Wilembewa na Luka 15:1-32
15 Lomba ŵanthu onse osonkhesha nsonkho komasoti ochimwa, enzewela kuli Yesu kuti azamumvwishile.
2 Koma Afalisi na alembi enzeng’ung’uzika kuti: “Munthu uyu olondela ŵanthu ochimwa nakulya nawo pamozi.”
3 Tetyo yove eŵauja fanizo iyi:
4 “Niŵani pakati panu wamene angankhale na mbelele 100, imozi nosoŵa angaleke siya mbelele 99 ziyakine zamene izo mu chipululu noluta kuyasakila-sakila imozi yala yasoŵa mpaka kuifwana?
5 Ndipo akaifwana oitakula papewa pake mwakuti osangalala.
6 Akafwika ku ng’anda ounganija azishamwali ŵake na ŵanthu ŵakunkhala nawo pafupi noŵauja kuti, ‘Sangalalani nane pamozi, chifukwa naifwana mbelele yangu yala yenze isoŵa.’
7 Shuwa nukuujani kuti, molingana na vamene ivi, kululu kuzankhale chisangalalo chikulu chifukwa cha munthu mmozi wochimwa wamene walapa kupambana cha ŵanthu 99 olungama amene ofunikilalini kulapa.
8 Olo ni mwanakazi wotyani wamene ali na ndalama zokwana madalakima 10, lomba imozi nomutaika, angaleke yasha laiti nopyela m’ng’anda noisakila-sakila luweme mpaka kuifwana?
9 Ndipo akaifwana ounganija azishamwali ŵake na ŵanthu ŵakunkhala nawo pafupi noŵauja kuti, ‘Sangalalani nane pamozi, chifukwa naifwana ndalama ya dalakima yala yenze initaika.’
10 Tetyo nukuujani kuti, molingana na vamene ivi, angelo a Mulungu osangalala ngako chifukwa cha munthu mmozi wochimwa wamene walapa.”
11 Pavuli pake enena kuti: “Munthu muyakine enze na ŵana analume aŵili.
12 Mwana ntontho esenga atata ŵake kuti, ‘Atata, munipasiletu chuma changu pa chuma chanu chamene ichi.’ Tetyo atata amene awo eyaŵa chuma chawo kuli ŵana amene awo.
13 Papita masiku atontho, wala mwana ntontho eunganija vinthu vake vonse noluta ku chalo chiyakine chakutali. Kwamene uko eyamba kuchita vinthu viipa ndipo ewononga chuma chake chonse.
14 Pechiwononga chuma chake chonse, mu chalo chonse chamene icho mwichitika njala ikulu ndipo yove eyamba kuvutika ngako.
15 Mwakuti eluta kuti akokata ntchito kuli nzika iyakine ya mu chalo chamene icho ndipo imutumija kuchiŵeta kwake kuti akoŵetela nkhumba.
16 Yove mpaka eyamba kukumbwila chakulya cha nkhumba zamene izo, koma paliye enzemupasa kanthu.
17 Nzelu pezimuwelela enena kuti, ‘Koma olo n’tetyo aganyu anyinji ŵa atata ali na chakulya chinyinji, koma newo kuno nikufwa na njala!
18 Mphela ninyamuke nilute kuli atata nikaŵauje kuti: “Atata, nachimwila kululu komasoti nachimwila mwewo.
19 Ninelinisoti woyenelela kuitiwa kuti mwana wanu. Mukoniwona monga mmozi wa aganyu ŵanu.”’
20 Tetyo yove enyamuka chendi noluta kuli atata ŵake. Aliko patali, atata ŵake emuwona ndipo echita chifundo. Pavuli pake emuutukila nomukumbatila ndipo emupasa kisi mwachikondi.
21 Lomba mwana wamene uyo euja atata ŵake amene awo kuti, ‘Atata, nachimwila kululu komasoti nachimwila mwewo. Ninelinisoti woyenelela kuitiwa kuti mwana wanu.’
22 Koma atata ŵake amene awo euja antchito ŵawo kuti, ‘Kulumijani, tolani mkhanjo wala uweme ngako mumuvwalike. Mumuvwalikesoti ling’i ku kwanja na nsapato kumendo kwake.
23 Komasoti mulete mwana wa ng’ombe mwanalume woina, mumupaye ndipo tilye nosangalala.
24 Chifukwa uyu mwana wangu enze wakufwa koma lomba wankhalasoti na moyo, enze esoŵa koma wawoneka.’ Tetyo onse eyamba kusangalala.
25 Koma mwana nkulu enze kumunda. Lomba penzejokela ali kufupi kufwika ku ng’anda kwamene uko, echimvwa chongo cha nyimbo komasoti ŵanthu enzevina.
26 Tetyo eita mmozi wa antchito nomukonsha venzechitika.
27 Yove emuuja kuti, ‘Nsaza wanu wawela ndipo atata ŵanu amupaila mwana wa ng’ombe woina, chifukwa amulondela ali bwino-bwino.’*
28 Koma yove ekalipa ngako mwakuti ekana kuloŵa m’ng’anda mwamene umo. Lomba atata ŵake amene awo efuma noyamba kumupapatila.
29 Poyankha yove euja atata ŵake amene awo kuti, ‘Vyaka vonse vamene ivi newo nankhala nukukatilani ntchito monga wantchito wanu ndipo niliye fwayepo malamulo ŵanu olo kamozi keka. Koma muliye nipaseko olo kamwana ka mbuzi kuti nisangalale na azishamwali ŵangu.
30 Koma pawawela mwana wanu uyu, wamene ewononga* chuma chanu na mahule, mwamupaila mwana wa ng’ombe mwanalume woina bwino.’
31 Atata ŵake amene awo emuuja kuti, ‘Mwana wangu, wewo wankhala nane nthawe zonse ndipo vinthu vonse vanili navo ni vako.
32 Koma tenzefunikila tyala kusangalala nokondwela, chifukwa nkwako wamene uyu enze wakufwa koma lomba ali na moyo, enze esoŵa koma apa lomba wawoneka.’”
