Kuli Aloma 8:1-39
8 Tetyo ŵanthu amene ni okatijana na Khilisitu Yesu aliye mulandu.
2 Chifukwa lamulo ya mzimu yamene yupasa moyo mokatijana na Khilisitu Yesu yakumasulani ku lamulo ya uchimo na ya imfwa.
3 Chilamulo chenzeve mphamvu yokumasulani chifukwa ŵanthu ni ofoka komasoti ochimwa. Koma kuti akumasuleni, Mulungu etumija Mwana wake ali na muŵili monga ni wa ŵanthu ochimwa kuti agonjese uchimo. Tetyo Mulungu egonjesa uchimo pokatishila ntchito muŵili.
4 Mulungu echita ivi kuti sewo amene tuyenda mokonkheja mzimu, osati mokonkheja vaufuna muŵili, tikwanilishe vinthu volungama vachufuna Chilamulo.
5 Chifukwa okonkheja vaufuna muŵili, maganizo ŵawo onse onkhala pa vinthu vamuŵili. Koma okonkheja mzimu, maganizo ŵawo onse onkhala pa vinthu va mzimu.
6 Pakuti kuganizila ngako vinthu vaufuna muŵili kuleta imfwa, koma kuganizila ngako pa vinthu va mzimu kuleta moyo na ntendele.
7 Chifukwa kuganizila ngako vinthu vaufuna muŵili kuyambisha udani na Mulungu pakuti muŵili ugonjelalini lamulo ya Mulungu, ndipo kulaŵila chendi, ungaigonjelelini.
8 Tetyo ŵala okonkheja vaufuna muŵili angakondweleshelini Mulungu.
9 Koma lomba mwewo mukonkheja mzimu osati vaufuna muŵili, keno mzimu wa Mulungu uli chendi na mwewo. Keno muyakine aliye mzimu wa Khilisitu, wamene uyu niwa Khilisitulini.
10 Koma keno nimwe okatijana na Khilisitu, mzimu uchitisha kuti munkhale na moyo chifukwa cha chilungamo olo kuti muŵili niwakufwa chifukwa cha uchimo.
11 Keno mzimu wa wala eusha Yesu uli na mwewo, yove wamene eusha Khilisitu Yesu azachitishesoti miŵili yanu yamene ingakwanishe kufwa kunkhala na moyo, pokatishila ntchito mzimu wake wamene uli na mwewo.
12 Tetyo akwasu tili na nkhongole, osati na muŵili kuti tikonkhala mokonkheja vaufuna muŵili.
13 Chifukwa keno munkhala mokonkheja vaufuna muŵili, niyekuti mosakaikila muzafwe. Koma mukalola kuti mphamvu ya mzimu ikuyavyeni kupaya vochita vamuŵili, muzankhale na moyo.
14 Onse ŵala osogolelewa na mzimu wa Mulungu, ni ŵana chendi a Mulungu.
15 Chifukwa muliyelondele mzimu wa ukapolo uyambishasoti wowa, koma mwilondela mzimu wakuti munkhale ŵana, wamene utichitisha kuŵilikija kuti: “Abba,* Atata!”
16 Mzimu wamene uyo utisimikijila kuti nise ŵana a Mulungu.
17 Tetyo keno nise ŵana, nisesoti olondela chuma kufumila kwa Mulungu. Koma nisesoti olondela chuma ayake a Khilisitu, keno tuvutika naye pamozi kuti tikalondele naye ulemelelo.
18 Nuwona kuti mavuto ŵatukumana nawo palipano ni atontho poŵalinganija na ulemelelo ukuti uzawonekele kupitila muli sewo.
19 Chifukwa chilengedwe chuyembekezela mwachidwi nthawe yaukuti uzawonekele ulemelelo wa ŵana a Mulungu.
20 Pakuti chilengedwe chiweluziwa kuti chinkhale cha tyala-tyala, osati mwakufuna kwachine koma kupitila muli wala echiweluza. Ndipo epelekasoti chiyembekezo
21 chakuti chilengedwe chamene icho chizamasuliwe ku ukapolo wa muŵili wamene uwonongeka nonkhala na ufulu wa ulemelelo wa ŵana a Mulungu.
22 Chifukwa tuziŵa kuti chilengedwe chonse chumimila pamozi komasoti kumvwa kuŵaŵa pamozi mpaka pali pano.
23 Koma lomba ni ivilini veka. Sewo amene tili na vitwazi voyambilila vamene ni mzimu, tumimila mu ntima mwasu patuyembekezela na ntima wonse kuti Mulungu atitole kunkhala ŵana ŵake, kutimasula na dipo* kuli iyi miŵili yasu.
24 Chifukwa tipulumushiwa tili na chiyembekezo chamene ichi, koma chauyembekezela chikakwanishika chunkhalalinisoti chiyembekezo. Kansi chenzeyembekezela munthu chikachitika, ochiyembekezela mphela?
25 Koma keno vatuyembekezela viliyechitike, tuyembekezela mphela mopilila.
26 Molingana na vamene ivi, mzimu utiyavya pali vala vatukangiwa kuchita. Chifukwa vuto niyakuti tuziŵalini vatufunikila kutomola popemphela, koma mzimu upapatila mmalo mwasu na madandaulo ŵatiliye kwanishe kuŵafotokoza.
27 Koma Mulungu owona pansi pa mitima, ndipo oziŵa vautanthauza mzimu, chifukwa upapatila mmalo mwa atuŵa mokatijana na vakufuna Mulungu.
28 Tuziŵa lomba kuti Mulungu okatanija vochita vake vonse pofuna kuyavya ŵala omukonda yove Mulungu, ŵanthu oitiwa mokatijana na cholinga chake.
29 Ochita tetyo chifukwa ŵala ŵechiziŵa poyamba eŵasankhilatu kuti azankhale olingana na Mwana wake, kuti Mwana wake wamene uyo ankhale woyamba kuvyalika pakati pa enekwake anyinji.
30 Komasoti amene awo ŵechisankhilatu niye ŵechiita. Amene awo ŵechiita niyesoti ŵakuwona kuti ni olungama. Ndipo ŵakuwona kuti ni olungama amene awo niyesoti ŵechipasa ulemelelo.
31 Lomba pamene apa tinene kuti tyani? Keno Mulungu ali kumbali yasu niŵani angashushane nase?
32 Pakuti aliye titane olo Mwana wake ngaye-ngaye, koma emupeleka kuti afwile sewo tonse, angakangiwe tyani kutipasa mowama ntima vinthu viyakine vonse pamozi na Mwana wake wamene uyo?
33 Niŵani angakashalile ŵanthu a Mulungu ochita sankhiwa? Pakuti Mulungu niye oŵawona kuti ni olungama,
34 niŵani angaŵashushe? Paliye. Khilisitu Yesu niye echifwa komasoti niye eushiwa. Yove ali ku kwanja ngayo ya Mulungu, ndipo otilaŵilila mopapatila.
35 Niŵani agatisiyanishe na chikondi cha Khilisitu? Kansi ni mavuto, voŵaŵa, kutamanishiwa, njala, wamba, voyofya olo chibemba?
36 Malemba onena kuti: “Chifukwa cha mwewo, tupaiwa nthawe zonse. Tankhala monga ni mbelele zikuyapaiwa.”
37 Koma tugonjesa vinthu vonse vamene ivi moyavyiwa na yove wamene etikonda.
38 Chifukwa nasimikija ntima kuti imfwa, moyo, angelo, maboma, vinthu vamene vilipo, vinthu vamene vikuza, mphamvu,
39 nsinkhu, kunoka olo cholengewa chilichonse vizakwanishelini kutisiyanisha na chikondi cha Mulungu chamene chili mwa Khilisitu Yesu Ambuye wasu.
Malizu a m'nyansi
^ Mawu a Chihebeli olo a Chialamu otanthauza “Ababa.”
^ Onani matanthauzo a mawu ayakine.
