Wilembewa na Luka 18:1-43
18 Lomba Yesu eŵauja fanizo pofuna kuŵawonesha kufunika kwakuti akopemphela nthawe zonse komasoti kuti osati akotaya ntima.
2 Yove enena kuti: “Mu tauni iyakine mwenze woweluza wamene enzeyopalini Mulungu komasoti enzeikilalini nzelu munthu.
3 Mu tauni yamene iyo mwenzesoti mwanakazi wamasiye wamene enzeluta-luta kuli wala woweluza kuyamusenga kuti, ‘Niweluzileni mulandu wangu na munthu wanili naye pa mulandu kuti pachitike chilungamo.’
4 Koma kwa kanthawe woweluza wamene uyo enzefunalini, koma pavuli pake enena mu ntima mwake kuti, ‘Olo kuti nuyopalini Mulungu olo kuikila nzelu munthu aliyense,
5 niwonesheshe kuti chilungamo chachitika kuli mwanakazi wamasiye wamene uyu chifukwa chakuti onivutisha. Nichite vamene ivi kuti osati apitilije kuwela noniŵeŵesha na vakusenga vamene ivi.’”
6 Pavuli pake Ambuye enena kuti: “Mwamvwa ka vechilaŵila woweluza wamene uyo olo kuti enze wosalungama!
7 Lomba kansi Mulungu awonesheshelini kuti chilungamo chachitika kuli osankhiwa ŵake, amene oŵilikija kuli yove usiku na nzuŵa, pakuŵalezela ntima?
8 Shuwa nukuujani, yove awonesheshe kuti chilungamo chachitika mokulumija kuli ove. Kansi Mwana wa munthu akazafwika, azafwane chendi chikhulupililo monga ni chamene ichi* pano pa chalo?”
9 Yesu enenasoti fanizo iyi yokonkhapo kuli ayakine amene enzeliwona monga ni olungama, amenesoti enzewona ŵanthu ayakine monga ni atyala-tyala. Yove enena kuti:
10 “Ŵanthu aŵili eluta mu kachisi kuyapemphela. Mmozi enze Mfalisi ndipo muyakine enze wosonkhesha nsonkho.
11 Wala Mfalisi epanama noyamba kupemphela mu ntima mwake kuti, ‘Mulungu wangu nukutembejani chifukwa nine wosiyana na ŵanthu ayakine onse. Ove ni vigaŵenga, osalungama komasoti achigololo. Ninesoti wosiyana na uyu wosonkhesha nsonkho.
12 Newo nulekeja kulya kaŵili pa sondo ndipo nupeleka cha gawo 10 pa vinthu vonse vanufwana.’
13 Koma wala wosonkhesha nsonkho, pechipanamako patali aliyefune olo kulolesha kululu. Yove enzekungoliniyata panganga nonena kuti, ‘Mulungu wangu niwamileni ntima* munthu wochimwa newo.’
14 Shuwa nukuujani, munthu wamene uyo pechiluta kwawo ewonewa kuti ni wolungama ngako kupambana wala Mfalisi. Chifukwa aliyense wolikweja azachitishiwe nsoni, koma aliyense wolichefya azakwejewe.”
15 Lomba ŵanthu enzemuletela ŵana ŵawo, kuti aŵakumye na manja ŵake, koma ophunzila ŵake pechiwona vamene ivo eyamba kuŵakalipila.
16 Koma olo n’tetyo Yesu eita ŵana amene awo. Yove enena kuti: “Alekeni ŵana amene awo awele kuli newo, osaŵalesha. Chifukwa Ufumu wa Mulungu ni wa ŵanthu monga ni amene aŵa.
17 Shuwa nukuujani, aliyense asalondela Ufumu wa Mulungu monga ni mwana ntontho azaloŵeletulini mu Ufumu wamene uyo.”
18 Lomba wotonga muyakine emukonsha kuti: “Mphunzisi Muweme, nichite chinji kuti nikafwane moyo wosasila?”
19 Yesu emuyankha kuti: “Ndaŵa yanji uniita kuti muweme? Paliye muweme, koma Mulungu yeka.
20 Wewo uziŵa malamulo akuti: ‘Osachita chigololo, osapaya munthu,* osaiŵa, osapeleka umboni wawenye komasoti yakuti, mukolemekeza atata ŵanu na amayi ŵanu.”
21 Lomba yove enena kuti: “Vonse vamene ivi nankhala nuvikonkha kufumila nili ntontho.”
22 Yesu pechimvwa vamene ivo, emuuja kuti: “Pali chinthu chimozi chikalishota mphela muli wewo: Ukagulise vinthu vonse vaulinavo ndipo ndalama zamene izo ukapase ŵanthu osauka. Ukachita tetyo unkhale na chuma kululu, pavuli pake uwele uzankhale wophunzila wangu.”
23 Pechimvwa vamene ivi, echimvwa chisoni ngako, chifukwa enze wolemela ngako.
24 Yesu emulolesha nonena kuti: “Vizankhale vovuta ngako kuti ŵanthu a ndalama azaloŵe mu Ufumu wa Mulungu!
25 Kulaŵila chendi, n’vosavuta kuti ngamila iloŵe pakabowo ka nsingano kusiyana na kuti munthu wolemela aloŵe mu Ufumu wa Mulungu.”
26 Amene echimvwa vamene ivi ekonsha kuti: “Lomba angapulumuke niŵani?”
27 Yove eŵauja kuti: “Vinthu vosakwanishika kuli ŵanthu, n’vokwanishika kwa Mulungu.”
28 Koma Petulo enena kuti: “Onani! Sewo tasiya vinthu vasu nokukonkhelelani.”
29 Yesu eŵauja kuti: “Shuwa nukuujani, paliye wasiya ng’anda, mwanakazi, enekwake, makolo olo ŵana, chifukwa cha Ufumu wa Mulungu
30 wamene azafwanelini vinyinji ngako kupambana vamene ivi mu nthawe* ino, ndipo mu nthawe yamene iyo ikuza, azafwane moyo wosasila.”
31 Pavuli pake, etola ŵala ophunzila 12 noluta nawo pambali ndipo eŵauja kuti: “Mvwani! Lomba tikuya ku Yelusalemu ndipo vonse vilembewa na aneneli vokhuza Mwana wa munthu vikakwanilishiwe.
32 Mwachisanzo, akamupeleke kuli ŵanthu amitundu iyakine ndipo akamuchitile vinthu viipa, kumunyoza komasoti kumutila mata.
33 Akayasilija kumukwapula akamupaye, koma pa nsiku yachitatu yove akauke.”
34 Koma ove aliye mvwishe tanthauzo ya chilichonse cha vamene ivi chifukwa mawu amene aŵa efisiwa kuli ove ndipo aliyemvwishe vamene ivo vilaŵiliwa.
35 Lomba Yesu pechisala patontho kufwika ku Yeliko, munthu muyakine asalola enkhala pansi mmbali mwa nsewu noyamba kusenga-senga.
36 Pechimvwa kuti gulu ya ŵanthu yupita pafupi na yove, ekonsha venzechitika.
37 Ove emuuja kuti: “Yesu Mnazaleti opita!”
38 Pechimvwa vamene ivo eŵilikija kuti: “Yesu, Mwana wa Davite, nichitileni chifundo!”
39 Lomba ŵanthu amene enze pasogolo eyamba kumuzuzula nomuuja kuti ankhale chelele. Koma akachita tetyo niyesoti penzeŵilikija ngako kuti: “Mwana wa Davite, nichitileni chifundo!”
40 Tetyo Yesu epanama nolamula kuti munthu wamene uyo awele naye kuli yove. Pechifwika pafupi, Yesu emukonsha kuti:
41 “Ufuna nikuchitile chinji?” Yove eyankha kuti: “Ambuye, niyavyeni kuti niyambe kulola.”
42 Lomba Yesu emuuja kuti: “Yamba kulola, chikhulupililo chako chakupojeka.”
43 Nthawe yamene iyo eyamba kulola, ndipo eyamba kumukonkhelela uku olemekeza Mulungu. Komasoti ŵanthu onse pechiwona vamene ivi, etamanda Mulungu.
Malizu a m'nyansi
^ Mu Chigiliki, “azafwane chendi chikhulupililo.”
^ Olo kuti, “nichitileni chifundo.”
^ Kupaya kwamene uku ni kupaya munthu kwa chiwembu osati mwalamulo.
^ Onani matanthauzo a mawu ayakine.