵila vamene ivi azaweluziwe mokatijana na chilungamo.
9 Lomba kansi vikankhala tetyo, sewo Ayuda tili paweme kupambana ayakine? Yayi n’tetyolini. Chifukwa monga ni mwatanenela kale, Ayuda komasoti Agiliki, onse olamuliliwa na uchimo.
10 Mokatijana na vakunena Malemba kuti: “Paliye munthu wolungama olo yumo.
11 Paliye wamene oziŵa vinthu olo patontho komasoti paliye wamene oyeja-yeja kusakila Mulungu.
12 Ŵanthu onse apatuka, ndipo onse ankhala atyala-tyala. Paliyeletu olo yumo wamene owonesha kuwama ntima.”
13 “Mawu ŵakulaŵila opaya. Ove olaŵila vachinyengo na lilimi yawo.” “Mmilomo yawo muli ndulu ya njoka.”
14 “Ndipo nkamwa mwawo mwazula matembelelo na mawu oŵaŵa.”
15 “Mendo ŵawo outukila kuyacheka milopa.”
16 “Vonse vakuchita vunkhala vowononga komasoti voleta mavuto,
17 ndipo njila ya ntendele oiziŵalini.”
18 “Menso ŵawo owonalini chifukwa choyopela Mulungu.”
19 Tuziŵa kuti vinthu vonse vachunena Chilamulo vukata ntchito kuli ŵala okonkheja Chilamulo. Cholinga chake nikuchitisha ŵanthu kuti asoŵe chotalijila wenye komasoti kuwonesha kuti chalo chonse chili na mulandu pamenso pa Mulungu ndipo chufunikila kulondela chilango.
20 Tetyo paliye munthu owonewa kuti niwolungama na Mulungu chifukwa chokonkheja Chilamulo, pakuti Chilamulo chutiyavya kuziŵa luweme uchimo.
21 Koma lomba, vaziŵika kuti munthu angakwanishe kunkhala wolungama kwa Mulungu paliye kukonkheja Chilamulo. Vamene ivi vitomolewasoti m’Chilamulo komasoti vechilemba aneneli.
22 Kuwonewa kuti ni wolungama na Mulungu kwamene uku, kungakwanishike kuli onse amene owonesha kuti okhulupilila Yesu Khilisitu chifukwa paliye kusiyana.
23 Pakuti ŵanthu onse ni ochimwa ndipo okangiwa kuwonesha luweme ulemelelo wa Mulungu.
24 Ndipo kuwonewa kuti ni olungama chifukwa cha kuwama ntima kwake kukulu kwamene wakuwonesha poŵamasula na dipo yolipiliwa na Khilisitu Yesu, kuli monga ni mphaso yamahala.
25 Mulungu emupeleka monga nsembe yakuti ŵanthu akatijanesoti na Mulungu wamene uyo pokhulupilila milopa yake. Echita vamene ivi pofuna kuwonesha chilungamo chake chifukwa ewonesha kuti okalipalini kamangu pokhululuka machimo echitika kale.
26 Echita vamene ivi kuti awoneshe chilungamo chake pali ino nthawe pakuti munthu wamene okhulupilila Yesu ni wolungama.
27 Tetyo, kansi pamene apa palisoti chifukwa cholichitisha kulitumba? Paliyeletu. Kansi tingolitumba chifukwa chokonkheja Chilamulo? Yayi n’tetyolini, koma chifukwa chokonkheja lamulo yachikhulupililo.
28 Tawona kuti munthu onkhala wolungama mwachikhulupililo, osati pokonkheja Chilamulo.
29 Payakine kansi yove ni Mulungu wa Ayuda ŵeka? Kansi ni Mulungulini wa ŵanthu amitundu iyakinesoti? Eye, yove ni Mulungusoti wa ŵanthu amitundu iyakine.
30 Pakuti Mulungu ni mmozi, yove azawone kuti ŵanthu alichite mdulidwe ni olungama chifukwa cha chikhulupililo chawo. Azawonesoti kuti ŵanthu aliyechite mdulidwe ni olungama chifukwa cha chikhulupililo chawo.
31 Kansi pamene apa tusilija Chilamulo mwa chikhulupililo chasu? Yayi! Mmalo mwake, tulimbikisa Chilamulo.
