Wilembewa na Luka 6:1-49
-
Yesu ni “Munecho wa Sondo” (1-5)
-
Munthu wolemala kwanja epojekewa (6-11)
-
Atumwi 12 (12-16)
-
Yesu enzephunzisa komasoti kupojeka ŵanthu (17-19)
-
Ŵanthu osangalala komasoti ali na soka (20-26)
-
Kukonda adani (27-36)
-
Lekani kuweluza (37-42)
-
Chuziŵika na vitwazi vake (43-45)
-
Ng’anda yomangiwa luweme; ng’anda iliye fandeshoni yotang’a (46-49)
6 Nsiku iyakine pa nsiku ya sondo Yesu enzepita mmunda wa tiligu ndipo ophunzila ŵake enzepulula ngala-ngala za tiligu nozifikisa mmanja mwawo pavuli pake nkulya.
2 Afalisi pechiwona vamene ivi enena kuti: “Ndaŵa yanji muchita vinthu vamene ni vosafunika kuvichita pa nsiku ya Sondo?”
3 Koma Yesu eŵayankha kuti: “Kansi muliyeŵelenge vechichita Davite, yove pamozi na analume ŵenze nawo pechimvwa njala?
4 Kansi muliyeŵelenge kuti eloŵa m’ng’anda ya Mulungu ndipo echilya mitanda ya nkate wowonesha kwa Mulungu,* yamene yove na ŵanthu ŵala ŵenze nawo enzefunikilalini kulya mokatijana na malamulo, koma ansembe ŵeka?”
5 Tetyo epitilija kuŵauja kuti: “Mwana wa munthu ni Munecho wa Sondo.”
6 Nsiku iyakinesoti ya sondo, yove eloŵa mmalo opemphelela noyamba kuphunzisa. Mwamene umo mwenze munthu wamene kwanja yake ngayo yenze yolemala.
7 Alembi na Afalisi enzemuloleshesha kuti awone keno angapojeke munthu wamene uyo pa nsiku ya Sondo na cholinga chakuti amupase mulandu.
8 Koma yove eziŵa venzeganiza ove. Tetyo euja munthu wamene uyo wolemala kwanja kuti: “Panama wela apa pakati.” Munthu wamene uyo enyamuka nopanama pamene apo.
9 Pavuli pake Yesu eŵakonsha kuti: “Kansi malamulo olola kuchita chinji pa nsiku ya Sondo, chiweme olo chiipa? Kupulumusha moyo olo kupaya?”
10 Pechilolesha uku na uku, euja munthu wamene wala kuti: “Tambulula kwanja yako.” Yove etambulula chendi ndipo inkhalasoti bwino-bwino.
11 Koma ove ekalipa ngako ndipo eyamba kukambilana vakuti amuchite Yesu.
12 Mmasiku amene awo, Yesu eluta kulupili kuyapemphela ndipo echezela usiku wonse opemphela kwa Mulungu.
13 Kwacha mmawa, eita ophunzila ŵake nosankhapo 12, amene eŵapasasoti zina yakuti atumwi.
14 Yove esankha Simoni, wamene enzeitiwa kuti Petulo, na Andileya nkwake. Esankhasoti Yakobo, Yohani, Filipo, Batolomeu,
15 Mateyo, Thomase, Yakobo mwana wa Alifeyo, na Simoni woitiwa kuti “wakhama.”
16 Komasoti esankha Yudasi mwana wa Yakobo na Yudasi Sikaliyoti, wamene pavuli pake echizamupeleka.
17 Pavuli pake eseluka nawo na kuyapanama pamalo afulati. Pamene apo penze gulu ikulu ya ophunzila ŵake. Penzesoti chigulu cha ŵanthu ofumila ku Yudeya konse na ku Yelusalemu konse, komasoti ku madela a mmbali mwa nyanja a ku Tulo na ku Sidoni. Onse amene awo ewela kuti azamumvwishile komasoti kuti azaŵapojeke.
18 Olosoti ŵala enzevutishiwa na mizimu iipa epojekewa.
19 Gulu yonse yamene iyo ya ŵanthu yenzeyeja-yeja kuti imukate, chifukwa mphamvu zenzefuma muli yove nopojeka ŵanthu onse amene awo.
20 Pavuli pake elolesha ophunzila ŵake noyamba kuŵauja kuti:
“Mwewo osauka nimwe osangalala, chifukwa Ufumu wa Mulungu ni wanu.
21 Osangalala ni mwewo mukumvwa njala, chifukwa muzakute.
Osangalala ni mwewo mulila, chifukwa muzasekelele.
22 Nimwe osangalala ŵanthu akokuzondani, kukupatulani, kukunyozani komasoti kukana* zina yanu nonena kuti ni iipa, chifukwa cha Mwana wa munthu.
23 Sangalalani pa nsiku yamene iyo ndipo munyomoke-nyomoke mokondwela, chifukwa mphoto yati azakupaseni Mulungu ni ikulu,* pakuti vinthu vamene ivo niyesoti vechichita makolo ŵawo akale kuchitila aneneli.
24 Koma soka kuli mwewo muli na chuma, chifukwa mulondelelatu vonse vukukondweleshani.
25 Soka mwewo mukutilatu palipano, chifukwa muzamvwe njala.
Soka mwewo musekelatu palipano, chifukwa muzamvwe chisoni komasoti kulila.
26 Muli na soka ŵanthu onse akolaŵila viweme vokhuza mwewo, pakuti vinthu vamene ivo niyesoti vechichita makolo ŵawo akale kuchitila aneneli awenye.
27 Koma mwewo amene mumvwishila, nukuujani kuti: Pitilijani kukonda adani ŵanu nochitila viweme ŵala okuzondani.
28 Pitilijani kudalisa ŵanthu okutembelelani komasoti kupemphelela ŵala okunyozani.
29 Wamene wakuniyata mbama ku mbovu iyi, umupasesoti iyakine. Wamene wakulonda malaya ŵako akunja, osamulesha kutola malaya ŵako a nkati.
30 Aliyense wakusenga kanthu umupase, ndipo wamene wakulonda vinthu osamuyumilila kuti ajoshe.
31 Komasoti, vamufuna kuti ŵanthu akuchitileni, namwesoti muŵachitile vamene ivo.
32 Kansi mukokonda tyala ŵala ŵanthu okukondani, muzapindule chinji? Chifukwa olo ochimwa okonda tyala ŵanthu ŵala oŵakonda.
33 Keno muchitila tyala viweme ŵala ŵanthu okuchitilani viweme, kansi muzapindule chinji? Chifukwa olo ochimwa ochitasoti vamene ivo.
34 Komasoti, keno mukongolesha paliye kuyangijila ndalama yapalulu kuli tyala ŵala ŵamuyembekezela kuti azaweje nkhongole yamene iyo, muzapindule chinji? Nawosoti ochimwa okongolesha ochimwa ayawo paliye kuyangijila ndalama yapalulu, kuti azaŵawejele zolingana na zamene izo.
35 Mosiyana na vamene ivo, mwewo pitilijani kukonda adani ŵanu. Pitilijani kuchita viweme nokongolesha paliye kuyangijiliwa ndalama yapalulu, osayembekezela kulondela kalikonse. Mukachita tetyo, mphoto yanu inkhale ikulu ndipo munkhale ŵana a Wapalulu Ngako, chifukwa yove ni muweme ntima kuli asatembeja na aipa.
36 Pitilijani kunkhala achifundo, molingana na Atata ŵanu amenesoti ni achifundo.
37 Komasoti, lekani kuweluza ayakine, mukachita tetyo namwesoti muzaweluziwelini. Lekani kushusha ayakine ndipo namwesoti muzashushiwelini. Pitilijani kukhululukila ŵanthu machimo ŵawo ndipo machimo ŵanusoti azakhululukiliwe.
38 Nkhalani opasa ndipo namwesoti ŵanthu azakupaseni. Azakukhutulileni mmathumba ŵanu mpimo uweme, wosindilika, wozula bwino komasoti wombweja. Chifukwa mpimo wamupimila ayakine nawosoti azakupimileni wamene uyo.”
39 Pavuli pake eŵaujasoti fanizo yakuti: “Munthu asalola angasogolelelini asalola muyake, kansi angachite tetyo? Keno angachite tetyo onse aŵili angaponele m’chisengu, n’tetyolini?
40 Wophunzila opambanalini mphunzisi wake, koma aliyense waphunzisiwa luweme alingane na mphunzisi wake.
41 Lomba ndaŵa yanji ulolesha kachisoso mu linso ya nkwako koma osawona nsondo ya ng’anda ili mu linso yako?
42 Ungauje tyani nkwako kuti, ‘Panama nikuchose kachisoso kali mu linso yako,’ koma wewo ukangiwa kuwona nsondo ya ng’anda ili mu linso yako? Munthu wachinyengo wewo! Yamba wachosa nsondo yamene iyo ya ng’anda ili mu linso yako. Ukachita tetyo ukwanishe kuwona luweme, mwakuti ukwanishe kuchosa kachisoso kali mu linso ya nkwako.
43 Chimuti chiweme chingatwalelini chitwazi chowola ndipo chimuti chowola chingatwalelini chitwazi chiweme.
44 Chifukwa chimuti chilichonse chuziŵika na chitwazi chake. Mwachisanzo, ŵanthu otyolalini nkhuyu pa chimuti chaminga, olo kutenda mphesa pa chizambwa chaminga.
45 Munthu muweme ofumya viweme muchuma chiweme cha mu ntima mwake, koma munthu muipa ofumya viipa muchuma chiipa cha mu ntima mwake, chifukwa pakamwa polaŵila vilizule mu ntima.
46 Lomba ndaŵa yanji muniita kuti ‘Ambuye! Ambuye!’ koma muchitalini vanulaŵila?
47 Aliyense wamene owela kuli newo kuti azamvwe mawu ŵangu, nochita vamene ivo vawamvwa, nikuujeni wakulingana naye:
48 Yove ali monga ni munthu wamene pomanga ng’anda, ekumba ngako nomanga fandeshoni pamwala. Lomba mmana pewizula, manzi eniyata ku ng’anda yamene iyo koma aliyekwanishe kuinyang’anyisha chifukwa imangiwa luweme.
49 Pamene munthu wamene wamvwa mawu koma osachita chilichonse, ali monga ni munthu wamanga ng’anda iliye fandeshoni palito. Apasoti mmana wizula noniyata ku ng’anda yamene iyo, ndipo nthawe yamene iyo ipona, mwakuti kupona kwake kwenze kukulu.”
Malizu a m'nyansi
^ Olo kuti, “nkate wachiwoneshelo.”
^ Olo kuti, “kunyoza.”
^ Mu Chigiliki, “chifukwa mphoto yanu ni ikulu kululu.”
