Wilembewa na Luka 5:1-39
5 Pa nthawe iyakine, gulu ya ŵanthu yenzetetekela Yesu penzephunzisa mawu a Mulungu mmbali mwa nyanja ya Genesalete* ndipo ŵanthu amene awo enzemupanikija.
2 Lomba yove ewona mabote aŵili ali panamikiwe mmbali mwa nyanja yamene iyo, koma okasha nsomba enze eselukamo ndipo enzewasha akombe ŵawo.
3 Tetyo ove eloŵa m’bote imozi, yamene yenze ya Simoni ndipo emusenga kuti aikankhile mmanzi patontho. Pavuli pake enkhala pansi m’bote yamene iyo noyamba kuphunzisa gulu ya ŵanthu yamene iyo.
4 Pechisilija kulaŵila, euja Simoni kuti: “Luta nayo konoka, ndipo muteye akombe ŵanu kuti mupaye nsomba.”
5 Koma poyankha Simoni enena kuti: “Mulangizi, sewo takata ntchito usiku wonse koma tiliye paye kalikonse. Koma pakuti mwanena ni mwewo, niteye akombe amene aŵa.”
6 Pechichita vamene ivo, ekasha nsomba zinyinji ngako. Ndipo akombe ŵawo eyamba kukezuka.
7 Tetyo echeula ayawo amene enze m’bote iyakine kuti azaŵayavye. Ove ewela chendi, ndipo nsomba zamene izo zizula m’mabote onse aŵili, mwakuti eyamba kumbila.
8 Pechiwona vamene ivi Simoni Petulo, egwada pamenso pa Yesu ndipo emuuja kuti: “Ambuye, fumamponi pali newo pano chifukwa nine munthu wochimwa.”
9 Simoni komasoti ayake ŵenze nawo pamozi, edabwa ngako na nsomba zamene izo zechikasha.
10 Komasoti Yakobo na Yohani ŵana a Zebedayo amene enzekasha nsomba pamozi na Simoni edabwa ngako. Koma Yesu euja Simoni kuti: “Osachita wowa. Kufumila lelo ukokasha ŵanthu a moyo.”
11 Tetyo mabote amene awo efwika nawo ku ntunthu, ndipo ove esiya chilichonse nomukonkhelela.
12 Pa nthawe iyakinesoti penze mu tauni iyakine, ekumana na munthu wamankhutu muŵili wonse. Munthu wamene uyo pechiwona Yesu egwada noŵelama mpaka chinso chake pansi ndipo emusenga kuti: “Ambuye nuziŵa kuti keno mufuna mungakwanishe kunipojeka.”
13 Tetyo Yesu etambulula kwanja yake nomukumya ndipo enena kuti: “Eye nufuna. Pola.” Nthawe yamene iyo mankhutu ŵake amene awo esila.
14 Pavuli pake elamula munthu wamene uyo kuti osati auje aliyense. Lomba emuuja kuti: “Koma ulute ukawonekele kuli wansembe ndipo ukapeleke nsembe ya kupojekewa kwako, monga mwechilamulila Mose, kuti unkhale umboni kuli ove.”
15 Koma mbili yake imvwikila ngako ndipo magulu a ŵanthu enzeungana pamozi kuzamumvwishila komasoti kuzapojekewa matenda ŵawo.
16 Koma lomba nthawe zinyinji yove enzeluta kumalo kwa yeka-yeka kuyapemphela.
17 Nsiku iyakine yove penzephunzisa, Afalisi komasoti aphunzisi a Chilamulo amene efumila mminzi yonse ya Galileya, ku Yudeya na ku Yelusalemu enkhala pansi pamalo amene awo. Ndipo mphamvu ya Yehova yenze pali yove kuti akwanishe kupojeka.
18 Pavuli pake pefwika ŵanthu alinyamule munthu wozizila vizo pamachila. Ove enzesakila-sakila njila yangamuloŵeshele m’ng’anda mwamene umo nakuyamuika pafupi na Yesu.
19 Koma pechikangiwa kupita naye chifukwa cha kupaka kwa ŵanthu, ekwela pa ntenje. Ndipo kupitila pa chibowo chechibowola pa ntenje pamene apo, emuselusha pamozi na machila amene awo nomufwisha pakati pa ŵanthu amene enze pamenso pa Yesu.
20 Pechiwona chikhulupililo chawo enena kuti: “Shamwali, machimo ŵako akhululukiwa.”
21 Pavuli pake alembi na Afalisi eyamba kulikonsha kuti: “Kansi wamene uyu niŵani kuti akonyoza teti Mulungu? Niŵanisoti muyakine angakhululukile machimo kupatulapo Mulungu?
22 Koma Yesu pechiziŵa venzeganiza eŵakonsha kuti: “Kansi muganiza chinji mmitima mwanu?
23 Ni chinji chosavuta kunena kuti, ‘Machimo ŵako akhululukiliwa,’ olo kunena kuti, ‘Panama uyende’?
24 Koma kuti muziŵe kuti Mwana wa munthu ali na mphamvu pano pa chalo zokhululukila machimo—” pavuli pake euja wala munthu wozizila vizo kuti: “Nulaŵila na wewo, Panama, tola machila ŵako amene aŵa ndipo ulute kwanu.”
25 Nthawe yamene iyo yove epanama onse owona ndipo etakula ŵala machila ŵake noluta kwawo, ndipo enzetamanda Mulungu.
26 Lomba ŵanthu onse amene awo edabwa ngako ndipo eyamba kutamanda Mulungu, mwakuti echita wowa. Ove enzenena kuti: “Koma lelo tawona vodabwisa!”
27 Vamene ivi pevichitika, Yesu efumako. Pavuli pake ewona munthu muyakine wosonkhesha nsonkho zina yake Levi alinkhale mu ofesi yosonkheshelamo nsonkho ndipo emuuja kuti: “Unkhale wophunzila wangu.”
28 Levi wamene uyo, esiya chilichonse ndipo epanama noyamba kumukonkhelela.
29 Pavuli pake, Levi epangila Yesu phwando ikulu ku ng’anda kwake. Kwamene uko kwiwela ŵanthu anyinji osonkhesha nsonkho komasoti ochimwa ndipo enzekulya pamozi na Yesu komasoti ophunzila ŵake.
30 Afalisi na alembi ŵawo pechiwona vamene ivi, eyamba ku ng’ung’uzika nokonsha ophunzila ŵake kuti: “Ndaŵa yanji mwewo mukulya na kumwa pamozi na osonkhesha nsonkho komasoti ŵanthu ochimwa?”
31 Yesu eŵayankha kuti: “Ŵanthu ali bwino ofunikilalini dokota, koma olwala niye omufuna.
32 Newo niliye wele kuzaita ŵanthu olungama, koma ochimwa kuti alape.”
33 Ove emuuja kuti: “Ophunzila a Yohani olekeja kulya pafupi-pafupi ndipo opemphela mopapatila. Ophunzila ŵa Afalisi ochitasoti chimozi-mozi, koma ophunzila ŵanu amene aŵa akulya na kumwa tyala.”
34 Yesu eŵayankha kuti: “Mwewo mungaujelini ayake a nkwati kuti alekeje kulya pamene nkwati wamene uyo ali nawo pamozi, kansi mungachite tetyo?
35 Koma masiku azakwane pamene nkwati azachosewe pakati pawo. Vikazachitika tetyo, ove azalekeje kulya masiku amene awo.
36 Komasoti eŵapasa fanizo yakuti: “Paliye otenda chigamba pamalaya akunja anyowani nochisonelela pa malaya akunja akale. Munthu akachita vamene ivo, chigamba chanyowani chamene icho chuphamuka pa nyula yakale yamene iyo. Komasoti chigamba chamene icho cha nyula ya nyowani chukatijanalini na malaya akale amene awo.
37 Komasoti paliye munthu wamene otila vinyu wanyowani m’vyola vachikumba vakale. Munthu akachita vamene ivo, vinyu wanyowani wamene uyo uphulisa vyola vachikumba vamene ivo ndipo utaika. Komasoti vyola vachikumba vamene ivo vuwonongeka.
38 Koma vinyu wanyowani ufunikila kuikiwa m’vyola vachikumba vanyowani.
39 Munthu akamwa vinyu wakale ofunalinisoti wanyowani, chifukwa onena kuti, ‘Uyu wakale ni uweme ngako.’”
Malizu a m'nyansi
^ Yamene iyi yenze nyanja ya Galileya.