Wilembewa na Luka 23:1-56
23 Tetyo gulu yonse inyamuka pamozi na Yesu noluta kwa Pilato.
2 Lomba eyamba kumuyopejela kuti: “Sewo tafwana uyu munthu osokoneza ntundu wasu, olesha ŵanthu kuti osati akosonkha nsonkho kwa Kaisala komasoti onena kuti ni Khilisitu mfumu.”
3 Lomba Pilato emukonsha kuti: “Kansi niwe Mfumu ya Ayuda?” Yove eyankha kuti: “Vili tetyo monga ni mwamwanenela.”
4 Pavuli pake Pilato euja ansembe akulu-akulu na gulu ya ŵanthu amene awo kuti: “Nufwanalini mulandu uliwonse muli uyu munthu.”
5 Koma ove eyumilila nonena kuti: “Yove uyu osokoneza ŵanthu pophunzisa mu Yudeya monse, kufumila ku Galileya mpaka kuzafwika kuno.”
6 Pilato pechimvwa vamene ivo, ekonsha keno munthu wamene uyu ni Mgalileya.
7 Lomba pechiziŵa kuti ofumila mu chigawo chakutonga Helode, emutumija kwa Helode, wamenesoti mmasiku amene awo enze mu Yelusalemu.
8 Helode pechiwona Yesu ekondwela ngako. Kwa nthawe itali yove enzefunishisha kuti awone Yesu chifukwa enze echimvwa vinyinji vokhuza yove. Komasoti enzeyembekezela kuti awone chizindikilo changachite yove.
9 Tetyo eyamba kumukonsha vinthu vinyinji, koma yove aliye muyankhe.
10 Koma olo n’tetyo ansembe akulu-akulu na alembi enzekungopanama-panama noyamba kumuyopejela mwaukali.
11 Lomba Helode pamozi na masodja ŵake emuchitila vinthu viipa. Emunyoza pomuvwalika chovwala chiweme ngako, pavuli pake emutumijasoti kwa Pilato.
12 Nsiku yamene iyo Helode enkhala shamwali wa Pilato, koma kuvuli konse vamene ivi vikaliyechitika enzezondana ngako.
13 Lomba Pilato eunganija ansembe akulu-akulu, otonga na ŵanthu ayakine
14 noŵauja kuti: “Mwewo mwaleta uyu munthu kuli newo na mulandu wakuti olimbikisa ŵanthu kuti akoukila. Koma mwawona mweka! Newo namukonsha pamenso panu ndipo niliyemufwane na chifukwa chomupasila iyi milandu yamumuyopejela.
15 Ndipo olo Helode aliyemufwane na mulandu, n’chifukwa chake wamujoshela kuli sewo. Shuwa wamene uyu aliyechite chilichonse choyenelela chilango cha imfwa.
16 Tetyo ningomukwapula nomumasula.”
17 ——
18 Koma gulu yonse ya ŵanthu iŵilikija kuti: “Wamene uyu musilijane naye tyala, koma sewo mutimasulile Balaba!”
19 (Munthu wamene uyu eikiwa mu djeli chifukwa cha kuukila boma kwichitika mu tauni yamene iyo komasoti chifukwa chopaya munthu.)
20 Pilato elaŵila nawosoti kachiŵili chifukwa enzefunishisha kuti amasule Yesu.
21 Lomba ŵanthu amene awo eyamba kuŵilikija kuti: “Apanyikiwe wamene uyo! Apanyikiwe wamene uyo!”
22 Eŵakonsha kachitatu kuti: “Ndaŵa yanji? Kansi wamene uyu waphoniya chinji? Newo niliyemufwane na chifukwa chilichonse chomupaila. Tetyo nimukwapule nomumasula.”
23 Pechimvwa vamene ivi emuyumilila mokweja mawu kuti Yesu apaiwe mphela. Ŵanthu amene awo enzeŵilikija mwamphamvu mwakuti Pilato echingovomela.
24 Tetyo Pilato epeleka chiweluzo mokatijana na venzefuna ŵanthu amene awo.
25 Yove emasula munthu wenzefuna ŵanthu amene awo, wamene eikiwa mu djeli pa mulandu woukila boma komasoti wopaya munthu. Koma Yesu emupeleka mmanja mwawo kuti achite venzefuna.
26 Penzeluta naye, ove ekata Simoni waku Kulene, wamene enzefumila ku dela yakuminzi. Ove emutwika chimuti chotamanilapo* kuti achitakule nokonkhelela mmavuli mwa Yesu.
27 Gulu ikulu ya ŵanthu yenzemukonkhelela kupamikijapo anakazi anyinji amene enzeliniyata panganga chifukwa cha chisoni komasoti kumulila.
28 Yesu echeukila kwenze anakazi amene awo nonena kuti: “Mwewo ŵana anakazi a Yelusalemu, lekani kunilila. Koma mulilile mweka na ŵana ŵanu.
29 Chifukwa masiku akuza pamene ŵanthu azanene kuti, ‘Osangalala ni anakazi aliye ŵana, anakazi akaliye vyalapo, komasoti anakazi akaliye nyonshapo!’
30 Mmasiku amene awo ove azayambe kuuja malupili kuti, ‘Tiponeleni!’ ndipo azauje malupili atontho-atontho kuti, ‘Tifwichileni!’
31 Keno ochita vinthu vamene ivi chimuti chikali chinana, kuli tyani chimuti chamene icho chikazayuma?”
32 Ŵanthu amene awo etolasoti analume ayakine aŵili, amene enze vigaŵenga, kuti akaŵapaile pamozi na Yesu.
33 Lomba pechifwika pa malo oitiwa kuti Chibade, emukhomelela pachimuti pamozi na vala vigaŵenga. Chimozi echipanyika ku kwanja ngayo yake ndipo chiyakine chenze kumanjele kwake.
34 Koma Yesu enena kuti: “Atata, akhululukileni, chifukwa oziŵalini vakuchita.” Ove eyaŵana vovwala vake pochita madjiki.
35 Ŵanthu echingopanama nololeshesha venzechitika vamene ivo. Koma otonga enzemunyoza moseka nonena kuti: “Ayakine ekwanisha kuŵapulumusha, mulekeni alipulumushe yeka, keno ni Khilisitu chendi wa Mulungu, Wosankhiwa.”
36 Olo masodja nawosoti enzemuchitila vinthu viipa, enzewela kuzamupasa vinyu wowawasha
37 nonena kuti: “Keno niwe Mfumu ya Ayuda, lipulumushe weka.”
38 Palulu pake elembapo mawu akuti: “Uyu ni Mfumu ya Ayuda.”
39 Lomba mmozi wa vala vigaŵenga vechipanyikiwa navo pamozi, eyamba kumulaŵilila mawu aipa akuti: “Kansi wewo niwelini Khilisitu? Lipulumushe weka, pamozi na sewo.”
40 Poyankha wala muyake emuzuzula nonena kuti: “Kansi wewo uyopalini Mulungu powona kuti nawesoti ulondela chilango cholingana na cha munthu wamene uyu?
41 Sewo ni pake kulangiwa teti, chifukwa tulondela vetenzefunikila kulondela mokatijana na vetichita. Koma uyu munthu aliyephoniye chilichonse.”
42 Pavuli pake enena kuti: “Yesu, mukanikumbukile mukayaloŵa mu Ufumu wanu.”
43 Yesu emuuja kuti: “Shuwa nukuuja lelo, wewo uzankhale na newo m’Paladaiso.”
44 Apa n’kuti nthawe ili cha mma 12 koloko nzuŵa,* koma kwichita mfinzi chalo chonse chamene icho mpaka 3 koloko nzuŵa,*
45 chifukwa zuŵa ichita mfinzi. Pa nthawe yamene iyi nyula yochingilijila ya m’ng’anda yopatulika ikezuka pakati kufumila palulu mpaka pansi.
46 Pavuli pake Yesu eŵilikija mokweja mawu kuti: “Atata, nupeleka mzimu wangu mmanja mwanu!” Pechilaŵila vamene ivi esilijika.
47 Pechiwona vamene ivo vichitika, nsogoleli wa masodja eyamba kutamanda Mulungu kuti: “Kulaŵila chendi munthu uyu enze wolungama.”
48 Ŵanthu onse enze esonkhana kwamene uko kuzawona vamene ivo venzechitika, pechiwona vonse vichitika, ejokela kwawo uku oliniyata panganga.
49 Ŵanthu onse enzemuziŵa epanamako patali. Komasoti anakazi enzemukonkhelela kufumila ku Galileya enze pamene apo ndipo ewona vinthu vamene ivo.
50 Lomba penze mwanalume muyakine zina yake Yosefe, wamene enze wamu Khoti Ikulu ya Ayuda. Munthu wamene uyu enze muweme ntima komasoti wolungama.
51 (Yove aliyevomekeje chiwembu chawo komasoti vechichita.) Yosefe enze waku Alimateya, tauni ya Ayudeya ndipo enzeyembekezela Ufumu wa Mulungu.
52 Yove eluta kwa Pilato kuyasenga thupi ya Yesu.
53 Tetyo eiselusha noivunga pa nyula iweme ngako ndipo eiika mmanda* ŵechichompha pachimwala, amene enze akaliye ikamo munthu kufumila kale.
54 Lomba yenze nsiku yokonzekela, ndipo nsiku ya Sondo yenze isala patontho kuyamba.
55 Koma anakazi ewela pamozi na Yesu kufumila ku Galileya, emukonkhelela ndipo ewona manda amene awo* komasoti mwechiikila thupi yake.
56 Pechichita tetyo ejokela kuyakonza vonunkhilisha na mafuta onunkhila. Koma lomba pa nsiku ya Sondo epumula mokatijana na chilamulo.
Malizu a m'nyansi
^ Onani matanthauzo a mawu ayakine.
^ Mu Chigiliki, “awazi ya 6,” kuŵelenga kufumila mma 6 koloko mmawa.
^ Mu Chigiliki, “awazi ya 9,” kuŵelenga kufumila mma 6 koloko mmawa.
^ Olo kuti, “manda achikumbukilo.”
^ Olo kuti, “manda achikumbukilo amene awo.”