Wilembewa na Luka 17:1-37
17 Pavuli pake Yesu euja ophunzila ŵake kuti: “N’vosakwanishika kuti pankhale paliye vosokoneza. Koma soka kuli munthu wamene vosokoneza vamene ivo vuwela kupitila muli yove!
2 Vingankhale luweme ngako kumumangilila chimwala cha mphelo mu nkosi mwake nomuponya mu nyanja, kusiyana na kuti akalipishe mmozi wa tuŵana utu.
3 Shuwa samalani. Keno nkwako wachita chimo umuzuzule ndipo akalapa umukhululukile.
4 Olo akuchimwile maulwendo 7 pa nsiku, nowela kuli wewo maulwendo 7 kuzanena kuti, ‘Nalapa newo,’ shuwa umukhululukile.”
5 Pavuli pake atumwi amene awo euja Ambuye kuti: “Tiyangijileni chikhulupililo.”
6 Pamene apo Ambuye eŵauja kuti: “Kuti muli na chikhulupililo chulingana na kansele kampilu kuchepa kwake, sembe mwakwanisha kuuja chimuti ichi cha malubeni kuti, ‘Juka pano, ukalikomole mu nyanja!’ ndipo sembe chakumvwilani.
7 Kansi niŵani wa mwewo wamene angauje wantchito wake wamene wangofwika kwalombapano kufumila kuchiŵeta kuyaŵetela mbelele olo kumunda kuti, ‘Wela kuno ku thebo kamangu uzalye’?
8 Kansi angamuujelini kuti, ‘Nipikile chakulya cha nchingulo, uvwale epuloni nonitumikila mpaka nisilije kulya na kumwa, pavuli pake nawesoti ulye na kumwa’?
9 Munthu wamene uyo angamutembejelini wantchito wake wamene uyo chifukwa vamene ivo vawachita ni ntchito yake, n’tetyolini?
10 Chimozi-mozi na mwewosoti, mukachita vemwipasiwa pa ntchito yanu, mukonena kuti: ‘Sewo nise akapolo atyala-tyala. Tangochita vetenzefunikila kuchita.’”
11 Lomba penzekuya ku Yelusalemu, epita na mmalile a Samaliya na Galileya.
12 Penzeloŵa mmunzi uyakine, ekumana na analume 10 amankhutu koma ove epanamako patali.
13 Pavuli pake ove eŵilikija ngako kuti: “Yesu, Mlangizi, tichitileni chifundo!”
14 Yesu pechiŵawona eŵauja kuti: “Nkhoyani mukawonekele kuli ansembe.” Tetyo penzekuya epola.
15 Mmozi wa ove pechiwona kuti wapojekewa, ejokela otamanda Mulungu mokweja mawu.
16 Pechifwika egwada pamenso pa Yesu noŵelama mpaka chinso chake pansi, ndipo emutembeja. Munthu wamene uyu enze Msamaliya.
17 Yesu enena kuti: “Kansi ŵanthu apojekewa enzelini 10? Lomba ŵala ŵanthu ayakine 9 ali kuni?
18 Kansi paliyesoti muyakine wajokela kuzalemekeza Mulungu kupatulapo uyu munthu yeka wa ntundu uyakine?”
19 Lomba Yesu euja munthu wamene uyo kuti: “Panama wakuya. Chikhulupililo chako chakupojeka.”
20 Afalisi pechimukonsha kuti Ufumu wa Mulungu uzawele nthawe yanji, yove eŵayankha kuti: “Ufumu wa Mulungu uzawelelini mwa mawonekedwe ochitisha chidwi.
21 Ndipo ŵanthu azanenelini kuti, ‘Onani uli kuno!’ olo, ‘Onani uli uko!’ Chifukwa Ufumu wa Mulungu uli pakati panu.”
22 Pavuli pake, euja ophunzila ŵake kuti: “Masiku akuza ŵamukuti muzafunishishe kuwona imozi mwa masiku a Mwana wa munthu koma muzaiwonelini.
23 Ŵanthu azakuujeni kuti, ‘Onani ali uko!’ olo ‘Onani ali kuno!’ koma mwewo osati muzaluteko olo kuŵakonkhelela.
24 Chifukwa molingana na kaleza kamene kocheluka kufumila mbali iyakine ya kululu kuyafwika mbali iyakine ya kululu, vizankhalesoti tetyo na Mwana wa munthu mu nsiku yake.
25 Koma poyamba ofunika kukumana na mavuto anyinji komasoti kukaniwa na m’badwo uyu.
26 Komasoti molingana na vichitika mmasiku a Nowa, vizachitikesoti chimozi-mozi mmasiku a Mwana wa munthu.
27 Mmasiku amene awo ŵanthu enzekulya na kumwa. Analume enzelungula ndipo anakazi enzelunguliwa mpaka nsiku yamene Nowa yechiloŵa mu chingalaŵa, ndipo Chigumula chiwela nowononga ŵanthu onse amene awo.
28 Chimozi-mozisoti na vichitika mmasiku a Loti. Ŵanthu enzekulya, kumwa, kugula, kugulisa, kukomola komasoti kumanga.
29 Koma nsiku yechifuma Loti mu Sodomu, kululu kwipona mulilo na sulufule monga ni mvula nowononga ŵanthu onse.
30 Vizankhalesoti chimozi-mozi pa nsiku yamene iyo, pati azawonekele Mwana wa munthu.
31 Pa nsiku yamene iyo, Munthu akuti azankhale pa ntenje wa ng’anda koma katundu wake ali m’ng’anda osati azaseluke kuyatola katundu wake wamene uyo. Chimozi-mozisoti na munthu akuti azankhale mmunda, osati azajokele ku vinthu vawasiya kuvuli.
32 Kumbukilani nkazi wa Loti.
33 Aliyense ofunishisha kuteteza moyo wake azautaye, koma aliyense wotaya moyo wake azausunge.
34 Shuwa nukuujani, usiku wamene uyo ŵanthu aŵili azaŵeyone pamozi pabedi. Mmozi azatolewe, koma muyakine azasiiwe.
35 Anakazi aŵili azankhale opela pamozi pa mphelo. Mmozi azatolewe, koma uyo muyakine azasiiwe.”
36 ——
37 Tetyo ove emukonsha kuti: “Kansi vamene ivi vizachitikile kuni Ambuye?” Yove eŵayankha kuti: “Kuli chinthu chakufwa, vinombo vuunganasoti kwamene uko.”
