Wilembewa na Luka 13:1-35
-
Lapani mukalekachita tetyo muzawonongewe (1-5)
-
Fanizo ya chimuti cha nkhuyu chisatwala (6-9)
-
Mwanakazi wobenda nsana epojekewa pa nsiku ya Sondo (10-17)
-
Fanizo ya kansele ka mpilu komasoti ya vofufumisha (18-21)
-
Pofunika khama kuti tiloŵe pa muliyango utontho (22-30)
-
Helode enenewa kuti ni “nkhandwe” (31-33)
-
Yesu elila Yelusalemu (34, 35)
13 Pa nthawe yamene iyo, ayakine mwa ŵanthu amene enze pamene apo emufotokozela za ŵanthu a ku Galileya amene milopa yawo, Pilato eiyavija na nsembe zawo.
2 Yove eŵayankha kuti: “Kansi muganiza kuti ŵanthu a ku Galileya amene awo enze ochimwa ngako kupambana Agalileya ayakine onse chifukwa chakuti vamene ivo viŵachitikila?
3 Yayi n’tetyolini.Tetyo nukuujani kuti keno mulapelini, monse muzawonongewe molingana na ove.
4 Lomba tyani za ŵanthu 18 ŵala, amene nsanja iŵaponela ku Silowamu noŵapaya? Kansi muganiza kuti enze ochimwa ngako kupambana ŵanthu onse onkhala ku Yelusalemu?
5 Yayi n’tetyolini. Tetyo nukuujani kuti, keno mulapelini, mwewo monse muzawonongewe monga ni mwechiwonongelewa ove.”
6 Pavuli pake eyamba kufotokoza fanizo iyi: “Munthu muyakine enze na chimuti cha nkhuyu mmunda wake wa mpesa, ndipo eluta kuyasakila chitwazi muchimuti chamene icho, koma aliyefwanemo chilichonse.
7 Lomba euja munthu enzesamalila munda wa mpesa wamene uyo kuti, ‘Vakwana vyaka vitatu lomba nuwela kuzasakila nkhuyu muchimuti chamene ichi, koma niliye fwanemo olo imo. Chiwishe chimuti chamene ichi! Ndaŵa yanji chikungowononga nthaka?’
8 Munthu enzesamalila munda wamene uyo eyankha kuti, ‘Bwana, muwona tyani kuti muchisiyeko chino chaka cheka. Newo nikumbe mmbali mwa chimuti chamene ichi notilamo manyowa.
9 Chikazatwala vitwazi kusogolo, vizankhale luweme, koma keno chizatwalelini muzachiwishe.’”
10 Lomba enzephunzisa mmalo ayakine opemphelela pa nsiku ya Sondo.
11 Mwamene umo mwenze mwanakazi muyakine wamene mzimu uipa* wemulwalisha kwa vyaka 18. Yove enze wobenda nsana mwakuti enzekwanishalini kuŵelamuka.
12 Yesu pechimuwona, elaŵila naye nomuuja kuti: “Mayi, mwamasuka ku matenda ŵanu.”
13 Pamene apo eika manja ŵake pali mwanakazi wamene uyo, ndipo nthawe yamene iyoletu eŵelamuka noyamba kutamanda Mulungu.
14 Koma nsogoleli wa malo opemphelela pechiwona vamene ivi, ekalipa chifukwa Yesu epojeka munthu pa nsiku ya Sondo. Tetyo euja gulu ya ŵanthu kuti: “Pali masiku 6 ŵatufunikila kukata ntchito. Mukowela masiku amene awo kuzapojekewa osati pa nsiku ya Sondo.”
15 Koma Ambuye emuyankha kuti: “Ŵanthu achinyengo mwewo, kansi aliyense wa mwewo ozululilalini ng’ombe yake olo bulu wake m’chiŵaya pa nsiku ya Sondo noluta naye kuyamumweshela manzi?
16 Kansi venzelini viweme kuti mwanakazi wamene uyu, wamenesoti ni mwana wa Abulahamu, wamene Satana emumanga kwa vyaka 18, amasuliwe m’myando yamene iyi pa nsiku ya Sondo?”
17 Pechilaŵila vamene ivi, onse ŵala enzemushusha echimvwa nsoni. Koma gulu yonse ya ŵanthu iyamba kusangalala chifukwa cha vodabwisa vonse vechichita yove.
18 Tetyo epitilija kunena kuti: “Kansi Ufumu wa Mulungu uli monga ni chinji, ndipo ningaulinganije na chinji?
19 Uli monga ni kansele ka mpilu* kechitola munthu nakuyakakomola mmunda wake. Pavuli pake kimela nonkhala chimuti, mwakuti tunyoni twa mmululu twimanga vivumbo mmisambo yake.”
20 Yove enenasoti kuti: Kansi Ufumu wa Mulungu ningaulinganije na chinji?
21 Uli monga ni vofufumisha vechitola mwanakazi muyakine noviyavija na unga wokwana mbale zitatu zikulu-zikulu zopimila,* mwakuti ntanda wonse wamene uyo wifufuma.”
22 Yesu eyenda mu tauni na tauni komasoti munzi na munzi. Yove enzephunzisa nopitilija ulwendo wake woluta ku Yelusalemu.
23 Lomba munthu muyakine emukonsha kuti: “Ambuye, kansi n’chendi kuti ŵanthu akuti akapulumuke na tontho?” Yove eŵauja kuti:
24 “Yeja-yejani mwamphamvu kuti muloŵe pa mulyango utontho. Chifukwa shuwa nukuujani, anyinji azafunishishe kuloŵamo koma azakwanishelini.
25 Munecho wa ng’anda akazanyamuka nokhoma chiseko, mwewo muzapaname panja nogogoza chiseko chamene icho, ndipo muzanene kuti, ‘Ambuye tisegulileni.’ Koma yove azakuyankheni kuti: ‘Nukuziŵalini kwamufumila.’
26 Pamene apo muzayambe kunena kuti, ‘Tenzekulya na kumwa pamenso panu ndipo mwewo mwenzephunzisa mmisewu yasu.’
27 Koma yove azakuujeni kuti, ‘Nuziŵalini kwamufumila. Chokani pamenso pangu, mwewo monse muchita vinthu vosalungama!’
28 Kwamene uko muzalile nokukuta menu mukazawona Abulahamu, Isaki na Yakobo komasoti aneneli onse ali mu Ufumu wa Mulungu, koma mwewo akuingilani kunja.
29 Komasoti ŵanthu azawele kufumila ku mmawa, ku nchingulo, ku mpoto na ku mmwela ndipo azankhale pa thebo mu Ufumu wa Mulungu.
30 Kulaŵila chendi ŵala osilijila azankhale oyambilila, ndipo oyambilila azankhale osilijila.”
31 Pa nthawe yamene iyo kwifwika Afalisi ayakine nomuuja kuti: “Nyamukani mufumeko kuno, chifukwa Helode ofuna kukupayani.”
32 Yove eŵayankha kuti: “Nkhoyani mukamuuje nkhandwe wamene uyo kuti, ‘Newo nufumya viŵanda nopojeka ŵanthu lelo na mailo, ndipo nikasilije mazo.’
33 Koma olo n’tetyo nufunikila kupitilija ulwendo wangu lelo, mailo na mazo, chifukwa n’kosayenelela kuti mneneli amupaile kunja kwa Yelusalemu.
34 Wewo Yelusalemu, Yelusalemu upaya aneneli na upaya ŵanthu na myala otumijiwa kuli wewo. Moweleja-weleja nenzefuna kuunganija ŵana ŵako pamozi, monga ni mwayuchitila nkhuku kuunganija ŵana ŵaine mmapapiko. Koma mwewo muliyefune kuchita vamene ivo.
35 Lomba mvwani! Mulungu wafumapo nokusiilani ng’anda yanu yamene iyi. Shuwa nukuujani, muzaniwonelinisoti mpaka pamukuti muzanene kuti: ‘Wodalisiwa ni wala akuza mu zina ya Yehova!’”
Malizu a m'nyansi
^ Olo kuti, “mzimu wamene upundula.”
^ “Mpilu” watomolewa pamene apa upezeka ku Palesitina. Kansele kake konkhala katontho ngako koma kakamela, kamuti kake kokula mpaka kufwika mamita 4 ndipo konkhala na misambo.
^ Mu Chigiliki, “mipimo itatu ya seya.” Mmpimo umozi wa seya wenzekwana malita 7.33.
