Wilembewa na Luka 3:1-38
3 M’chaka cha 15 cha ulamulilo wa Kaisala Tibeliyo, Pontiyo Pilato enze gavana waku Yudeya. Helode* enze wotonga chigawo cha Galileya.* Nkwake Filipo enze wotonga chigawo cha madela a Ituleya na Tilakoniti. Ndipo Lusaniyo enze wotonga chigawo cha Abilene.
2 Mmasiku amene awo Anasi enze wansembe nkulu ndipo Kayafa enze nkulu wa ansembe. Pa nthawe yamene iyo mawu a Mulungu efwika kwa Yohani mwana wa Zakaliya m’chipululu.
3 Tetyo yove eluta mminzi yonse yapafupi na Yolodano ndipo enzelalikila za ubatizo monga chizindikilo cha kulapa kuti machimo akhululukiwe.
4 Enzechita vamene ivi mokatijana na vilembewa m’buku ya mawu a Mneneli Yesaya kuti: “Munthu muyakine oŵilikija m’chipululu kuti: ‘Konzani njila ya Yehova! Muwamye misewu yake.
5 Chidikha chilichonse chifwichiliwe, ndipo lupili iliyonse na ntunthu uliwonse visalajiwe. Njila zobenda-benda ziyondololewe ndipo malo okumbika-kumbika ankhale osalajiwa luweme.
6 Ŵanthu onse azawone njila ya Mulungu yopulumushila ŵanthu.’”
7 Tetyo eyamba kuuja gulu ya ŵanthu amene enzewela kuli yove kuzabatiziwa kuti: “Mwewo ŵana a njoka niŵani wakuchenjejani kuti muthaŵe ukali wamene ukuza?
8 Tetyo muwoneshe vitwazi vuwonesha kulapa. Ndipo osati mukolisempha kuti, ‘Tili na atata ŵasu Abulahamu.’ Chifukwa nukuujani kuti Mulungu angakwanishe kupangila Abulahamu ŵana kufumila ku myala iyi.
9 Shuwa, katemo kaikiwa kale pa miju ya vimiti. Tetyo chimuti chilichonse chisatwala vitwazi viweme chiwishiwe noponyewa pa mulilo.”
10 Lomba gulu ya ŵanthu yenzemukonsha kuti: “Lomba tichite chinji?”
11 Yove eŵayankha kuti: “Munthu ali na vovwala viŵili ayaŵileko munthu aliyeletu ndipo ali na chakulya achitesoti chimozi-mozi.”
12 Nawosoti osonkhesha nsonkho ewela kuzabatiziwa ndipo emukonsha kuti: “Mphunzisi, tichite chinji?”
13 Yove eŵauja kuti: “Osati mukolipilisha ŵanthu* ndalama zinyinji kupambana ntengo ngawo-ngawo wa nsonkho.”
14 Nawosoti masodja enzemukonsha kuti: “Kansi tichite chinji?” Ndipo yove enzeŵauja kuti: “Osatimukovutisha ŵanthu* olo kupasa mulandu wawenye munthu aliyense, koma mukokhutila na vamulondela.”*
15 Lomba ŵanthu enzeyembekezela Khilisitu ndipo onse enzeganizila vokhuza Yohani mmitima yawo kuti, “Kansi Khilisitu wala ni wamene uyulini?”
16 Yohani eyankha onse amene awo kuti: “Newo nukubatizani na manzi. Koma kukuza muyakine wamphamvu kupambana newo, wamene ninelini woyenelela kumasula nthambo za nsapato zake. Yove azakubatizeni na mzimu utuŵa komasoti mulilo.
17 Chinthu chowuluzila mungu* chili mmanja mwake, ndipo malo ŵake obulilapo mbewu azaŵatuŵishiletu kuti mbee! Tiligu azauike m’chimphaka, koma mungu azaushoke na mulilo wamene ungazimwikelini.”
18 Yove epelekasoti malangizo ayakine anyinji ndipo epitilija kulengeza uthenga uweme kuli ŵanthu.
19 Lomba pakuti Yohani ezuzula Helode wotonga chigawo pa nkhani yokhuza Helodiya, mwanakazi wa nkwake, komasoti chifukwa cha viipa vonse vechichita Helode,
20 Helode wamene uyo eyangijila chinthu chiyakine chiipa pa vonse vamene ivo: Ezalilila Yohani mu djeli.
21 Pa nthawe yenze batiziwa ŵanthu onse, nayesoti Yesu ebatiziwa. Lomba penzepemphela, kululu kwiseguka,
22 ndipo mzimu utuŵa uwoneka monga ni nkhunda wiseluka kuzamunkhala. Tetyo pemvwika mawu ofumila kululu akuti: “Wewo niwe Mwana wangu wanukonda, unikondwelesha ngako.”
23 Yesu penzeyamba ntchito yake enze na vyaka pafupi-fupi 30. Ŵanthu enzeziŵa kuti Yesu enze mwanawa Yosefe,mwana wa Heli,
24 mwana wa Matati,mwana wa Levi,mwana wa Meliki,mwana wa Yananayi,mwana wa Yosefe,
25 mwana wa Matatiyo,mwana wa Amose,mwana wa Nahumu,mwana wa Esili,mwana wa Nagayi,
26 mwana wa Maati,mwana wa Matatiyo,mwana wa Semeini,mwana wa Yoseki,mwana wa Yoda,
27 mwana wa Yowanani,mwana wa Lesa,mwana wa Zelubabele,mwana wa Salatiyeli,mwana wa Neli,
28 mwana wa Meliki,mwana wa Adi,mwana wa Kosamu,mwana wa Elimadama,mwana wa Ele,
29 mwana wa Yesu,mwana wa Eliyezele,mwana wa Yolimu,mwana wa Matati,mwana wa Levi,
30 mwana wa Sumeyoni,mwana wa Yudasi,mwana wa Yosefe,mwana wa Yonamu,mwana wa Eliyakimu,
31 mwana wa Meleya,mwana wa Mena,mwana wa Matata,mwana wa Natani,mwana wa Davite,
32 mwana wa Djese,mwana wa Obedi,mwana wa Bowazi,mwana wa Salimoni,mwana wa Nasoni,
33 mwana wa Aminadabu,mwana wa Alini,mwana wa Eziloni,mwana wa Pelezi,mwana wa Yuda,
34 mwana wa Yakobo,mwana wa Isaki,mwana wa Abulahamu,mwana wa Tela,mwana wa Naholi,
35 mwana wa Selugi,mwana wa Leu,mwana wa Pelegi,mwana wa Ebele,mwana wa Shela,
36 mwana wa Kayinani,mwana wa Alipakisadi,mwana wa Semu,mwana wa Nowa,mwana wa Lameki,
37 mwana wa Metusela,mwana wa Inoki,mwana wa Yaledi,mwana wa Mahalaliyeli,mwana wa Kayinani,
38 mwana wa Enosi,mwana wa Seti,mwana wa Adamu,mwana wa Mulungu.
Malizu a m'nyansi
^ Wamene uyu enze Helode Antipa. Onani matanthauzo a mawu ayakine.
^ Mu Chigiliki, “enze gavana wa chigawo cha 4 cha dela.”
^ Olo kuti, “Osati mukokakamija ŵanthu kulipila.”
^ Olo kuti, “Osati mukolonda ŵanthu vinthu vawo.”
^ Olo kuti, “na malipilo ŵanu.”
^ “Mungu” ni vikamba vakuchosa ku mbewu pobula monga mpunga, ndipo okwanisha kuviwuluza na mphepo.