Kuli Aloma 5:1-21
5 Pakuti lomba tuwonewa kuti nise olungama chifukwa chonkhala na chikhulupililo tingakwanishe kunkhala pa ntendele* na Mulungu kupitila muli Ambuye wasu Yesu Khilisitu.
2 Kukhulupilila Yesu kutiyavya kuti tikokwanisha kufwika kwa Mulungu komasoti kuti tikosangalala na kuwama ntima kwake kukulu. Ndipo tingakwanishe kusangalala* chifukwa tili na chiyembekezo cholondela ulemelelo wa Mulungu.
3 Niivilini veka, koma tingakwanishesoti kunkhala osangalala* tikakumana na mavuto chifukwa tuziŵa kuti mavuto ŵasu ochitisha kuti tipilile.
4 Kupilila kuchitisha kuti tinkhale ovomelejeka kwa Mulungu ndipo kunkhala wovomelejeka kwa Mulungu kuchitisha kuti tinkhale na chiyembekezo.
5 Chiyembekezo chamene icho chutikalipishalini chifukwa Mulungu owonesha kuti otikonda pokatishila ntchito mzimu utuŵa wakutipasa.
6 Petenzeve chimuti chokata,* Khilisitu efwila ŵanthu asalambila Mulungu pa nthawe yechikonzelatu.
7 Chifukwa n’vovuta kuti munthu muyakine afwile munthu wolungama. Koma payakine munthu angatang’e ntima kufwila munthu muweme.
8 Koma Mulungu otiwonesha chikondi chake, chifukwa petenze ochimwa Khilisitu etifwila.
9 Komasoti azachite vopambana pamene apa potipulumusha ku ukali wake kupitila muli Khilisitu pakuti tuwonewa kuti nise olungama chifukwa cha milopa ya Khilisitu wamene uyo.
10 Olo kuti tenze adani a Mulungu tinkhala azishamwali ŵake kupitila mu imfwa ya Mwana wake, ivi vachitisha kuti tinkhale osimikijila ngako kuti tizapulumushiwe na moyo wa Yesu pakuti lomba nise azishamwali a Mulungu.
11 Ndipo ni ivilini veka, koma tusangalalasoti chifukwa cha ushamwali wasu na Mulungu kupitila muli Ambuye wasu Yesu Khilisitu, wamene wachitisha kuti tinkhale okatijana na Mulungu kupitila muli yove.
12 Uchimo wiloŵa m’chalo kupitila muli munthu mmozi ndipo uchimo wamene uyo wileta imfwa. Tetyo imfwa yamene iyo ifalikila kuli ŵanthu onse chifukwa onse echimwa . . .
13 Chilamulo chikaliyewela, uchimo wenzemo kale m’chalo, koma munthu angafwaniwelini na mulandu kuti wachita chimo keno paliye lamulo.
14 Olo vili tetyo, imfwa ilamulila monga mfumu kufumila mu nthawe ya Adamu mpaka ya Mose, olosoti kuli ŵanthu amene aliyechimwe monga ni mwechichimwila Adamu wamene ni wolingana na wala enzekuza.
15 Koma monga mwavilili na mphaso yamene iyi, niyelini mwevenzele na uchimo wamene uyo. Ŵanthu anyinji echifwa chifukwa cha uchimo wa munthu mmozi. Koma kuwama ntima kukulu kwa Mulungu komasoti mphaso yake yamahala yechipeleka mowama ntima kupitila muli munthu mmozi, Yesu Khilisitu, n’vapalulu ngako. Pokatishila ntchito mphaso yamene iyi, Mulungu azapeleke madaliso anyinji kuli ŵanthu anyinji.
16 Pali kusiyanasoti pakati pa mphaso yamahala yamene iyi na mwevichitikila vinthu kupitila muli munthu mmozi wamene echimwa. Chiweluzo cha chimo imozi yala, chileta uchimo kuli onse, koma mphaso ipelekewa chifukwa cha machimo anyinji, ichitisha kuti ŵanthu akowonewa kuti ni olungama.
17 Imfwa ilamulila monga mfumu chifukwa cha uchimo wa munthu mmozi wamene uyo. Koma ŵanthu amene alondela kuwama ntima kukulu kwa Mulungu komasoti mphaso yake yamahala ya chilungamo azankhale na moyo kuti alamulile monga mafumu kupitila muli munthu mmozi wamene uyu, Yesu Khilisitu.
18 Tetyo monga mwevinkhalila kuti uchimo umozi wichitisha kuti ŵanthu osiyana-siyana aweluziwe kuti ni ochimwa, kuchita chinthu chimozi cholungama kwachitishasoti kuti ŵanthu osiyana-siyana awonewe kuti ni olungama kuti ankhale na moyo.
19 Pakuti kusamvwila kwa munthu mmozi wamene uyo kwichitisha kuti ŵanthu anyinji ankhale ochimwa, kumvwila kwa munthu mmozi wamene uyu kuzachitishesoti kuti anyinji ankhale olungama.
20 Chilamulo chipelekewa kuti kuchimwa kwa ŵanthu kuwonekele. Koma uchimo pewiwonekela, kuwama ntima kukulu kwa Mulungu kwiyangijilikasoti ngako.
21 Ndaŵa yanji? Kuti monga mweulamulila uchimo monga mfumu pamozi na imfwa, nakosoti kuwama ntima kukulu kulamulile monga mfumu kupitila mu chilungamo. Ndipo vamene ivi vizachitishe kuti ŵanthu afwane moyo wosasila kupitila muli Yesu Khilisitu Ambuye wasu.
Malizu a m'nyansi
^ Mabaibolo ayakine onena kuti, “tili na ntendele.”
^ Mabaibolo ayakine onena kuti, “tusangalala.”
^ Mabaibolo ayakine onena kuti, “tusangalala.”
^ Mu Chigiliki, “petenze ofoka.”