Wilembewa na Luka 24:1-53
24 Koma pa nsiku yoyamba ya sondo, anakazi ŵala echelela mmawa ngako kuluta ku manda kwamene uko,* alinyamule vonunkhilisha vala vechikonza.
2 Koma efwana kuti chala chimwala chagugulushiwa pa manda pamene apo,*
3 ndipo pechiloŵa mmanda mwamene umo, thupi ya Ambuye Yesu aliyeifwanemo.
4 Pechisiliwa nzelu na vamene ivo, echingowona analume aŵili alivwale vovwala vong’anima alipaname pa mbali pawo.
5 Anakazi amene awo echita wowa ndipo eŵelamila pansi. Lomba analume amene awo eŵakonsha kuti: “Ndaŵa yanji musakila-sakila munthu wamoyo kuno kumanda?
6 Yove kuliye kuno, waushiwa. Kumbukilani vechikuujani yove penze ku Galileya.
7 Pala yove enena kuti Mwana wa munthu ofunikila kupelekewa mmanja mwa ŵanthu ochimwa nopaiwa pachimuti nouka pa nsiku yachitatu.”
8 Tetyo ekumbukila mawu ŵake amene awo
9 ndipo efumako ku manda kwamene uko* nojokela kuyalaŵila vonse vamene ivi kuli ophunzila 11 ŵala komasoti kuli ayakine onse.
10 Anakazi amene aŵo enze Maliya waku Magadala, Juwana na Maliya amayi ŵake a Yakobo. Komasoti anakazi ayakine onse ŵenze nawo pamozi enzeuja atumwi vinthu vamene ivo.
11 Koma kuli ove, vinthu venzeŵauja venzewoneka monga n’vatyala-tyala ndipo aliyeŵakhulupilile anakazi amene awo.
12 Koma Petulo enyamuka noutukila ku manda kwamene uko,* ndipo pechisonjelela nkati, echingowona nyula zeka. Tetyo efumako ali wodabwa ngako na vichitika vamene ivo.
13 Koma pa nsiku yamene iyo, aŵili a ove enze pa ulwendo woluta ku munzi uyakine uitiwa kuti Emau, pansenga wa makilomita pafupi-fupi 11* kufumila ku Yelusalemu.
14 Ove enzekambilana vinthu vonse vichitika vamene ivo.
15 Lomba ali nkati mokambilana vinthu vamene ivi, Yesu efwika noyamba kuyenda nawo pamozi.
16 Koma aliyekwanishe kumuziŵa.
17 Yove eŵakonsha kuti: “Kansi ni nkhani zotyani zamukambilana pamuyenda pano pa nsewu?” Ove echingopanama puluu owoneka achisoni.
18 Poyankha, mmozi wa ove zina yake Keleopa, emukonsha kuti: “Kansi wewo unkhala weka-weka mu Yelusalemu monga mulwendo,* mwakuti uziŵalini vinthu vachitika mwamene muno mmasiku amene aŵa?”
19 Yove eŵakonsha kuti: “Vinthu vake votyani?” Ove emuuja kuti: “Vinthu vokhuza Yesu Mnazaleti, wamene enze mneneli wamphamvu mu vochita komasoti mmawu pamenso pa Mulungu na ŵanthu onse.
20 Komasoti vokhuza mwamene ansembe ŵasu akulu-akulu na olamulila mwechimupelekela kuli ŵanthu amene emuweluza kuti apaiwe ndipo emukhomelela pachimuti.
21 Koma sewo tenzeyembekezela kuti munthu wamene uyu niye akuti azapulumushe Isilaeli. Kuyangijila pamene apo, lelo ni nsiku yachitatu kufumila pevichitika vinthu vamene ivi.
22 Komasoti anakazi ayakine mu gulu yasu yamene iyi atidabwisa ngako. Ove enze achelela mmawa ngako kuluta ku manda kwamene uko,*
23 koma pawona kuti thupi yake aliyeifwane, ajokako nonena kuti awonasoti mensomphenya ŵa angelo, amene aŵauja kuti yove ali moyo.
24 Pavuli pake ayakinesoti mu gulu yasu yamene iyi enze aluta ku manda kwamene uko,* ndipo afwana chendi kuti mmanda mwamene umo muliye aliyense, mokatijana na valaŵila anakazi amene awo, koma yove aliyemuwone.”
25 Lomba yove eŵauja kuti: “Mwewo ŵanthu muliye nzelu komasoti mukaikila-kaikila pa vinthu vonse vechinena aneneli!
26 Kansi venzelini voyenelela kuti Khilisitu amvwe voŵaŵa vonse vamene ivi noloŵa mu ulemelelo wake?”
27 Pechichita tetyo eyamba kuŵatanthauzila vinthu vokhuza yove m’Malemba onse, kuyambila na volemba va Mose komasoti vonse vechilemba aneneli.
28 Pavuli pake yove efwika kufupi na munzi wenzekuya, ndipo echita monga opitilila na ulwendo wake.
29 Koma ove emuyumilila kuti: “Tiyeni tinkhale mphela pamozi, chifukwa kwayamba kale kufipa ndipo nsiku yasala patontho kusila.” Pechilaŵila vamene ivo eloŵa m’ng’anda ndipo enkhala nawo.
30 Penzekulya nawo chakulya,* etola nkate nopemphela pavuli pake eusuna-suna noyamba kuŵayaŵila.
31 Pechiwona vamene ivi, menso ŵawo esegukilatu ndipo emuziŵa koma echingowona paliye.
32 Ove eyamba kuujana kuti: “Kansi nipalalini petikhuziwa ngako mu ntima penzelaŵila nase munsewu mwala notifotokozela Malemba momvwika luweme?”
33 Pa nthawe yamene iyo enyamuka nojokela ku Yelusalemu. Kwamene uko efwana ophunzila 11 ŵala komasoti ŵanthu ayakine ŵechisonkhana nawo pamozi.
34 Ove eŵauja kuti: “N’chendi, Ambuye auka kwa akufwa ndipo awonekela kwa Simoni!”
35 Nawosoti efotokoza vichitika pa nsewu komasoti mwechimuziŵila ove penzesuna-suna nkate.
36 Ali nkati molaŵila, Yesu epanama pakati pawo noŵauja kuti: “Ntendele unkhale namwe.”
37 Koma pakuti ove ezizimuka ngako nochita wowa, enzeganiza kuti owona mzimu.
38 Tetyo yove eŵakonsha kuti: “Ndaŵa yanji muvutika maganizo komasoti kukaikila-kaikila mmitima yanu?
39 Onani manja na mendo ŵangu, kuti musimikijile kuti ninewo chendi. Nikumyeni mumvwe, chifukwa mzimu uliye mnyofu na vifupa monga ni ivi vangu vamuwona.”
40 Penzelaŵila vamene ivi, eŵawonesha manja na mendo ŵake.
41 Koma pakuti ove aliyemukhulupilile mphela chifukwa cha chisangalalo na kudabwa, yove eŵakonsha kuti: “Kansi muli na chakulya chilichonse pano?”
42 Tetyo emupasa pisi ya nsomba yoyocha,
43 ndipo yove elondela nakulya onse owona.
44 Lomba eŵauja kuti: “Penenze namwe pamozi nikuujani mawu akuti, vonse vokhuza newo vilembewa m’Chilamulo cha Mose, vechilemba aneneli komasoti vilembewa m’Masalimo vufunikila kukwanilishiwa.”
45 Pevichitika tetyo esegulilatu maganizo ŵawo kuti amvwishe tanthauzo ya Malemba
46 ndipo eŵauja kuti, “Malemba onena kuti: Khilisitu azatamane ndipo nsiku yachitatu azauke kwa akufwa,
47 ndipo mu zina yake, uthenga wakuti ŵanthu alape machimo ŵawo kuti akhululukiliwe uzalalikiliwe kuli ŵanthu amitundu yonse, kuyambila ku Yelusalemu.
48 Mwewo muzankhale mboni za vinthu vamene ivi.
49 Ndipo newo nizakutumijileni chechikulonjezani Atata. Koma mwewo mupitilije mphela kunkhala mu tauni yamene iyi mpaka muzalondele mphamvu zofumila kululu.”
50 Pavuli pake eŵasogolela mpaka kuyafwika nawo ku Betaniya ndipo kwamene uko eimya manja ŵake noŵadalisa.
51 Penzeŵadalisa, esiyana nawo ndipo Mulungu emutola kuluta naye kululu.
52 Ove emugwadila* nojokela ku Yelusalemu osangalala ngako.
53 Nthawe zonse ove enzenkhala m’kachisi notamanda Mulungu.
Malizu a m'nyansi
^ Olo kuti, “manda achikumbukilo amene awo.”
^ Olo kuti, “pamanda achikumbukilo amene awo.”
^ Olo kuti, “kumanda achikumbukilo amene awo.”
^ Olo kuti, “kumanda achikumbukilo amene awo.”
^ Mu Chigiliki, “masitadiya 60.” Sitadiya imozi yenzekwana mamita 185.
^ Mabaibolo ayakine onena kuti, “Kansi ni wewo weka mulwendo muno mu Yelusalemu wamene uziŵalini?
^ Olo kuti, “kumanda achikumbukilo amene awo.”
^ Olo kuti, “kumanda achikumbukilo amene awo.”
^ Olo kuti, “Pechinkhala pathebo.”
^ Olo kuti, “emuŵelamila.”
