Kuli Aloma 7:1-25
7 Nulaŵila na mwewo akwasu, amene muziŵa Chilamulo. Kansi muziŵalini kuti Chilamulo chunkhala na mphamvu pali munthu pa nthawe yamene munthu wamene uyo pali na moyo?
2 Mwachisanzo, mwanakazi wolunguliwa onkhala womangika kuli mwanalume wake mwalamulo pa nthawe yamene mwanalume wamene uyo pali na moyo. Koma mwanalume wamene uyo akamwalila, mwanakazi onkhala womasuka ku lamulo yokhuza mwanalume wake.
3 Keno mwanakazi wamene uyo angalunguliwe na mwanalume muyakine, mwanalume wake ali moyo, niye kuti wachita chigololo. Koma keno mwanalume wake wamwalila, mwanakazi wamene uyo wamasuka ku lamulo yokhuza mwanalume wake, tetyo aliyechite chigololo keno angalunguliwe na mwanalume muyakine.
4 Akwasu, muŵili wa Khilisitu wekumasulani ku Chilamulo, kuti munkhale ŵanthu a munthu muyakine wamene eushiwa na cholinga chakuti titwale vitwazi kwa Mulungu.
5 Chifukwa petenzenkhala mokatijana na miŵili yasu yamene iyi, Chilamulo chechitisha kuti vilakolako va uchimo vetenze navo mmiŵili* yasu viwonekele. Ndipo vilakolako vamene ivi sembe vitiletela imfwa.
6 Koma lomba tamasuliwa ku Chilamulo, chifukwa tafwa ku Chilamulo chenzetimanga kuti tinkhale akapolo mu njila yanyowani mosogolelewa na mzimu, osati mu njila yakale mosogolelewa na malamulo ochita lembewa.
7 Lomba tinene kuti chinji? Kansi Chilamulo ni uchimo? Yayi n’tetyolini. Kulaŵila chendi, sembe niliyeziŵe uchimo kuti kwenzeve Chilamulo. Mwachisanzo, sembe niliyeziŵe kuti ni kuphoniya kukumbwila chinthu chanaŵene kuti Chilamulo chiliyenene kuti: “Osakumbwila chinthu chanaŵene.”
8 Koma chifukwa cha lamulo, uchimo winifwana mu njila yakuti winichitisha kunkhala na ntima wokumbwila vinthu vanaŵene mu njila iipa. Chifukwa kusoŵa Chilamulo uchimo wenzeve mphamvu.*
9 Chilamulo chikaliyepelekewa nenze wamoyo. Koma Chilamulo pechifwika, uchimo winkhalasoti na moyo, koma newo nechifwa.
10 Ndipo lamulo yenzefunika kunisogolela kuti nifwane moyo, inisogolela ku imfwa.
11 Uchimo wekatishila ntchito lamulo yamene iyi poninyengelela ndipo winipaya.
12 Tetyo Chilamulo pacheka n’chituŵa ndipo malamulo ni atuŵa, olungama komasoti aweme.
13 Kansi vamene ivi vutanthauza kuti chinthu chiweme chechitisha kuti nifwe? Yayi. Uchimo niye wichitisha kuti nifwe. Chilamulo n’chiweme koma tyala chichingochitisha kuti viziŵike luweme kuti uchimo uchitisha kuti nifwe. Tetyo malamulo otiyavya kuziŵa kuti uchimo ni uipa ngako.
14 Chifukwa tuziŵa kuti Chilamulo n’chofumila kwa Mulungu kupitila muli mzimu, koma newo ninelini wangwilo ndipo nigulisiwa ku uchimo.
15 Nukwanishalini kumvwisha vunichitikila. Chifukwa vala vanufuna kuchita, nuvichitalini. Koma vala vanuzondana navo niye vanuchita.
16 Koma lomba keno nufuna kuchita vanisafuna kuchita niye kuti nuvomekeja kuti Chilamulo n’chiweme.
17 Koma wamene ochita vamene ivo ninewolini, koma uchimo wamene uli na newo.
18 Umu mmuŵili wangu wochimwa muliye chilichonse chiweme. Chifukwa nufuna kuchita viweme koma nukwanishalini kuvichita.
19 Vinthu viweme vanufuna kuchita nuvichitalini, koma vinthu viipa vanisafuna kuchita niye vanuchita.
20 Lomba keno nufuna kuchita vinthu vanisafuna kuchita, niye kuti wamene ochita vamene ivo ninewolinisoti yayi, koma uchimo wamene uli nanewo.
21 Vunichitikila n’vakuti,* panufuna kuti nichite vinthu viweme, viipa vunkhala nkati mwa newo.
22 Mu ntima mwangu nukondwela ngako na malamulo a Mulungu,
23 koma nuwona lamulo iyakine mmuŵili* mwangu yuniyatana na malamulo a mmaganizo mwangu nonichitisha kunkhala kapolo wa lamulo ya uchimo yamene ili mmuŵili* mwangu.
24 Munthu womvwisha chifundo newo, niŵani akuti azanipulumushe ku muŵili wamene uyu unichitisha kuti nifwe?
25 Mulungu azanipulumushe kupitila muli Yesu Khilisitu Ambuye wasu. Tetyo mmaganizo mwangu nine kapolo wa malamulo a Mulungu, koma mmuŵili mwangu nine kapolo wa lamulo ya uchimo.
Malizu a m'nyansi
^ Mu Chigiliki, “mu vizo.”
^ Mu Chigiliki, “wenze wakufwa.”
^ Olo kuti, “Nufwana lamulo yakuti.”
^ Mu Chigiliki, “mu vizo.”
^ Mu Chigiliki, “mu vizo.”
