Wilembewa na Luka 22:1-71
-
Ansembe epangana kuti apaye Yesu (1-6)
-
Kukonzekela Pasika wosilijila (7-13)
-
Kuyambisha mwambo wa Chakulya cha Nchingulo cha Ambuye (14-20)
-
“Wonipeleka ali nane pamozi pano pathebo” (21-23)
-
Ekangana ngako za wamene enze nkulu (24-27)
-
Pangano ya Yesu ya ufumu (28-30)
-
Elaŵililatu kuti Petulo azamukane (31-34)
-
Kufunika konkhala okonzeka; vibemba viŵili (35-38)
-
Pemphelo ya Yesu pa Lupili ya Maolivi (39-46)
-
Yesu ekatiwa (47-53)
-
Petulo ekana Yesu (54-62)
-
Yesu echitiliwa vinthu viipa (63-65)
-
Eluta naye ku Khoti Ikulu ya Ayuda (66-71)
22 Lomba Chikondwelelo cha Mikate Iliye Vofufumisha, chamene chenzeziŵikasoti kuti Pasika, chenze chivwendela.
2 Komasoti ansembe akulu-akulu na alembi enzesakila-sakila njila iweme yangapailemo Yesu, pakuti enzeyopa ŵanthu.
3 Koma Satana eloŵa mwa Yudasi, wamene enzeziŵika kuti Sikaliyoti, mmozi wa ophunzila 12 ŵala.
4 Yove eluta kuyakambilana na ansembe akulu-akulu na opanamila kachisi vokhuza mwangamupelekele kuli ove.
5 Ove ekondwela ndipo ekatijana kuti amupase ndalama za nsimbi.
6 Tetyo yove evomekeja ndipo eyamba kusakila mpata uweme kuti amupeleke kuli ove paliye gulu ya ŵanthu pafupi.
7 Lomba nsiku ya Chikondwelelo cha Mikate Iliye Vofufumisha ifwika, nsiku yamene nsembe ya Pasika yenzefunikila kupelekewa.
8 Yesu etumija Petulo na Yohani noŵauja kuti: “Nkhoyani mukatikonzele Pasika kuti tilye.”
9 Ove emukonsha kuti: “Kansi mufuna tikakukonzeleni kuni?”
10 Yove eŵayankha kuti: “Mukaloŵa mu tauni, mwanalume muyakine akakumane namwe alitwike nongo ya manzi. Mukamukonkhelele m’ng’anda yati akaloŵe.
11 Ndipo mukauje munecho wa ng’anda yamene iyo kuti, ‘Mphunzisi wanena kuti: “Chipinda cha alwendo chili kuni chaningalyelemo Pasika newo na ophunzila ŵangu?”’
12 Ndipo munthu wamene uyo akakuwonesheni chipinda chikulu cha mmululu chokonzewa luweme. Mukakonzele mwamene umo.”
13 Tetyo enyamuka ndipo vichitika chendi ndendende monga ni mwechiŵaujila yove. Ndipo ekonza vinthu vonse vofunikila pa Pasika.
14 Nthawe peikwana, enkhala pa thebo ya chakulya pamozi na atumwi ŵake.
15 Lomba eŵauja kuti: “Nankhala nufunishisha ngako kuti nilye Pasika wamene uyu pamozi na mwewo nikaliye yamba kutamana.
16 Chifukwa nukuujani kuti nizalyelinisoti Pasika, mpaka vonse vakupanamila Pasika wamene uyu vizakwanilishiwe mu Ufumu wa Mulungu.”
17 Lomba elondela kapu nopemphela, pavuli pake enena kuti: “Londelani kapu iyi, ndipo monse mumwe mopasilana.
18 Shuwa nukuujani, kuyambila lomba nizamwelinisoti chakumwa chofumila ku mphesa mpaka Ufumu wa Mulungu uzawele.”
19 Pechichita tetyo etola nkate, pechipemphela eusuna-suna noŵapasa ndipo enena kuti: “Nkate uyu upanamila muŵili wangu wamene upelekewa chifukwa cha mwewo. Mukochita vamene ivi ponikumbukila.”
20 Lomba echitasoti chimozi-mozi na kapu pechilya chakulya cha nchingulo chamene icho. Yove enena kuti: “Kapu iyi yupanamila pangano yanyowani yamene inkhazikishiwa pokatishila ntchito milopa yangu, yamene ikuti ikhesewe chifukwa cha mwewo.
21 Lomba onani! Akuti anipeleke nili naye pamozi pa thebo pamene pano.
22 Chifukwa Mwana wa munthu afumepo mokatijana na vinthu vilembewa kale. Koma soka kuli munthu omupeleka!”
23 Tetyo eyamba kukambilana pakati pawo vokhuza ekonza chiwembu chamene icho.
24 Pavuli pake eyamba kukangana ngako vokhuza wamene enze nkulu ngako.
25 Koma Yesu eŵauja kuti: “Mafumu a ŵanthu amitundu iyakine ochita ulamulilo pa ŵanthu ŵawo, ndipo amene ali na mphamvu pa ŵanthu amene awo oziŵika kuti ni ŵanthu amene ochitila ayakine viweme.
26 Mwewo osati munkhale tetyo. Koma wamene ni nkulu ngako pa monse ankhale monga ni ntontho ngako pa monse, ndipo wamene ni nsogoleli ankhale monga ni wotumikila.
27 Kansi nkulu ni ŵani, ni wala akulya pa thebo olo wala otumikila? Kansi ni walalini akulya pa thebo? Koma newo nili pakati panu monga wotumikila.
28 Koma olo n’tetyo, mwewo niye mwapitilija kunkhala na newo mmayeselo ŵangu.
29 Tetyo nuchita namwe pangano, molingana na mwachitila Atata kuchita pangano ya ufumu na newo,
30 kuti mukalye na kumwa pa thebo yangu mu Ufumu wangu, komasoti kuti mukankhale mmipando yachifumu kuweluza mabanja 12 a Isilaeli.
31 Simoni, Simoni! Shuwa Satana ofuna kuti mwewo monse akupeteni monga ni tiligu.
32 Koma newo nakupemphelela kuti chikhulupililo chako osati chisile. Tetyo nawesoti ukajokela, ukalimbikise akwako.”
33 Pamene apo yove euja Yesu kuti: “Ambuye, nine wokonzeka kuluta namwe pamozi ku djeli olo kufwa namwe pamozi.”
34 Koma yove enena kuti: “Nukuuja wewo Petulo, kombwe akaliyelila lelo, unikane katatu kuti uniziŵalini.”
35 Yesu eujasoti ophunzila amene awo kuti: “Penikutumijani muliye chikwama cha ndalama, kachola ka vakulya olo nsapato, kansi mwisoŵa kanthu?” Ove enena kuti: “Yayi!”
36 Pavuli pake eŵauja kuti: “Koma lomba wala ali na chikwama cha ndalama achitakule, chimozi-mozisoti kachola ka vakulya. Ndipo wala aliye chibemba agulise malaya ŵake akunja nogula chibemba.
37 Chifukwa nukuujani kuti vala vilembewa vufunika kukwanilishiwa pali newo, vakuti, ‘Yove eikiwa mugulu ya ŵanthu asamvwila malamulo.’ Vili tetyo chifukwa vala vilaŵiliwa vokhuza newo vukwanilishiwa.”
38 Lomba ove enena kuti: “Ambuye, onani! Tili na vibemba viŵili ivi.” Yove eŵauja kuti: “Vamene ivi n’vokwanila.”
39 Pechifuma kwamene uko eluta kulupili ya Maolivi monga ni mwenzechitila nthawe zonse ndipo ophunzila ŵake nawosoti emukonkhelela.
40 Pechifwika pa malo amene awo, euja ophunzila amene awo kuti: “Pitilijani kupemphela kuti osati muloŵe mmayeselo.”
41 Yove efuma penze ophunzila amene awo noyenda kansenga kutalimpha kwake monga nipaungaponele mwala munthu akauthusa. Kwamene uko egwada noyamba kupemphela
42 kuti: “Atata, keno mufuna, nichoseleni kapu iyi. Koma lomba vamufuna mwewo vichitike, osati vanufuna newo.”
43 Pechichita tetyo, mngelo wofumila kululu ewonekela kuli yove nomulimbikisa.
44 Koma etamana ngako mu ntima mwake, mwakuti epitilija kupemphela na ntima wonse ndipo chiŵe chake chenzewoneka monga ni madontho amilopa yamene yuponela pansi.
45 Pechinyamuka pamene apo penzepemphela nojokela kwenze ŵala ophunzila ŵake, eŵafwana kuti ayona chifukwa enze efoka na chisoni.
46 Yove eŵauja kuti: “Ndaŵa yanji muyona? Ukani ndipo mupitilije kupemphela kuti osati muloŵe mmayeselo.”
47 Akalilaŵila tetyo, pefwika gulu ya ŵanthu pamozi na Yudasi mmozi wa ophunzila 12 ŵala, yove niye enzeŵasogolela. Ndipo Yudasi eluta penze Yesu kuti akamupase kisi.
48 Koma Yesu emukonsha kuti: “Yudasi, kansi upeleka Mwana wa munthu na kisi?”
49 Ŵanthu enze naye pafupi pechiwona vamene ivi venzechitika enena kuti: “Ambuye, kansi tiŵachentchene na chibemba?”
50 Mmozi wa ove echentchena chendi wantchito wa nkulu wa ansembe notendelatu kwatu yake yaku kwanja ngayo.
51 Koma Yesu enena kuti: “Osachita vamene ivi.” Ndipo etola yala kwatu nomupojeka.
52 Lomba Yesu ekonsha ansembe akulu-akulu, opanamila kachisi na akulu amene ewela kuzamukata kuti: “Ndaŵa yanji mwawela na vibemba na vinkholi monga mukuzalimbana na chigaŵenga?
53 Nsiku iliyonse nenze namwe m’kachisi koma muliyenikate. Koma ino lomba ni nthawe yanu komasoti nthawe ya ulamulilo wa mfinzi.”
54 Pevichitika tetyo emukata nomutola, ndipo echiyamuloŵesha m’ng’anda ya nkulu wa ansembe. Koma Petulo enzeŵakonkhelela aliko patali.
55 Pechikunjika mulilo nkati mwa bwalo nonkhala pansi onse pamozi, Petulo naye enkhala nawo pamozi pamene apo.
56 Koma msimbi muyakine wantchito pechimuwona alinkhale pafupi na mulilo wongweleŵela, emuloleshesha nonena kuti: “Aŵa amundala nawosoti enze naye pamozi.”
57 Koma yove ekana nonena kuti: “Wewo msimbi, wamene uyu newo numuziŵalini.”
58 Papita kanthawe patontho, munthu muyakine emuwona nonena kuti: “Wewosoti uli mu gulu ya ophunzila ŵake.” Koma Petulo enena kuti: “Wewo munthuwe yayi ninewolini.”
59 Papita pafupi-fupi wani awa, munthu muyakinesoti eyamba kulaŵila mosimikija kuti: “Shuwa nukaikilalini, uyu munthu enze nayesoti pamozi, komasoti wamene uyu ni Mgalileya!”
60 Koma Petulo enena kuti: “Wewo munthuwe, newo nuviziŵalini vaulaŵila.” Nthawe yamene iyo akalilaŵila tetyo, kombwe elila.
61 Pevichitika tetyo Ambuye echeuka nololeshesha Petulo, ndipo Petulo ekumbukila ŵala mawu ŵechimuuja Ambuye akuti: “Kombwe akaliyelila lelo, unikane katatu.”
62 Pavuli pake Petulo efuma panja noyamba kulila moŵaŵiwa ntima ngako.
63 Lomba ŵala analume ekata Yesu, eyamba kumuchitila vinthu viipa komasoti kumuniyata.
64 Ove enzemuvala kumenso nomukonsha kuti: “Lotela. Wakuniyata ni ŵani?”
65 Ndipo epitilija kulaŵila vinthu vinyinji vomunyoza.
66 Pavuli pakuti kwacha, bungwe ya akulu, kupamikijapo ansembe akulu-akulu komasoti alembi, eungana pamozi, ndipo eluta naye ku malo a Khoti Ikulu ya Ayuda.* Kwamene uko ove enena kuti:
67 “Tiuje keno niwe Khilisitu.” Koma yove eŵayankha kuti: “Olo nikuujeni, mukhulupililelini.
68 Komasoti nikakukonshani, mungakwanishelini na patontho kumo kuyankha.
69 Koma kufumila lelo mpaka kusogolo, Mwana wa munthu azankhale ku kwanja ngayo yamphamvu ya Mulungu.”
70 Pechilaŵila vamene ivi onse enena kuti: “Kansi niye kuti niwe Mwana wa Mulungu?” Yove eŵayankha kuti: “Mwewosoti mulaŵila mweka kuti nine wamene.”
71 Ove enena kuti: “Tisakililenjisoti umboni uyakine? Apa talimvwila seka kufumila pakamwa pake.”
Malizu a m'nyansi
^ Mu Chigiliki, “Sanihedilini.”
