Wilembewa na Luka 19:1-48
19 Lomba Yesu eloŵa mu Yeliko, koma echingopitamo.
2 Kwamene uko kwenze munthu muyakine zina yake Zakeyo. Yove enze nkulu wa osonkhesha nsonkho ndipo enze wolemela.
3 Zakeyo enzefunishisha kuti awone Yesu, koma aliyekwanishe kumuwona chifukwa cha gulu ya ŵanthu pakuti yove enze mfupi.
4 Tetyo eutukila kusogolo nokwela m’chimuti cha nkhuyu kuti akwanishe kumuwona, chifukwa enzepita njila yamene iyo.
5 Yesu pechifwika pa malo amene awo, elolesha m’chimuti mwamene umo nomuuja kuti: “Zakeyo, seluka kulumija, chifukwa lelo nufunikila kuyankhala m’ng’anda mwako.”
6 Pechimvwa vamene ivo eseluka mokulumija ndipo emulondela m’ng’anda mwake monga mulwendo mosangalala.
7 Ŵanthu pechiwona Yesu oloŵa m’ng’anda mwamene umo, onse eyamba kung’ung’uzika kuti: “Waluta m’ng’anda ya munthu wochimwa nonkhala mulwendo wake.”
8 Koma Zakeyo epanama nouja Ambuye kuti: “Ambuye kulaŵila chendi newo nipeleke hafu ya chuma changu kuli osauka. Ndipo chilichonse chenilonda munthu aliyense* nijoshele kuwelejela maulwendo 4.”
9 Pechimvwa vamene ivi, Yesu emuuja kuti: “Lelo chipulumuso chafwika pa ng’anda ino, chifukwa nayesoti ni mwana wa Abulahamu.
10 Mwana wa munthu ewela kuzasakila-sakila komasoti kupulumusha ŵanthu oluŵila.”
11 Ove penzemvwishila vamene ivi, yove eŵauja fanizo iyakine, chifukwa enze pafupi na Yelusalemu ndipo ŵanthu amene awo enzeganiza kuti Ufumu wa Mulungu uwonekele nthawe yamene iyoletu.
12 Tetyo yove enena kuti: “Munthu muyakine wa m’banja yachifumu enzekonzekela kuti alute ku chalo chakutali kuti akalondele ufumu nojokela.
13 Lomba eita antchito ŵake okwana 10 noŵapasa ndalama zokwana ma mina* 10 ndipo eŵauja kuti, ‘Muchite malonda na ndalama zamene izi mpaka panikuti nikaweleko.’
14 Koma ŵanthu a m’chalo cha kwawo emuzonda ndipo yove pechiluta kwamene uko ove etumija nthumi kuti zikanene kuti, ‘Sewo tufunalini kuti munthu wamene uyu ankhale mfumu yasu.’
15 Pechijokela kwawo pavuli pakuti walondela ufumu wamene uyo, eita antchito ŵake ŵala ŵechipasa ndalama* kuti awele kuli yove kuti aŵelengelane nowona mwapindulila pa malonda ŵawo.
16 Woyamba ewela ndipo enena kuti, ‘Abwana, ndalama yanu yala ya mina yapindula ndalama ziyakine zokwana ma mina 10.’
17 Yove emuuja kuti, ‘Wachita luweme, niwe wantchito muweme! Chifukwa wawonesha kuti niwe wokhulupilika pa chinthu chitontho, nikupase ulamulilo wololela matauni 10.’
18 Pavuli pake kwiwela wachiŵili ndipo enena kuti, ‘Abwana, ndalama yanu yala ya mina yapindula ndalama ziyakine zokwana ma mina 5.’
19 Yove eujasoti wamene uyo kuti, ‘Nawesoti unkhale wololela matauni 5.’
20 Koma kwiwela muyakine ndipo enena kuti, ‘Abwana, ndalama yanu yala ya mina ni iyi. Nenze niimanga panyula noifisa.
21 Nichita vamene ivi chifukwa nukuyopani. Mwewo nimwe munthu muyumu ntima. Mutola vinthu vamuliye sungishe ndipo muweja vinthu vamuliye komole.’
22 Yove emuuja kuti, ‘Nikuweluze mokatijana na vawalaŵila, wantchito muipa wewo. Ukuti wenzeziŵa kuti nine munthu muyumu ntima, wotola vinthu vaniliye sungishe na kuweja vaniliye komole.
23 Lomba ndaŵa yanji uliye sungishe ndalama yangu yamene iyo* ku banki? Kuti wenze wichita tetyo, newo powela sembe niitolela pamozi na ndalama yake yapalulu.’
24 Pechichita tetyo euja ŵanthu amene enze epanama pafupi kuti, ‘Mulondeni ndalama ya mina yamene iyo muipeleka kuli wala ali na ndalama za mina zokwana 10.’
25 Koma ove emuuja kuti, ‘Abwana, uyu ali kale na ndalama za mina 10!’—
26 ‘Shuwa nukuujani, aliyense ali nazo azapasiwe ziyakinesoti zinyinji, koma wala aliye azalondewe olosoti zala zali nazo.
27 Komasoti aŵa adani ŵangu amene aliyefune kuti newo ninkhale mfumu yawo, welani nawo kuno muŵapaye newo nuwona.’”
28 Pechisilija kulaŵila vamene ivi, epitilija ulwendo wake wakuya ku Yelusalemu.
29 Lomba pechifwika kufupi na ku Betefage komasoti Betaniya palupili yuitiwa kuti lupili ya Maolivi, etumija ophunzila ŵake aŵili.
30 Yove eŵauja kuti: “Lutani mmunzi uyo wamuwona, ndipo mukayaloŵa mwamene umo mukafwane bulu ntontho mwanalume alimumangilile, wamene munthu akaliye kwelapo kufumila kale. Mukamumasule nowela naye kuno.
31 Koma aliyense akayakukonshani kuti, ‘Ndaŵa yanji mumumasula bulu wamene uyu? Mukanene kuti, ‘Ambuye omufuna.’”
32 Tetyo ŵanthu etumiwa amene awo enyamuka ndipo echiyamufwana chendi monga ni mwechiŵaujila yove.
33 Koma penzemasula bulu wamene uyo, anecho eŵakonsha kuti: “Ndaŵa yanji mumumasula bulu wamene uyu?”
34 Ove eyankha kuti: “Ambuye omufuna.”
35 Pamene apo ove etola bulu wamene uyo noluta naye kuli Yesu. Pavuli pake ove eika malaya ŵawo akunja pa nsana pa bulu wamene uyo ndipo Yesu ekwelapo.
36 Penzeyenda ŵanthu enzeyanjika malaya ŵawo akunja mu nsewu.
37 Pechifwika pafupi na nsewu wofumila mulupili ya Maolivi, gulu yonse ya ophunzila amene awo iyamba kusangalala notamanda Mulungu mokweja mawu chifukwa cha ntchito zonse za mphamvu zechiwona.
38 Ove enzenena kuti: “Wodalisiwa niwala akuza monga Mfumu mu zina ya Yehova! Ntendele kululu na ulemelelo kululu kwamene uko!”
39 Koma Afalisi ayakine mu gulu yamene iyo euja Yesu kuti: “Mphunzisi, akalipileni aŵa ophunzila ŵanu.”
40 Poyankha yove enena kuti: “Shuwa nukuujani, keno aŵa angankhale chelele, myala ingaŵilikije.”
41 Lomba Yesu pechifwika kufupi na tauni ya Yelusalemu, ewona tauni yamene iyo noyamba kuilila.
42 Yove enena kuti: “Kuti wewo lelo wenze waviziŵa vinthu vantendele—* koma lomba vafisika kuti osati ukwanishe kuviwona.
43 Chifukwa masiku azakukwanile pamene adani ŵako azamange mpanda wa vimiti vosongola kukuzenguluka. Adani amene awo azakuzalilile nokuukila* kufumila ku mbali zonse.
44 Ove azakuponeshe pansi nokuwononga pamozi na ŵana ŵako amene ali muli wewo. Ndipo azasiyelini mwala palulu pa mwala uyake muli wewo, chifukwa uliyeziŵe kuti nthawe yokuyendela yenze ikwana.”
45 Lomba eloŵa m’kachisi noyamba kupitikisha ŵanthu amene enzegulisilamo vinthu
46 noŵauja kuti: “Malemba onena kuti, ‘Ng’anda yangu izankhale ng’anda yopemphelelamo,’ koma mwewo mwaiyalusha nkhwema ya akawalala.”
47 Ndipo nsiku iliyonse yove epitilija kuphunzisa m’kachisi mwamene umo. Koma ansembe akulu, alembi na akulu-akulu a ŵanthu enzefunishisha kumupaya.
48 Koma aliyekwanishe kuchita vamene ivi chifukwa ŵanthu anyinji enzeunjikana pali yove kuti amumvwishile ndipo enzesiyanalini naye.
Malizu a m'nyansi
^ Olo kuti, “chenilonda munthu aliyense pomuyopejela mulandu.”
^ Mina yutomolewa m’Malemba a Chigiliki ni ndalama yamene yenzelema magilemu 340 ndipo yenze yolingana na madalakima 100.
^ Mu Chigiliki, “siliva.”
^ Mu Chigiliki, “siliva wangu.”
^ Kanzela kamene aka kowonesha kuti mawu amene aŵa esilila pa njila.
^ Olo kuti, “kukutamanisha.”
