Wilembewa na Luka 4:1-44
4 Pavuli pake Yesu efuma ku Yolodano ali jujiwe na mzimu utuŵa ndipo mzimu wamene uyo wimutola nomuyendesha mmalo osiyana-siyana m’chipululu
2 kwa masiku 40, kwenzeyesewa na Mdyelekezi. Pa masiku amene awo aliye ulye kanthu kalikonse ndipo masiku amene awo pechisila, echimvwa njala.
3 Mdyelekezi pechiwona vamene ivi emuuja kuti: “Keno nimwe mwana wa Mulungu, ujani mwala uyu kuti uyaluke nkate.”
4 Koma Yesu emuyankha kuti: “Malemba onena kuti, ‘Munthu angankhalelini na moyo na chakulya cheka.’”
5 Tetyo eluta naye pamalo apalulu ndipo emuwonesha maufumu onse a pa chalo mu kanthawe katontho.
6 Lomba Mdyelekezi emuuja kuti: “Nikupaseni ulamulilo pa maufumu onse amene aŵa na ulemelelo wake wonse, chifukwa wipelekewa kuli newo ndipo ningakwanishe kuupeleka kuli aliyense waningafune kumupasa.
7 Lomba keno mwewo munganilambile kamozi tyala, ulamulilo wonse wamene uyu unkhale wanu.”
8 Poyankha Yesu emuuja kuti: “Malemba onena kuti, ‘Yehova Mulungu wako niye waufunika kulambila ndipo ufunikila kutumikila yove yeka mphela.’”
9 Pavuli pake eluta naye ku Yelusalemu ndipo emukwejeka palulu pa chipupa cha mpanda wa kachisi* nomuuja kuti: “Keno nimwe mwana wa Mulungu, muliponye pansi kufumila pano.
10 Pala Malemba onena kuti, ‘Yove azalamule angelo ŵake vokhuza mwewo, kuti akutetezeni,’
11 ndipo ‘Azakunyamuleni mmanja mwawo, kuti kwendo yanu osati iniyate ku mwala.”
12 Poyankha Yesu emuuja kuti: “Malemba onena kuti, ‘Yehova Mulungu wanu osati mukomuyesa.’”
13 Tetyo Mdyelekezi wamene uyo pechisilija mayeselo onse amene awo, emuleka mpaka pa nthawe iyakine iweme.
14 Lomba Yesu ejokela ku Galileya alijujiwe na mphamvu ya mzimu. Ndipo mbili yake iweme imvwika paliponse kuzenguluka mmadela onse.
15 Komasoti eyamba kuphunzisa mmalo ŵawo opemphelela ndipo ŵanthu onse enzemulemekeza.
16 Pavuli pake eluta ku Nazaleti kwechikulila. Mokatijana na venzechita nthawe zonse pa nsiku ya Sondo, eloŵa mmalo opemphelela nopanama kuti aŵelenge Malemba.
17 Lomba emupasa mpukutu wa mneneli Yesaya. Yove etambulula mpukutu wamene uyo nofwana pilembewa mawu akuti:
18 “Mzimu wa Yehova uli pali newo, chifukwa yove enizoza kuti nilengeze uthenga uweme kuli ŵanthu osauka. Enituma kuzalengeza za ufulu kuli ŵanthu ekatiwa notolewa kuluta ku chalo chiyakine komasoti kuti asalola ayambe kulola. Enituma kuti nizamasule okandililiwa kuti ankhale pa ufulu,
19 komasoti kuzalalikila vokhuza chaka chovomelejeka kwa Yehova.”
20 Pechichita tetyo, eupeteka mpukutu wamene uyo noujoshela kuli munthu otumikila mwamene umo ndipo enkhala pansi. Menso a ŵanthu onse amene enze mmalo opemphelela amene awo, enze pali yove ndipo enzemuloleshesha.
21 Tetyo eyamba kuŵauja kuti: “Lelo lemba yamene iyi yamwamvwa kwalombapano yakwanilishiwa.”
22 Pevichitika tetyo onse eyamba kumutamanda komasoti edabwa na mawu ofwika pa ntima efuma pakamwa pake, mwakuti enzenena kuti: “Kansi uyu ni mwanalini wa Yosefe?”
23 Pechimvwa vamene ivi yove eŵauja kuti: “Mosakaikila mwewo muzakatishile ntchito pali newo mawu akuti, ‘Wewo upojeka ayako, lipojeke weka. Vinthu vinyinji vetichimvwa kuti wevichita ku Kapelenawo, uvichitesoti kuno kwanu.’”
24 Yove enena kuti: “Shuwa nukuujani, paliye mneneli olondelewa luweme kwawo.
25 Mwachisanzo, shuwa nukuujani kuti: “Mwenze anakazi anyinji amasiye mu Isilaeli mmasiku a Eliya kululu pekwenze kwivalika kwa vyaka vitatu na miyezi 6 ndipo m’chalo monse mwenze njala ikulu.
26 Koma Eliya aliye tumijiwe kuli aliyense wa anakazi amene awo. Mmalo mwake etumijiwa kuli mwanakazi wamasiye waku Zalefati m’chalo cha Sidoni.
27 Komasoti mwenze amankhutu anyinji mu Isilaeli mu nthawe ya mneneli Elisa. Koma lomba paliye aliyense wa ove epojekewa koma Namani yeka waku Siliya.”
28 Lomba ŵanthu onse amene enzetetekela vinthu vamene ivi mmalo opemphelela mwamene umo ekalipa ngako.
29 Ove enyamuka ndipo mokulumija emufumya kunja kwa tauni. Pavuli pake eluta naye palulu pa lupili penze tauni yawo, kuti akamuponye kumpolipoli.
30 Koma yove echingotendesha pakati pawo noluta.
31 Pavuli pake eluta ku Kapelenawo, tauni ya Galileya. Ndipo enzeŵaphunzisa pa nsiku ya Sondo.
32 Kwamene uko ŵanthu edabwa ngako na mwenzephunzisila, chifukwa enzelaŵila mowonesha kuti ali na ulamulilo.
33 Lomba mmalo opemphelela mwamene umo mwenze munthu muyakine enze na mzimu, chiŵanda chiipa, ndipo eŵilikija mwamphamvu kuti:
34 “Aaa! Kansi mufuna chinji kuli sewo, mwewo Yesu Mnazaleti? Kansi mwawela kuzatiwononga? Newo nukuziŵani luweme ngako, nimwe Ntuŵa wa Mulungu!”
35 Koma Yesu ezuzula mzimu wamene uyo kuti: “Nkhala chelele, ndipo fuma muli yove.” Tetyo chiŵanda chamene icho chiwishila munthu wamene uyo pakati pawo, pavuli pake chifuma muli yove osamuwononga.
36 Pechiwona vamene ivi ŵanthu onse edabwa ngako ndipo eyamba kukambilana kuti: “Onani mawu ŵake ni a mphamvu ngako! Chifukwa okwanisha kuzuzula mizimu iipa mwaulamulilo na mphamvu ndipo mizimu yamene iyo yufuma chendi.”
37 Tetyo mbili yake ipitilija kumvwika paliponse kuzenguluka mminzi yonse.
38 Pechifuma mmalo opemphelela mwamene umo, echiyaloŵa m’ng’anda ya Simoni. Pa nthawe yamene iyo apongozi anakazi a Simoni enzelwala maleliya akulu,* tetyo emusenga kuti aŵayavye.
39 Lomba epanama penzeyone amayi amene awo noŵapojeka ndipo maleliya ŵawo esililatu. Nthawe yamene iyo amayi amene awo euka noyamba kuŵatumikila.
40 Koma zuŵa peyenzechoma, onse amene enze na ŵanthu olwala matenda osiyana-siyana eŵaleta kuli yove. Ndipo yove eŵapojeka poika manja ŵake pali ove.
41 Navosoti viŵanda vifuma muli ŵanthu anyinji vuŵilikija kuti: “Mwewo nimwe Mwana wa Mulungu.” Koma yove ezuzula viŵanda vamene ivo ndipo aliye vilole kuti vilaŵile chifukwa venzemuziŵa kuti ni Khilisitu.
42 Kwacha mmawa, efumapo noluta ku malo kuliye ŵanthu. Koma gulu ya ŵanthu iyamba kumusakila-sakila mpaka ifwika kwenze yove, ndipo ŵanthu amene awo emusenga kuti osati afumeko.
43 Koma yove eŵauja kuti: “Nufunika kuyalengezasoti uthenga uweme wa Ufumu wa Mulungu ku matauni ayakine, chifukwa niye vechinituma Mulungu kuti nizachite.”
44 Tetyo eluta kuyalalikila mmalo opemphelela a ku Yudeya.
