Wilembewa na Luka 14:1-35
-
Munthu wamene enze na manja komasoti mendo ovimba epojekewa pa nsiku ya Sondo (1-6)
-
Mukankhala mulwendo mukolichefya (7-11)
-
Mukoita ŵanthu amene angakwanishelini kukuwejelani (12-14)
-
Fanizo ya ŵanthu amene ekana kuluta ku phwando (15-24)
-
Vufunika kuti munthu ankhale wophunzila (25-33)
-
Munyu wamene wasila mphamvu (34, 35)
14 Nthawe iyakine yove eluta kuyakulya chakulya m’ng’anda ya mmozi wa asogoleli ŵa Afalisi pa nsiku ya Sondo, ndipo ŵanthu enze m’ng’anda yamene iyo enzemuloleshesha.
2 Pasogolo pake penze munthu enzelwala matenda amene echitisha kuti manja na mendo ŵake avimbe.*
3 Pechimuwona, Yesu ekonsha ŵanthu oziŵa Chilamulo komasoti Afalisi amene awo kuti: “Kansi n’kololeka kupojeka munthu pa nsiku ya Sondo olo yayi?”
4 Koma ove echingonkhala chelele. Pevichitika tetyo yove ekata wala munthu nomupojeka ndipo emuuja kuti alute kwawo.
5 Lomba eŵakonsha kuti: “Niŵani wa mwewo wamene mwana wake olo ng’ombe yake ingaponele mu chisime pa nsiku ya Sondo, angaleke kuifumya nthawe yamene iyo?”
6 Ove aliyekwanishe kumuyankha konsho yamene iyi.
7 Pechiwona kuti ŵanthu eitiwa amene awo osankha malo olemekezeka ngako, eŵauja fanizo kuti:
8 “Munthu muyakine akakuita ku phwando yaukwati osankhala pa malo olemekezeka ngako, chifukwa payakine vingachitike kuti waitasoti muyakine wolemekezeka ngako kupambana wewo.
9 Lomba wala ekuitani angawele nokuuja kuti, ‘Fumapo apa pankhale aŵa abwana.’ Vikachitika tetyo ungafumepo uli na nsoni nakuyankhala kumapeto ngako-ngako.
10 Koma ukaitiwa, nkhoya ndipo ukankhale kumapeto ngako-ngako, kuti wala munthu ekuita akafwika akuuje kuti, ‘Wewo shamwali, wela unkhale apa pa malo olemekezeka.’ Vikazachitika tetyo uzalemekezeke pamenso pa alwendo ayako onse.
11 Chifukwa aliyense wolikweja azaselushiwe koma aliyense wolichefya azakwejewe.”
12 Pavuli pake eujasoti wala munthu wechiita kuti: “Ukapika chakulya cha nzuŵa olo cha nchingulo, osaita azishamwali ŵako olo enekwako olo achibale ŵako olo ŵanthu olemela amene onkhala nawe pafupi. Payakine nthawe iyakine ovesoti angazakuita ndipo azankhale monga kuti okuwejela.
13 Koma ukakonza phwando ukoita ŵanthu osauka, ochiliwa, olemala na asalola.
14 Ukachita tetyo uzankhale wosangalala chifukwa ove aliye chakuti azakuwejele. Mulungu azakuwejele pa nthawe yakuti akoushiwa ŵanthu olungama.”
15 Pechimvwa vamene ivi, mmozi wa alwendo ayake emuuja kuti: “Wosangalala ni munthu wamene akuti azalye chakulya* mu Ufumu wa Mulungu.”
16 Yesu emuuja kuti: “Munthu muyakine ekonza phwando ikulu ya chakulya cha nchingulo ndipo eita ŵanthu anyinji.
17 Nthawe ya chakulya cha nchingulo chamene icho peikwana, etumija wantchito wake kuti akauje ŵanthu ŵechiita amene awo kuti, ‘Tiyeni, chifukwa vonse vakonzewa lomba.’
18 Koma onse eyamba kupeleka vifukwa vokanila. Woyamba emuuja kuti, ‘Newo nagula munda ndipo nufunikila kuluta kuti nikauwone. Pepani nikwanishelini kuwela.’
19 Muyakine enena kuti, ‘Newo nagula ng’ombe 10 zapa djoko ndipo nikuya kuti nikaziyese. Pepani nikwanishelini kuwela.’
20 Komasoti muyakine enena kuti, ‘Newo nilungula lombapano, tetyo ningakwanishelini kuwela.’
21 Lomba wala wantchito ejokela kuyalaŵila vamene ivi kuli abwana ŵake. Munecho wa ng’anda wamene uyo pechimvwa vamene ivi ekalipa ndipo euja wantchito wake wamene uyo kuti, ‘Nkhoya mokulumija mmisewu na munjila za m’tauni mwamene umu, ukatole ŵanthu osauka, ochiliwa, asalola komasoti olemala nowela nawo kuno.’
22 Papita kanthawe katontho, wala wantchito enena kuti, ‘Bwana, vala vemwiniuja vachitika, koma lomba malo akalipo.’
23 Lomba wala bwana euja wantchito wake wamene uyo kuti, ‘Nkhoya mmisewu iyakine ili kunja kwa tauni ndipo ukalimbikise ŵanthu awele kuno kuti ng’anda yangu izule.
24 Chifukwa nukuujani kuti, paliye olo mmozi mwa ŵala ŵanthu enze eitiwa akuti azalaule chakulya changu cha nchingulo.’”
25 Lomba gulu ikulu ya ŵanthu yenzeyenda pamozi na Yesu ndipo yove echeuka noŵauja kuti:
26 “Keno munthu muyakine onikonkhelela koma osazondana na* atata ŵake, amayi ŵake, mwanakazi wake, ŵana ŵake enekwake komasoti azilongosi ŵake, kulaŵila chendi olo moyo wake ngawo-ngawo, angankhalelini wophunzila wangu.
27 Aliyense asatakula chimuti chake chotamanilapo* nonikonkhelela angankhalelini wophunzila wangu.
28 Mwachisanzo, niŵani wa mwewo wamene akafuna kumanga ng’anda oyambalini wankhala pansi noŵelenga ndalama zakuti azawononge kuti awone keno ali na ndalama zokwanila kusilijila ng’anda yamene iyo?
29 Akaleka kuchita tetyo, angayambe kumanga fandeshoni koma osakwanisha kuisilija ndipo onse owona angayambe kumuseka
30 nonena kuti: “Uyu munthu eyamba bwino-bwino kumanga, koma wakangiwa kusilija.
31 Olo ni mfumu yotyani, yamene poluta kuyakumana na mfumu iyake ku nkhondo, yuyambalini yankhala pansi noganizila luweme keno masodja ŵake 10.000 angakwanishe kuniyatana na masodja 20.000 a mfumu yamene ikuza kuzaniyatana nayo?
32 Koma akawona kuti angakwanishelini, otumija akapitawo mokulumija kuli mfumu yamene iyo ikaliyefwika pafupi, kuyasenga ntendele.
33 Molingana na vamene ivi, shuwa paliye aliyense wa mwewo okangiwa kusiya chuma chake chonse wamene angakwanishe kunkhala wophunzila wangu.
34 Kulaŵila chendi, munyu ni uweme. Koma keno munyu wamene uyo wasila mphamvu, kansi mphamvu yake yamene iyo ingawejeleshewe tyani?
35 Niwosafunika kuutila mu nthaka olo mmanyowa. Ŵanthu outaya kunja. Wamene ali na matu akumvwa, amvwe.”
Malizu a m'nyansi
^ Munthu wamene ali na matenda amene aŵa ovimba chifukwa cha kupaka kwa manzi mmuŵili.
^ Mu Chigiliki, “nkate.”
^ Olo kuti, “koma osachefya chikondi chake kwa.”
^ Onani matanthauzo a mawu ayakine.