Wilembewa na Luka 11:1-54
11 Lomba Yesu enzepemphela pamalo ayakine. Pechisilija, mmozi wa ophunzila ŵake emuuja kuti: “Ambuye, tiphunziseni kupemphela monga ni mwechichitila Yohani kuphunzisa ophunzila ŵake.”
2 Lomba yove eŵauja kuti: “Popemphela mukonena kuti, ‘Atata, zina yanu ituŵishiwe.* Ufumu wanu uwele.
3 Mutipase chakulya chalelo mokatijana na chakulya chufunikila pa nsiku ya lelo.
4 Ndipo mutikhululukile machimo ŵasu, chifukwa nasesoti tukhululukila aliyense otiphoniyela.* Komasoti tiyavyeni kuti osati tigonje keno tuyesewa.’”*
5 Pavuli pake eŵauja kuti: “Tiyelekezele kuti mmozi wa mwewo ali na shamwali wake ndipo waluta kuli shamwali wake wamene uyo pakati pa usiku kuyamusenga kuti, ‘Shamwali, nijamikeko mitanda itatu ya nkate,
6 chifukwa shamwali wangu muyakine wafwika lombapano kufumila pa ulwendo ndipo niliye chakuti nimupase.’
7 Koma shamwali wake ali m’ng’anda yamene iyo noyankha kuti: ‘Osanivutisha newo. Takhoma kale chiseko, ndipo newo na ŵana ŵangu tayona kale. Ningakwanishelini kuuka kuti nikupase kanthu.’
8 Shuwa nukuujani, auke nomupasa chilichonse chakufuna, osati chifukwa chakuti ni shamwali wake, koma chifukwa chakuti wayumilila ngako.
9 Tetyo nukuujani, pitilijani kusenga ndipo azakupaseni. Pitilijani kusakila-sakila ndipo muzafwane. Pitilijani kugogoza ndipo azakusegulileni.
10 Chifukwa aliyense osenga olondela, aliyense osakila-sakila ofwana ndipo aliyense ogogoza azamusegulile.
11 Kansi pakati panu pali tata wamene mwana wake akamusenga nsomba angamupase njoka mmalo mwa nsomba?
12 Payakinesoti akamusenga lungu, kansi angamupase chimbambalija?
13 Tetyo keno mwewo muziŵa kupeleka mphaso ziweme kuli ŵana ŵanu, olo kuti nimwe aipa, kuli tyani Atata ŵanu akululu? Kulaŵila chendi ove azapeleke na ntima wonse mzimu utuŵa kuli ŵala omusenga.”
14 Pavuli pake efumya chiŵanda muli munthu chamene chenzemukangisha kulaŵila. Chiŵanda chamene icho pechifuma, munthu enzeleka laŵila wamene uyo elaŵila ndipo gulu ya ŵanthu idabwa ngako.
15 Koma ayakine mwa ove enena kuti: “Wamene uyu ofumya viŵanda na mphamvu ya Belezebule,* wolamulila viŵanda.”
16 Koma ayakine pofuna kumuyesa, eyamba kumukakamija kuti aŵawoneshe chizindikilo chofumila kululu.
17 Pechiziŵa maganizo ŵawo, yove eŵauja kuti: “Ufumu uliwonse woyaŵanika usila ndipo ng’anda yoyaŵanika yupona.
18 Molingana na vamene ivi, keno Satana nayesoti wayaŵanika, kansi ufumu wake ungankhalepo tyani? Chifukwa mwewo munena kuti nufumya viŵanda na mphamvu ya Belezebule.
19 Keno newo nufumya viŵanda na mphamvu ya Belezebule, lomba ophunzila ŵanu ovifumya na mphamvu za ŵani? N’chifukwa chake ophunzila ŵanu amene awo akuweluzeni kuti nimwe ophoniya.
20 Koma keno newo nufumya viŵanda na chikumo cha Mulungu, niye kuti Ufumu wa Mulungu wakufwikilani mozizimusha.
21 Munthu wamphamvu wamene ali na visulo vokwanila, akogada ng’anda yake, chuma chake chutetezeka.
22 Koma munthu muyakine wamphamvu kupambana yove akawela nomugonjesa, omulonda visulo vake vonse vakudalila ndipo katundu wamutolela, ouyaŵa kuli ayakine.
23 Aliyense wamene alilini kumbali yangu oshushana na newo ndipo wamene okatalini ntchito younganija ŵanthu pamozi na newo oŵamwaja.
24 Mzimu uipa ukafuma mwa munthu, upita mmalo aliye manzi kusakila malo onkhala, koma akaleka pezeka, unena kuti, ‘Nijokele ku ng’anda yangu yala yenifumamo.’
25 Lomba ukafwika ufwana kuti ni mopyelewa luweme komasoti mowamyiwa luweme.
26 Ukachita tetyo uluta kuyatola mizimu iyakine 7 iipa ngako kupambana wamene uyo ndipo ikaloŵa nkati mwamene umo yunkhala mwamene. Tetyo vokonkhapo vake n’vakuti vochita va munthu wamene uyo vunkhala viipa ngako kupambana poyamba.”
27 Ali nkati molaŵila vamene ivi, mwanakazi muyakine mu gulu ya ŵanthu amene awo eŵilikija nomuuja kuti: “Wosangalala ni mwanakazi wamene luvumo yake inyamula mwewo komasoti wamene mwinyonkha maziŵa ŵake!”
28 Koma yove enena kuti: “Yayi, mmalo mwake osangalala ni ŵanthu amene akumvwa mawu a Mulungu noŵasunga!”
29 Gulu ya ŵanthu yamene iyo peyenzekulila-kulila, yove eyamba kunena kuti: “M’badwo uyu ni m’badwo uipa, ufuna chizindikilo. Koma upasiwelini chizindikilo chilichonse kupatulapo tyala chizindikilo cha Yona.
30 Molingana na Yona wamene enkhala chizindikilo kuli ŵanthu aku Ninive, Mwana wa munthu azankhalesoti chizindikilo ku m’badwo uyu.
31 Mfumu inakazi yaku mmwela azaiushe kwa akufwa pamozi na m’badwo uyu, ndipo azaiushe chifukwa mfumu inakazi yamene iyi iwela kufumila kwachulekejela chalo kuzakumvwa nzelu za Solomo. Koma lomba muyakine wopambana Solomo ali pano.
32 Ŵanthu aku Ninive azauke pa nsiku ya chiweluzo pamozi na m’badwo uyu ndipo azaushushe, chifukwa ove elapa pechimvwa ulaliki wa Yona. Koma lomba muyakine wopambana Yona ali pano.
33 Munthu akayasha laiti oiyikalini pa malo ofisika olo kuivwinikila na chitundu,* koma oiyika pa choikapo laiti, kuti wamene oloŵa awone kungweleŵela.
34 Laiti ya muŵili ni linso yako. Keno linso yako yulolesha* pa chinthu chimozi, muŵili wako wonse uzankhale wongweleŵela ngako. Koma keno ni yadyela,* muŵili wako wonse uzachite mfinzi.
35 Tetyo nkhala tchelu kuti kungweleŵela kwamene kuli muli wewo osati kunkhale mfinzi.
36 Lomba keno muŵili wako wonse ni wongweleŵela ngako, paliye mbali iyakine ya mfinzi, muŵili wonse uzangweleŵele ngako monga ni mwayuchitila laiti pokusanikila na kungweleŵela kwake.”
37 Pechilaŵila vamene ivi, Mfalisi muyakine emusenga kuti akalye naye. Tetyo yove eluta ndipo echiyakulya chakulya.
38 Koma Mfalisi wamene uyo edabwa pechiwona kuti akulya chakulya chamene icho akaliye samba.*
39 Tetyo Ambuye emuuja kuti: “Mwewo Afalisi muli monga ni kapu na mbale vamene vasukiwa kunja kweka koma nkati mwake ni mufipa. Nkati mwa mitima yanu mwazula dyela na vinthu viipa.
40 Mwewo ŵanthu muliye nzelu! Kansi epanga kunja ni wamenelinisoti epanga nkati?
41 Koma keno mwewo mupeleka mphaso zachifundo,* mukopeleka vinthu vamene ivo kufumila pansi pa ntima, mukachita tetyo viyakine vonse vokhuza mwewo vinkhale vituŵa.
42 Soka kuli mwewo Afalisi, chifukwa mupeleka cha gawo 10 cha tumbewu twa minti na twa luwe komasoti cha mbewu zakudimba za ntundu uliwonse. Koma munyalanyaza chilungamo na chikondi cha Mulungu! N’chendi wenze udindo wanu kuchita vinthu vamene ivi, koma mwenzefunikalini kunyalanyaza vinthu viyakine vamene ivo.
43 Soka kuli mwewo Afalisi, chifukwa mukonda mipando yakusogolo* mmalo opemphelela komasoti kupasiwa moni mmamaketi!
44 Soka kuli mwewo, chifukwa muli monga ni manda* amene owonekalini bwino-bwino* mwakuti ŵanthu oyenda palulu pake koma osaziŵa!”
45 Poyankha mmozi wa ŵanthu oziŵa Chilamulo emuuja kuti: “Mphunzisi, vamene ivi vamulaŵila munyoza na sewo kumo.”
46 Lomba yove enena kuti: “Soka kuli namwesoti muziŵa Chilamulo, chifukwa mutwika ŵanthu katundu wovuta kunyamula koma mwewo mumukumyalini katundu wamene uyo olo na chikumo chanu!
47 Soka kuli mwewo, chifukwa mumanga manda* ŵa aneneli, koma lomba makolo ŵanu niye eŵapaya!
48 Mosakaikila nimwe mboni pa vinthu vechichita makolo ŵanu. Ndipo mukatijana na vechichita vamene ivo, chifukwa ove epaya aneneli, koma mwewo mumanga manda ŵawo.
49 N’chifukwa chake nzelu ya Mulungu inenasoti kuti: ‘Nizaŵatumijile aneneli na atumwi, koma ove azapaye komasoti kutamanisha ayakine a ove.
50 Tetyo m’badwo uyu uzapasiwe mulandu wa milopa ya aneneli, yamene ichekewa kuyambila pechinkhazikishiwa chalo.
51 Kuyambila milopa ya Abele mpaka milopa ya Zakaliya, wamene epaiwa pakati pa guwa ya nsembe na ng’anda yopatulika.’* Shuwa nukuujani, m’badwo uyu uzayankhe mulandu wa milopa yamene iyo.
52 Soka kuli mwewo muziŵa Chilamulo, chifukwa mwilonda ŵanthu kiyi yoŵayavya kuziŵa vinthu. Mwewo muliye loŵemo,* ndipo ŵanthu amene ofuna kuloŵamo muŵachingilija!”
53 Tetyo pechifuma kwamene uko, alembi na Afalisi eyamba kumupanikija ngako noyamba kumukonsha makonsho anyinji,
54 ndipo enzeyembekezela kuti yove alaŵile mawu akuti amupezelepo chifukwa.
Malizu a m'nyansi
^ Olo kuti, “ikowonewa kuti ni yopatulika; ikowonewa kuti ni ituŵa.”
^ Mu Chigiliki, “ali nase na nkhongole.”
^ Mu Chigiliki, “Osatiloŵesha mmayeselo.”
^ Ni zina iyakine yakuziŵika nayo Satana, wamene ni nkulu olo kuti wolamulila viŵanda.
^ Olo kuti, “chitundu chopimila.”
^ Mu Chigiliki, “yuikila nzelu.”
^ Mu Chigiliki, “iipa.”
^ Ivi vutanthauzalini kuti enzekulya chakulya na mmanja mufipa koma kuti enzekonkhejalini miyambo ya Chiyuda yosambila mmanja.
^ Olo kuti, “mphaso kuli osauka.” Onani matanthauzo a mawu ayakine.
^ Olo kuti, “mipando iweme ngako.”
^ Olo kuti, “manda achikumbukilo.”
^ Olo kuti “manda aliye chizindikilo chilichonse.”
^ Olo kuti, “manda achikumbukilo.”
^ Olo kuti, “kachisi.”
^ Kutanthauza mu Ufumu wakululu. Onani Mateyo 23:13.