Wilembewa na Luka 10:1-42
10 Pavuli pa vamene ivi, Ambuye esankha ŵanthu ayakine 70 noŵatumija aŵili-aŵili kuti atangule kuluta mu tauni na malo aliwonse kwenzefunika kuti yove azaluteko.
2 Lomba eŵauja kuti: “Ni chendi, pali vinthu vinyinji vofunika kuweja, koma antchito ni atontho. Tetyo sengani Munecho wa munda kuti atumije antchito kuti akaweje.
3 Nkhoyani! Newo nukutumijani monga mbelele pakati pa mphumphi.
4 Osatakula chikwama cha ndalama, kachola ka vakulya olo nsapato, ndipo osapeleka moni kuli munthu aliyense* pa njila.
5 Mukafwika pa ng’anda, choyamba mukonena kuti: ‘Ntendele unkhale pano pa ng’anda.’
6 Ndipo keno pa ng’anda pamene apo pali munthu okonda ntendele, ntendele wanu unkhale pali yove. Koma keno paliye, ujokele kuli mwewo.
7 Tetyo mukonkhala m’ng’anda yamene iyo, ndipo mukokulya na kumwa vangakupaseni, chifukwa wantchito ofunikila kulondela malipilo ŵake. Osafumako kwamene uko kwamwafwikila noluta ku ng’anda ziyakine.
8 Komasoti mukaloŵa mu tauni ndipo ove nokulondelani, mukokulya vakukonzelani,
9 mukopojekasoti olwala ali mwamene umo komasoti mukoŵauja kuti: ‘Ufumu wa Mulungu wakuvwendelani.’
10 Koma mukaloŵa mu tauni yamene aliye kulondeleni luweme, mukofumamo noluta mmisewu yawo nonena kuti:
11 ‘Tukukunkhumulilani olo lukungu ya muno m’tauni mwanu yamene yakangamila ku mendo kwasu. Koma olo n’tetyo ziŵani kuti Ufumu wa Mulungu wavwendela.’
12 Nukuujani, chilango cha tauni yamene iyo chizankhale choŵaŵa ngako pa nsiku yamene iyo kupambana cha Sodomu.
13 Soka kuli wewo Kolazini! Soka kuli wewo Besaida! Chifukwa ntchito zamphamvu zichitika muli wewo kuti zichitika ku Tulo na ku Sidoni, ŵanthu sembe elapa kale-kale, novwala masaka nonkhala pa mulota.
14 Tetyo chilango chanu pachiweluzo chizankhale choŵaŵa ngako kupambana cha Tulo na Sidoni.
15 Nawesoti Kapelenawo, kansi payakine uzakwejewe kululu? Yayi, koma uzalute ku Manda.*
16 Wamene okumvwilani, omvwilasoti newo. Wamene onyalanyaza mwewo, onyalanyazasoti newo ndipo wamene onyalanyaza newo, onyalanyazasoti Mulungu wamene enituma.”
17 Pavuli pake ŵanthu ŵala okwana 70 ejokela osangalala ndipo euja Yesu kuti: “Ambuye olo viŵanda venzetimvwila tikakatishila ntchito zina yanu.”
18 Pechimvwa vamene ivo yove eŵauja kuti: “Nayamba kale kuwona Satana alipone monga ni mokachitila kaleza kufumila kululu.
19 Onani! Newo nakupasani ulamulilo kuti mukokwanisha kukanda-kanda njoka na vimbambalija. Komasoti nakupasani ulamulilo kuti mugonjese mphamvu zonse za mdani, ndipo paliye chikuti chizakuwonongeni.
20 Koma lomba osati musangalale chifukwa chakuti mizimu yakumvwilani, koma sangalalani chifukwa mazina ŵanu alembewa kululu.”
21 Pa nthawe yamene iyo Yesu esangalala ngako mwa mzimu utuŵa nonena kuti: “Nukutamandani mwewo Atata pamenso pa onse. Ambuye akululu na pano chalo, chifukwa ŵanthu anzelu na oziŵa vinthu mwaŵafisila mosamala vinthu vamene ivi ndipo mwaviulula kuli ŵana atontho. Ni chendi Atata, chifukwa mwewo mwivomekeja kuti vamene ivi vichitike.
22 Atata apeleka vinthu vonse kuli newo ndipo paliye omuziŵa luweme Mwana koma Atata ŵeka. Komasoti paliye oŵaziŵa luweme Atata koma Mwana yeka na aliyense wamene Mwana wamene uyo wafuna kumuululila za Atata amene awo.”
23 Lomba Yesu na ophunzila ŵake amene awo ali kwa ŵeka, eŵauja kuti: “Osangalala ni ŵanthu amene owona vamene ivi vamuwona mwewo.
24 Chifukwa shuwa nukuujani, aneneli anyinji komasoti mafumu enzefunishisha kuti awone vinthu vamene ivi vamuwona mwewo koma aliye viwone, komasoti kuti amvwe vinthu vamene ivi vamukumvwa mwewo koma aliye vimvwe.”
25 Pavuli pake munthu muyakine woziŵa Chilamulo epanama kuti amuyese ndipo emukonsha kuti: “Mphunzisi, nikochita chinji kuti nikafwane moyo wosasila?”
26 Yesu emukonsha kuti: “Kansi mu Chilamulo elembamo chinji? Uŵelengamo votyani?”
27 Yove eyankha kuti: “‘Mukokonda Yehova Mulungu wanu na ntima wanu wonse, moyo wanu wonse, mphamvu zanu zonse na maganizo ŵanu onse.’ Komasoti ‘ukokonda muyako monga ni mwaulikondela weka’”
28 Yesu emuuja kuti: “Wayankha luweme. Ukochita vamene ivo ndipo uzafwane moyo.”
29 Koma pofuna kuliwoneshela kuti ni wolungama, munthu wamene uyo ekonsha Yesu kuti: “Lomba muyangu wanufunikila kukonda niŵani ngaye-ngaye?”
30 Poyankha Yesu enena kuti: “Munthu muyakine enzeyenda kufumila ku Yelusalemu kuluta ku Yeliko ndipo ekumana na vigaŵenga vamene vemuvula nomuniyata ngako. Pavuli pake vifumapo nomusiya wasala patontho kufwa.
31 Lomba vichitika n’vakuti wansembe muyakine enzepita mu nsewu wamene uyo koma pechimuwona, echingomulambalala.
32 N’chimozi-mozisoti na Mulevi, pechifwika pamalo amene awo nomuwona, echingomulambalala.
33 Koma pefwika Msamaliya muyakine wamene enzepitasoti mu nsewu wamene uyo. Ndipo pechimuwona, echimvwa chifundo.
34 Tetyo efwika penze munthu wamene uyo ndipo etila mafuta komasoti vinyu mu vilonda vake novimanga. Pavuli pake emukwejeka pa bulu wake noluta naye ku ng’anda ya alwendo kwamene echiyamusamalila.
35 Nsiku yokonkhapo efumya madinali aŵili nopeleka kuli munecho wa ng’anda ya alwendo yamene iyo ndipo emuuja kuti: ‘Musamalileni luweme mukawononga ndalama ziyakine zoyangijila nizakujosheleni nikazawela.’
36 Niŵani pa ŵanthu atatu amene aŵa wauwona wewo kuti ekonda munthu ekumana na vigaŵenga wamene uyu?”
37 Yove eyankha kuti: “Ni uyu emuchitila chifundo.” Lomba Yesu emuuja kuti: “Nkhoya, nawesoti ukochita vamene ivo.”
38 Lomba ove epitilija ulwendo wawo ndipo eloŵa mmunzi uyakine. Kwamene uko mwanakazi muyakine zina yake Malita emulondela m’ng’anda mwake monga mulwendo.
39 Yove enze na nkwake zina yake Maliya, wamene enkhala pansi pafupi na Ambuye noyamba kumvwishila venzelaŵila.*
40 Koma Malita enze bize ngako na ntchito zinyinji. Tetyo efwika kuli Yesu nonena kuti: “Ambuye, kansi vukukhuzanilini kuti uyu nkwangu wanisiila neka ntchito? Muujeni kuti awele azaniyavye.”
41 Poyankha, Ambuye emuuja kuti: “Malita, Malita, udela nkhaŵa komasoti uli bize na vinthu vinyinji.
42 Koma lomba vinthu vofunika ngako ni vitontho, payakinesoti n’chimozi cheka mphela. Kumbali yake, Maliya wasankha chinthu chiweme ngako ndipo alondewelini chinthu chamene ichi.”
Malizu a m'nyansi
^ Olo kuti, “ndipo osati mukochelwa kupeleka moni.”
^ Amene aŵa ni manda a ŵanthu onse. Onani matanthauzo a mawu ayakine.
^ Mu Chigiliki, “mawu ŵawo.”