Wilembewa na Luka 21:1-38
21 Lomba pechiloleshesha ewona ŵanthu olemela oponya vopeleka vawo moponyamo vopeleka.*
2 Pavuli pake ewona mwanakazi muyakine wamasiye wosauka oponya tundalama tuŵili tutontho, tuliye mphamvu ngako.*
3 Ndipo yove enena kuti: “Shuwa nukuujani kuti mwanakazi wamasiye wosauka wamene uyu waponya zinyinji kupambana ayakine onse amene aponya ndalama zawo.
4 Chifukwa onse amene aŵa aponya zatapa pa zinyinji zali nazo, koma mwanakazi wamene uyu mu umphaŵi wake, waponya zonse zamene sembe zamuyavya pa moyo wake.”
5 Nthawe iyakine, ŵanthu ayakine penzelaŵila za kachisi mwechimuwamililishila na myala iweme ngako komasoti mphaso zopelekewa kwa Mulungu,
6 yove enena kuti: “Ponena za vinthu vamuwona vamene ivi, masiku azafwike pamene pazasalelini mwala uliwonse palulu pa mwala uyake wamene ukuti uzaleke poneshewa.”
7 Lomba emukonsha kuti: “Mphunzisi, kansi vinthu vamene ivi vizachitike nthawe yanji ngako-ngako, ndipo chizindikilo chowonesha kuti nthawe yakuti vinthu vamene ivi vichitike yasala patontho chizankhale chinji?”
8 Yove eyankha kuti: “Samalani kuti osati azakuluŵilisheni, chifukwa anyinji azawele mu zina yangu nonena kuti, ‘Khilisitu wala ni newo,’ komasoti azanene kuti, ‘Nthawe yala yavwendela.’ Osati muzaŵakonkhelele.
9 Komasoti, mukazakumvwa chongo cha nkhondo na mbili za nkhondo, osati muzachite wowa. Chifukwa vamene ivi vufunikila kuchitika poyamba, koma mapeto azafwikelini nthawe yamene iyo.”
10 Pavuli pake eŵauja kuti: “Ntundu uzayambane na ntundu uyakine ndipo ufumu uzayambane na ufumu uyakine.
11 Kuzachitike vivomezi vamphamvu ndipo kuzankhale milili na njala mmalo osiyana-siyana. Kuzawoneke vinthu voyofya ndipo kululu kuzawoneke vizindikilo vodabwisa.
12 Koma vinthu vonse vamene ivi vikaliyechitika, ŵanthu azakukateni nokutamanishani ndipo azakupelekeni ku malo opemphelela na ku djeli. Azakupelekeni ku mafumu na ku magavana chifukwa cha zina yangu.
13 Vamene ivi vizakupaseni mpata wakuti muchitile umboni.
14 Tetyo simikijilani mmitima yanu kuti osati muchitekonzekela vamukuti mukayankhe politeteza,
15 chifukwa newo nizakuujeni mawu ŵamukuti mukalaŵile komasoti nizakupaseni nzelu zamene ŵanthu onse okushushani azakwanishelini kuzikana olo kuzishusha.
16 Komasoti makolo ŵanu ngawo-ngawo, enekwanu, achibale ŵanu komasoti azishamwali wanu, azakupelekeni ndipo azapaye ayakine a mwewo.
17 Ŵanthu onse azakuzondeni chifukwa cha zina yangu.
18 Koma lomba olo sisi imozi yeka ya mmutu mwanu izawonongekelini.
19 Koma keno mwewo muzapilile, muzafwane moyo.
20 Koma mukazawona magulu a nkhondo azinga Yelusalemu, muzaziŵe kuti tauni yamene iyi yasala patontho kuwonongewa.
21 Pamene apo amene ali mu Yudeya azayambe kuthaŵila kumalupili, ndipo amene ali nkati mwa tauni yamene iyo azafumemo. Amene ali mmadela akuminzi osati azaloŵe mu tauni yamene iyo,
22 chifukwa amene aŵa ni masiku opeleka chiweluzo* kuti vonse vilembewa vikwanilishiwe.
23 Soka kuli anakazi amavumo komasoti onyosha ŵana mmasiku amene awo! Chifukwa mu chalo ichi muzankhale mavuto akulu komasoti ukali pali ŵanthu amene aŵa.
24 Ŵanthu azapaiwe na chibemba komasoti kutolewa kuluta nawo kumitundu iyakine yonse kuyankhala akapolo. Ŵanthu amitundu iyakine azakande-kande Yelusalemu mpaka nthawe zoikiliwatu za ŵanthu a mitundu iyakine yamene iyo zizakwane.
25 Komasoti pazankhale vizindikilo pa zuŵa, mwezi na nyenyezi. Pa chalo ŵanthu amitundu iyakine azatamane chifukwa chosiliwa nzelu powona kuti nyanja yuunga komasoti yuŵinduka.
26 Ŵanthu azakomoke chifukwa cha wowa komasoti chifukwa choyembekezela vikuti vichitikile chalo kwamene kuli ŵanthu, pakuti mphamvu za kululu zizanyang’anyike.
27 Pavuli pake azawone Mwana wa munthu akuza mu nkumbi na mphamvu komasoti ulemelelo ukulu.
28 Koma vinthu vamene ivi vikazayamba kuchitika, muzapaname noimya mitu yanu, chifukwa chipulumuso chanu chavwendela.”
29 Pechilaŵila vamene ivi, eŵauja fanizo yakuti: “Wonesheshani chimuti cha nkhuyu na vimiti viyakine vonse.
30 Mukawona vimiti vutumbila, muziŵa chendi kuti lomba mainza ali pafupi.
31 Chimozi-mozi na mwewosoti, mukazawona vinthu vamene ivi vuchitika, muzaziŵe kuti Ufumu wa Mulungu wavwendela.
32 Shuwa nukuujani kuti m’badwo uyu uzasilelini wonse kufwa, mpaka vinthu vonse vizachitike.
33 Kululu na chalo vizafumepo, koma mawu ŵangu azankhalepo mpaka kale-kale.
34 Koma samalani kuti mitima yanu osati ilemewe na kulya ngako, kumwa ngako komasoti nkhaŵa za moyo, kuti nsiku yamene iyo ingazakufwikilani mozizimusha
35 monga ni ukuka. Chifukwa izafwikile onse onkhala pa chalo.
36 Tetyo nkhalani tuni ndipo mukopemphela mopapatila nthawe zonse, kuti muzakwanishe kuthaŵa vinthu vonse vamene ivi vamene vufunikila kuchitika, komasoti kuti muzakwanishe kupanama pamenso pa Mwana wa munthu.”
37 Nzuŵa Yesu enzephunzisa m’kachisi, koma usiku enzeluta kuyayona kulupili ya Maolivi.
38 Ndipo ŵanthu onse enzechelela mmawa ngako kuluta kuli yove ku kachisi kuti akamumvwishile.
Malizu a m'nyansi
^ Olo kuti, “m’bokosi ya vopeleka.”
^ Mu Chigiliki, “malepitoni aŵili.”
^ Olo kuti, “masiku opeleka chilango.”
