Wilembewa na Luka 20:1-47
20 Nsiku iyakine penzephunzisa ŵanthu m’kachisi komasoti kulengeza uthenga uweme, kwiwela ansembe akulu-akulu, alembi pamozi na akulu
2 nakuzamukonsha kuti: “Tiujeni, kansi muli na ulamulilo wochitila vinthu vamene ivi? Olo niŵani ekupasani ulamulilo wamene uyu?”
3 Yesu eŵayankha kuti: “Nanesoti nikukonsheni konsho imozi ndipo muniyankhe:
4 Kansi ubatizo wenzechita Yohani wifumila kululu olo ku ŵanthu?”
5 Tetyo ove eyamba kukambilana kuti: “Tikanena kuti, ‘Wifumila kululu,’ yove atikonshe kuti, ‘Lomba ndaŵa yanji muliye mukhulupilile?’
6 Koma tikanena kuti, ‘Wifumila ku ŵanthu,’ ŵanthu onse amene aŵa atipaye na myala, chifukwa ove okhulupilila na ntima wonse kuti Yohani enze mneneli.”
7 Tetyo ove eyankha kuti okuziŵalini kweufumila.
8 Yesu eŵauja kuti: “Nanesoti nikuujenilini wamene enipasa ulamulilo wanuchitila vamene ivi.”
9 Lomba yove eyamba kuuja ŵanthu amene awo fanizo iyi: “Munthu muyakine elima munda wa mpesa ndipo eusiya mmanja mwa alimi noluta ku chalo chiyakine kwamene enkhalako nthawe itali.
10 Lomba nthawe ya vitwazi peikwana, etumija wantchito wake kuli alimi amene awo kuti akamupaseko viyakine mwa vitwazi va mmunda wa mpesa wamene uyo. Koma alimi amene awo emuniyata nomujosha aliye kanthu kalikonse.
11 Koma yove eŵatumijilasoti wantchito muyakine. Wamene uyosoti emuniyata nomuchitila vinthu viipa,* ndipo emujosha aliye kanthu kalikonse.
12 Etumijasoti wachitatu. Wamene uyosoti emuchita ngako nomutaya kunja.
13 Pevichitika tetyo, munecho wa munda wa mpesa wala enena kuti, ‘Nichite chinji lomba? Chabwino, nitumije mwana wangu wokondewa. Mosakaikila uyu mwana wangu yeka akamulemekeze.’
14 Alimi amene awo pechimuwona eyamba kukambilana kuti, ‘Yaa, uyu niye akuti azatole chuma. Tiyeni timupaye kuti chuma chamene icho chizankhale chasu.’
15 Tetyo emufumya mmunda wa mpesa wamene uyo nomupaya. Lomba kansi munecho wa munda wa mpesa wamene uyo azachite chinji kuli alimi amene awo?
16 Yove azawele nopaya alimi amene awo ndipo munda wa mpesa wamene uyo azaupeleke kuli ayakine.”
Pechimvwa vamene ivi ove enena kuti: “Yayi osati vinkhale tetyo shuwa!”
17 Koma yove eŵaloleshesha nonena kuti: “Pala malemba onena kuti, ‘Mwala wechikana omanga ng’anda, wankhala mwala wapakona wofunika ngako.’* Kansi mawu amene aŵa otanthauza chinji?
18 Aliyense akuti azaponele pa mwala wamene uyo azafwaike. Ndipo aliyense wamene akuti azaponelewe na mwala wamene uyo, azasasanthike.”
19 Alembi na ansembe akulu-akulu ŵala pechiziŵa kuti mu fanizo yamene iyo onena za ove, eyeja-yeja kufwana mpata kuti amukate nthawe yamene iyoletu, koma enzeyopa ŵanthu.
20 Lomba pechiwoneshesha vochita vake, etuma aganyu mwachisinsi kuti akaliwoneshe monga ni olungama na cholinga chakuti akamupezele vifukwa pa mawu ŵangalaŵile, kuti akamupeleke ku boma na kwa gavana.
21 Tetyo ove emukonsha kuti: “Mphunzisi, tuziŵa kuti vamunena na kuphunzisa ni vachendi ndipo muliye sankho, koma muphunzisa mu njila ya Mulungu mokatijana na choonadi.
22 Kansi n’vololeka kuti sewo tikopeleka nsonkho kwa Kaisala olo yayi?”
23 Koma Yesu eziŵa penze maganizo ŵawo ndipo eŵauja kuti:
24 “Niwonesheni ndalama ya dinali. Kansi chinso na mawu ali pamene apo ni vaŵani?” Ove eyankha kuti: “Ni va Kaisala.”
25 Yove eŵauja kuti: “Tetyo pelekani vinthu va Kaisala kwa Kaisala, koma va Mulungu kwa Mulungu.”
26 Ove ekangiwa kumutapa nkamwa pali vamene ivi vechilaŵila pa menso pa ŵanthu, koma edabwa na yankho yake mwakuti echingonkhala chelele kusoŵa cholaŵila.
27 Koma Asaduki ayakine, amene onena kuti akufwa azaushiwelini, ewela nomukonsha kuti:
28 “Mphunzisi, Mose etilembela kuti, ‘Keno mwanalume wamwalila nosiya mwanakazi koma aliye vyale naye ŵana, nkwake ofunikila kulungula mwanakazi wamasiye wamene uyo nomuvyalila ŵana wala nkwake.’
29 Lomba penze analume 7 pokwawo. Woyamba elungula mwanakazi, koma emwalila akaliye vyala naye mwana.
30 Wachiŵilisoti chimozi-mozi.
31 Pavuli pake wachitatu emulungula. Vichitika chimozi-mozi kuli analume onse ŵala 7, onse emwalila osasiya ŵana.
32 Pamapeto pake wala mwanakazi emwalilasoti.
33 Kansi pamene apa, akufwa akazaushiwa mwanakazi wamene uyu azankhale wa ŵani? Pakuti onse 7 emulungula.”
34 Yesu eŵayankha kuti: “Ŵana a mu nthawe* ino olungula na kulunguliwa.
35 Koma amene awonewa kuti ni oyenelela kuzafwana moyo pa nthawe yamene iyo nakuzaushiwa kwa akufwa azalungulelini olo kulunguliwa.
36 Komasoti ove azafwelinisoti, chifukwa azankhale monga ni angelo. Ove azankhalesoti ŵana a Mulungu pakuti ni ŵana ouka kwa akufwa.
37 Koma zakuti akufwa oushiwa olosoti Mose efotokoza mu nkhani ya pachizambwa chaminga, yove pechinena kuti Yehova ni ‘Mulungu wa Abulahamu, Mulungu wa Isaki na Mulungu wa Yakobo.’
38 Yove ni Mulungu wa ŵanthu amoyo, osati akufwa, chifukwa kuli yove* onse amene aŵa ali moyo.”
39 Poyankha ayakine mwa alembi amene awo enena kuti: “Mphunzisi, mwalaŵila luweme.”
40 Elaŵila vamene ivi chifukwa aliyekwanishesoti kutang’a ntima kuti amukonshe konsho iyakine olo imozi.
41 Lomba yove eŵakonsha kuti: “Ndaŵa yanji onena kuti Khilisitu ni mwana wa Davite?
42 Chifukwa Davite wamene uyo enena m’buku ya Masalimo kuti, ‘Yehova euja Ambuye wangu kuti: “Nkhala ku kwanja yangu ngayo
43 mpaka niike adani ŵako kuti chinkhale chokandapo mendo ŵako.”’
44 Tetyo Davite emutomola kuti Ambuye. Lomba vukwanishika tyani kuti ankhale mwana wake?”
45 Pavuli pake ŵanthu onse otetekela, yove euja ophunzila ŵake kuti:
46 “Chenjelani na alembi amene okonda kuyenda-yenda alivwale mikhanjo komasoti okonda kupasiwa moni mmamaketi. Okondasoti kunkhala mmipando yakusogolo* mmalo opemphelela komasoti mmalo olemekezeka ngako pa chakulya cha nchingulo.
47 Ove olonda chuma cha anakazi* amasiye ndipo opeleka mapemphelo atali-atali pofuna kuliwoneshela.* Ŵanthu amene aŵa azalondele chilango choŵaŵa ngako.”*
Malizu a m'nyansi
^ Olo kuti, “emuniyata nomunyoza.”
^ Mu Chigiliki, “mutu wa kona.”
^ Onani matanthauzo a mawu ayakine.
^ Olo kuti, “chifukwa yove owona kuti.”
^ Olo kuti, “mmimpando iweme ngako.”
^ Mu Chigiliki, “ove akulya ng’anda za anakazi.”
^ Olo kuti, “atali-atali mwachinyengo.”
^ Olo kuti, “chilango champhamvu.”
