Kuli Aloma 6:1-23
6 Lomba tinene kuti chinji? Kansi tipitilije kuchimwa kuti kuwama ntima kukulu kuyangijilike?
2 Yayi n’tetyolini. Pakuti tichifwa ku uchimo, lomba tipitilije kuchimwa ndaŵa yanji?
3 Payakine muziŵalini kuti tonse tibatiziwa ndipo lomba nise okatijana na Khilisitu Yesu tibatiziwasoti pa imfwa yake?
4 Tetyo tiikiwa naye pamozi mmanda pa imfwa yake petibatiziwa, kuti molingana na Khilisitu wameme eushiwa kupitila mu ulemelelo wa Atata ŵake, nasesoti tinkhale moyo wanyowani.
5 Chifukwa keno takatijana naye pakufwa imfwa yolingana na yake, kulaŵila chendi tizakatijane nayesoti poushiwa molingana na yove.
6 Chifukwa tuziŵa kuti umunthu wasu wakale wipanyikiwa naye pamozi pachimuti nacholinga chakuti muŵili wasu wauchimo unkhale uliye mphamvu, kuti osati tinkhalesoti akapolo a uchimo.
7 Chifukwa munthu akafwa onkhalalinisoti na mulandu* wa machimo ŵake.
8 Komasoti keno tichifwa pamozi na Khilisitu, tukhulupilila kuti tizankhalesoti na moyo pamozi na yove.
9 Pakuti tuziŵa kuti Khilisitu waushiwa, azafwelinisoti ndipo imfwa yumulamulilalini soti monga mfumu.
10 Yove echifwa kuti achose uchimo kamozi tyala, ndipo moyo walinawo lomba ali nawo, kuti akochita vakufuna Mulungu.
11 Namwesoti mukoliwona monga nimwe akufwa pa nkhani ya uchimo, koma amoyo kwa Mulungu mwa Khilisitu Yesu.
12 Tetyo osati mulole kuti uchimo upitilije kulamulila monga ni mfumu mmiŵili yanu yakuti ingafwe kuti mukokonkheja vilakolako va miŵili yanu.
13 Ndipo osati mupeleke miŵili* yanu ku uchimo kuti inkhale visulo vochitila vinthu viliye chilungamo, koma lipelekeni kwa Mulungu monga ŵanthu eushiwa. Miŵili yanusoti muipeleke kwa Mulungu monga visulo vochitila chilungamo.
14 Uchimo osati ukokulamulilani monga ni mfumu, chifukwa mukonkhejalini Chilamulo, koma musangalala na kuwama ntima kukulu kwa Mulungu.
15 Kansi vikankhala teti niye kuti tikochita chimo chifukwa chakuti tukonkhejalini Chilamulo koma tusangalala na kuwama ntima kukulu? Yayi n’tetyolini.
16 Kansi mwewo muziŵalini kuti mukolipeleka kuli munthu muyakine monga antchito omvwila munkhala akapolo a munthu wamene uyo wamumvwila? Munkhala akapolo a uchimo wamene usogolela ku imfwa, olo akapolo akumvwila kwamene kusogolela ku chilungamo.
17 Koma tutembeja Mulungu kuti olo kuti poyamba mwenze akapolo a uchimo, mwimvwila kufumila pansi pa ntima mfundo za nyowani zemwiphunzisiwa.
18 N’chendi, pakuti mwimasuliwa ku uchimo, mwinkhala akapolo a chilungamo.
19 Nulaŵila monga munthu chifukwa cha kufoka kwa miŵili yanu. Monga ni mwemwichitila kupeleka vizo vanu kuti vinkhale akapolo a vinthu viipa komasoti akapolo akusamvwila malamulo na cholinga chakuti mukochita vinthu vufwaya malamulo, pelekanisoti vizo vanu kuti munkhale akapolo a chilungamo komasoti atuŵa.
20 Chifukwa pemwenze akapolo a uchimo, mwenzefunikalini kuchita vinthu vachilungamo.
21 Kansi pa nthawe yamene iyo mwenzechita vinthu votyani? Venze vinthu vamene palipano muchita navo nsoni. Ndipo mapeto a vinthu vamene ivo ni imfwa.
22 Koma lomba chifukwa chakuti mwimasuliwa ku uchimo nonkhala akapolo a Mulungu, muchita vinthu vituŵa ndipo posilijila pake muzankhale na moyo wosasila.
23 Chifukwa malipilo a uchimo ni imfwa koma mphaso yakupeleka Mulungu ni moyo wosasila kupitila muli Khilisitu Yesu Ambuye wasu.
