Wilembewa na Luka 16:1-31
16 Pavuli pake eujasoti ophunzila ŵake kuti: “Munthu muyakine wolemela enze na wantchito wololela ng’anda yake, wamene ŵanthu ayakine emuyopejela kuti omuwonongela chuma.
2 Tetyo emuita nomuuja kuti, ‘Namvwa vinthu viipa vauchita. Nkhoya ukalembe lipoti ya mwawakatila ntchito yololela pano pa ng’anda unipase, chifukwa upitilijelini kuyendesha ntchito za pano pa ng’anda.’
3 Lomba wantchito wamene uyo mu ntima mwake enena kuti, ‘Nichite tyani newo? Abwana ŵangu ofuna kunichosa ntchito. Ningakwanishelini kulima chifukwa niliye mphamvu ndipo nuchita nsoni kuti ninkhale wosenga-senga.
4 Yaa! Naziŵa vanikuti nichite kuti akanichosa ntchito ŵanthu akanilondele bwino mmang’anda mwawo.’
5 Lomba eita ŵanthu amene enze na nkhongole kuli abwana ŵake yumo-yumo, ndipo ekonsha woyamba kuti, ‘Uli na nkhongole ikulu tyani kuli abwana ŵangu?’
6 Yove eyankha kuti, ‘Manongo* 100 a mafuta a maolivi.’ Yove emuuja kuti, ‘Tola pepa yusimikijila za nkhongole yako ndipo unkhale pansi nolembapo manongo 50 mokulumija.’
7 Pavuli pake ekonsha muyakine kuti, ‘Lomba wewo, nkhongole yako ni ikulu tyani?’ Yove eyankha kuti, ‘Vitundu 100 va tiligu.’ Yove emuuja kuti, ‘Tola pepa yusimikijila za nkhongole yako ndipo ulembepo vitundu 80.’*
8 Wala bwana emutembeja wantchito wake wamene uyu, olo kuti enze wosalungama, chifukwa echita vinthu mwanzelu.* Chifukwa ŵana a mu nthawe ino* ochita vinthu mwanzelu akochita vinthu na ŵanthu a m’badwo wawo kupambana ŵana a kungweleŵela.
9 Namwesoti nukuujani kuti: Fwanani azishamwali pokatishila ntchito chuma chosalungama, kuti chuma chamene icho chikazasila, azakulondeleni mmalo onkhala mpaka kale-kale.
10 Munthu wokhulupilika pa chinthu chitontho, onkhalasoti wokhulupilika pa chinthu chikulu, ndipo munthu wosakhulupilika pa chinthu chitontho onkhalasoti wosakhulupilika pa chinthu chikulu.
11 Tetyo keno muliye woneshe kuti nimwe wokhulupilika pa chuma chosalungama, niŵani angakupaseni ntchito yololela chuma ngacho-ngacho?
12 Komasoti keno muliye woneshe kuti nimwe wokhulupilika pa vinthu va ŵanthu ayakine, ni ŵani angakupaseni mphoto yechikusungilani?
13 Wantchito angakatilelini ntchito mabwana aŵili, chifukwa angazonde yumo noyamba kukonda muyakine, olo angankhale wokhulupilika kuli yumo noyamba kunyoza muyakine. Mungankhalelini antchito a Mulungu na chuma pa nthawe imozi.”
14 Lomba Afalisi amene enzekonda ngako ndalama, enzetetekela vonse vamene ivi ndipo eyamba kumunyoza.
15 Tetyo yove eŵauja kuti: “Mwewo niye munena pamenso pa ŵanthu kuti nimwe olungama, koma Mulungu oziŵa mitima yanu. Chifukwa chinthu chakuwona ŵanthu kuti ni chapalulu ngako ni chatyala-tyala pamenso pa Mulungu.
16 Ŵanthu enzelalikila za Chilamulo na vechilemba aneneli mpaka mu nthawe ya Yohani. Kufumila mu nthawe yamene iyo, uthenga uweme wamene ulengezewa ni wokhuza Ufumu wa Mulungu, ndipo ŵanthu osiyana-siyana oyeja-yeja mwakhama kuti akaloŵemo.
17 Kulaŵila chendi, ni vosavuta kuti kululu na chalo vifumepo kusiyana na kuti kambali katontho ka bii ya m’Chilamulo kaleke ku kwanilishiwa.
18 Aliyense waleka mwanakazi wake nolungula muyakine, wachita chigololo ndipo aliyense walungula mwanakazi walekewa wamene uyo nayesoti wachita chigololo.
19 Penze munthu muyakine wolemela wamene enzekonda kuvwala vovwala visweta-visweta na nyula ziweme ngako. Yove enzesangalala komasoti enzekulya luweme nsiku iliyonse.
20 Komasoti penze munthu muyakine wamene enzekonda kusenga-senga, wamene enze na vilonda muŵili wonse zina yake Lazalo ndipo ŵanthu enzemunkhazika pa gedi yoloŵela ku ng’anda ya munthu wolemela wamene uyo.
21 Munthu wamene uyo enzefunishisha kulya vinyenye vupona pa thebo ya munthu wala wolemela. Imbwa nazo zenzewela kuzamyangula vilonda vake vamene ivo.
22 Papita nthawe munthu wosenga-senga wala emwalila ndipo angelo emutola kuyamuika pambali pa Abulahamu.*
Wala munthu wolemela nayesoti emwalila ndipo eikiwa mmanda.
23 Ali m’Manda* mwamene umo komasoti otamana, ekweja menso ŵake nowona Abulahamu aliko patali ndipo Lazalo enze pambali pake.*
24 Yove eita kuti, ‘Atata Abulahamu, nichitileni chifundo. Mutume Lazalo kuti avwivwike kumapeto kwa chikumo chake mmanzi kuti azizilishe lilimi yangu, chifukwa nutamana mmulilo uno ulilima.’
25 Koma Abulahamu enena kuti, ‘Mwanawe, kumbukila kuti wilondelelatu viweme vako vonse pewenze ukali na moyo, koma Lazalo elondela vinthu viipa. Ndipo palipano yove osangalala kuno koma wewo utamana.
26 Komasoti pakati pa mwewo na sewo paikiwa chisengu chikulu ngako, mwakuti ŵala ofuna kuwela uko kufumila kuno angakwanishelini. Komasoti ŵanthu angataukelini kufumila uko kuwela kuno.’
27 Lomba wala munthu wachuma enena kuti, ‘Pakuti vili tetyo, nukusengani atata kuti mumutumije ku ng’anda ya atata ŵangu.
28 Chifukwa nili na enekwangu okwana 5 ku ng’anda kwamene uko, tetyo alute akaŵapase umboni wokwanila, kuti nawosoti osati azawele kuno ku malo otamanila.’
29 Koma Abulahamu enena kuti, ‘Kwamene uko ali na volemba va Mose komasoti va aneneli, amvwile vamene ivo.’
30 Pavuli pake yove enena kuti, ‘Yayi pulizi atata Abulahamu, koma keno muyakine wofumila kuli akufwa angalute kwamene uko, ove akalape chendi.’
31 Koma yove emuuja kuti, ‘Keno omvwilalini volemba va Mose komasoti va aneneli, angakwanishikelini mphela olo muyakine angauke kwa akufwa.’”
Malizu a m'nyansi
^ Nongo imozi yenzekwana malita 22.
^ Olo kuti, “mipimo 100 ya koli.” Mpimo umozi wa koli wenzekwana malita 220.
^ Olo kuti, “mochenjela.”
^ Onani matanthauzo a mawu ayakine.
^ Mu Chigiliki, “panganga pa Abulahamu.”
^ Amene aŵa ni manda a ŵanthu onse. Onani matanthauzo a mawu ayakine.
^ Mu Chigiliki, “panganga pa Abulahamu.”