Wilembewa na Luka 2:1-52
2 Lomba mmasiku amene awo, Kaisala Augusito elamula kuti ŵanthu onse m’chalo chamene icho akalembeshe ku boma.
2 (Kalembela wamene uyu enze woyambilila ndipo echitika pa nthawe yamene Kuleniyo penze gavana wa Siliya.)
3 Ŵanthu onse eluta kuyalembesha ndipo aliyense eluta ku tauni ya kwawo.
4 Nayesoti Yosefe efuma ku Galileya mu tauni ya Nazaleti noluta ku Yudeya, ku tauni ya Davite yuitiwa kuti Betelehemu, chifukwa enze wa m’banja komasoti wachivumo cha Davite.
5 Eluta kuyalembesha pamozi na Maliya wechilungulana naye mokatijana na pangano. Pa nthawe yamene iyi n’kuti Maliya wasala patontho kupeza mwana.
6 Ali kwamene uko, nthawe yakuti apeze mwana ikwana.
7 Yove evyala mwana wake woyamba mwanalume, ndipo emuvunga pa nyula nomuyoneka molyelamo vifuwo chifukwa aliyepeze malo m’ng’anda ya alwendo.
8 Mu dela yamene iyi mwenzesoti achiŵeta amene enzeyonelela kuchiŵeta kwenzelyeshela vifuwo nololela mbelele zawo usiku wonse.
9 Mwazizizi mngelo wa Yehova epanama pafupi na ove, ndipo ulemelelo wa Yehova wingweleŵela pa malo onse amene awo mwakuti echita wowa ngako.
10 Koma mngelo wamene uyo eŵauja kuti: “Osayopa! Newo nawela kuzalengeza uthenga uweme kuli mwewo wa chisangalalo chikulu chamene ŵanthu onse azaŵe nacho.
11 Chifukwa lelo, mu tauni ya Davite mwavyalika mpulumusi wanu, wamene ni Khilisitu Ambuye.
12 Nukupasani chizindikilo ichi: “Kwamene uko mukafwane mwana lucheche ali muvunge pa nyula nomuyoneka molyelamo vifuwo.”
13 Mwazizizi, pewonekela gulu ikulu yakululu ili pamozi na mngelo wamene uyo ndipo yenzetamanda Mulungu kuti:
14 “Ulemelelo kwa Mulungu wakululu, ndipo pano pa chalo ntendele pakati pa ŵanthu ŵakusangalala nawo yove.”
15 Tetyo angelo amene awo pechifumapo nojokela kululu, achiŵeta amene awo eyamba kuujana kuti: “Shuwa tiyeni tilute ku Betelehemu kuti tikawone vachitika mokatijana na vawatiziŵisha Yehova.”
16 Ove eluta kamangu ndipo echiyafwana Maliya na Yosefe komasoti mwana lucheche wamene uyo alimuyoneke molyelamo vifuwo.
17 Pechiwona vamene ivi, efotokoza uthenga wechiujiwa wokhuza mwana wamene uyu.
18 Onse amene echimvwa edabwa na vechiŵauja achiŵeta amene awo.
19 Koma Maliya esunga mawu onse amene aŵa ndipo eyamba kuganizila tanthauzo ya vamene ivi mu ntima mwake.
20 Pavuli pake ŵala achiŵeta ejokela, uku olemekeza komasoti kutamanda Mulungu chifukwa cha vonse vechimvwa nowona, mokatijana na vechiujiwa.
21 Papita masiku 8, nthawe yakuti achite mdulidwe wa wala mwana peikwana, emuteya zina yakuti Yesu. Yamene iyi ni zina yechitomola mngelo wala, Maliya akaliye nkhala na vumo.
22 Komasoti nthawe yakuti ove atuŵishiwe mokatijana na Chilamulo cha Mose peikwana, eluta na mwana wamene uyo ku Yelusalemu kuyamupeleka kwa Yehova.
23 Ivi venze vokatijana na vilembewa m’Chilamulo cha Yehova kuti: “Mwana aliyense mwanalume woyamba kuvyalika* azankhale ntuŵa kwa Yehova.”
24 Kwamene uko ove epeleka nsembe mokatijana na vachunena Chilamulo cha Yehova kuti: “njiŵa ziŵili olo ŵana aŵili a nkhunda.”
25 Lomba mu Yelusalemu mwenze munthu muyakine zina yake Simiyoni. Mwanalume wamene uyu enze wolungama komasoti wolipeleka kwa Mulungu. Yove enzeyembekezela nthawe yamene Mulungu yakuti azatonthoje Isilaeli ndipo mzimu utuŵa wenze pali yove.
26 Komasoti Mulungu emuululila kupitila mu mzimu utuŵa kuti azafwelini akaliye wona Khilisitu wa Yehova.
27 Lomba mosogolelewa na mzimu ewela ku kachisi. Ndipo makolo a Yesu, pechimuleta kuzamuchitila vechenzefuna Chilamulo,
28 yove enyamula mwana wamene uyo mmanja mwake notamanda Mulungu kuti:
29 “Lomba, Ambuye Nkulu Ngako, mulola kapolo wanu kuluta mu ntendele mokatijana na vemwinena,
30 chifukwa menso ŵangu awona njila yanu yopulumushila ŵanthu
31 yamwakonza pamenso pa ŵanthu amitundu yonse.
32 Menso ŵangu awona kungweleŵela kochosa nyula yuchingilija yukangisha mitundu ya ŵanthu kuti osati ikolola, komasoti nawona ulemelelo wa ŵanthu ŵanu Aisilaeli.”
33 Atata ŵake a mwana wamene uyo komasoti amayi ŵake enzedabwa na venzelaŵila Simiyoni vokhuza mwana wamene uyo.
34 Komasoti Simiyoni edalisa makolo amene awo ndipo euja Maliya, amayi ŵake a mwana wamene uyo kuti: “Mvwaya! Mwana wamene uyu waikiwa kuti anyinji apone komasoti kuti anyinji aukesoti mu Isilaeli. Komasoti kuti ankhale chizindikilo chakuti azashushe ŵanthu
35 (n’chendi, chibemba chitali chizakulase) kuti vakuganiza ŵanthu anyinji mu ntima mwawo viwonekele patuŵa.”
36 Kwenzesoti mneneli mwanakazi, zina yake Anna mwana wa Fanuwelo, wa m’chivumo cha Aseli. Mwanakazi wamene uyu enze wachikulile ngako ndipo enkhala pa banja na mwanalume wake kwa vyaka 7 tyala kufumila pechilungulana.*
37 Lomba echizankhala mwanakazi wamasiye ndipo enze na vyaka 84 koma enzeshotalini pa kachisi. Enzechita utumiki wopatulika usiku na nzuŵa ndipo enzelekeja kulya komasoti kupemphela mopapatila.
38 Pa nthawe yamene iyo, yove efwika pafupi noyamba kutembeja Mulungu komasoti kulaŵila vokhuza mwana wamene uyo, kuli onse amene enzeyembekezela chipulumuso cha Yelusalemu.
39 Tetyo pechichita vonse mokatijana na Chilamulo cha Yehova, ejokela ku Galileya, ku tauni yawo ya Nazaleti.
40 Mwana wamene uyo epitilija kukula komasoti kunkhala wamphamvu. Nzelu zake zenzeyangijilika ndipo Mulungu epitilija kusangalala naye.
41 Chaka chilichonse makolo ŵake enzekonda kuluta ku Yelusalemu, kuchikondwelelo cha Pasika.
42 Lomba penze na vyaka 12, ove eluta naye kwamene uko mokatijana na mwambo wachikondwelelo chamene icho.
43 Chikondwelelo chamene icho pechisila, ove enyamuka nojokela kwawo. Koma mulumbwana wamene uyo Yesu esalilila ku Yelusalemu ndipo makolo ŵake aliyeziŵe vamene ivo.
44 Ove enzeganiza kuti yove ali nawo mu gulu ya ŵanthu ŵenze nawo pa ulwendo wamene uyo, mwakuti eyenda ulwendo wa nsiku yonse. Pavuli pake eyamba kumusakila-sakila kwenekwawo na kwa ayawo.
45 Koma pechikangiwa kumufwana, ejokela ku Yelusalemu. Kwamene uko emusakila-sakila paliponse.
46 Lomba papita masiku atatu emufwana m’kachisi, alinkhale pakati pa aphunzisi ndipo enzeŵamvwishila noŵakonsha makonsho.
47 Koma onse amene enzemumvwishila edabwa ngako na mayankho ŵake komasoti powona kuti enzewomvwisha vinthu ngako.
48 Makolo ŵake amene awo pechimuwona edabwa ngako, ndipo amayi ŵake emukonsha kuti: “Mwanawe, ndaŵa yanji wativutisha teti? Newo na atata ŵako tenze na nkhaŵa ngako ndipo tenzekusakila-sakila.”
49 Koma yove eŵayankha kuti: “Ndaŵa yanji mwenzenisakila-sakila? Kansi muziŵalini kuti nufunikila kupezeka m’ng’anda ya Atata ŵangu?”
50 Koma ove aliyemvwishe venzeŵauja vamene ivo.
51 Pavuli pake enyamuka nawo pamozi nojokela ku Nazaleti ndipo epitilija kuŵamvwila. Apasoti amayi ŵake esunga luweme ngako mawu onse amene aŵa mu ntima mwawo.
52 Koma Yesu epitilija kukula mu nzelu na mu nsinkhu. Ndipo Mulungu na ŵanthu epitilija kusangalala naye.
Malizu a m'nyansi
^ Mu Chigiliki, “Mwana mwanalume aliyense wosegulila luvumo ya amayi ŵake.”
^ Mu Chigiliki, “kufumila pa undola wake.”
