Wilembewa na Luka 7:1-50
7 Yesu pechisilija kulaŵila vinthu vonse venzefuna kuuja ŵanthu, eloŵa mu tauni ya Kapelenawo.
2 Kwamene uko wantchito wa nsogoleli muyakine wa masodja, wenzekonda ngako nsogoleli wamene uyo, enzelwala ndipo enze esala patontho kumwalila.
3 Nsogoleli wamene uyo pechimvwa vokhuza Yesu, etumija akulu ayakine ŵa Ayuda kuli yove kuyamusenga kuti awele kuzapojeka wantchito wake wamene uyo.
4 Ŵanthu amene awo pechifwika kwa Yesu eyamba kumupapatila na ntima wonse kuti: “Wamene uyu ofunikila chendi kuti mumuyavye,
5 chifukwa okonda ŵanthu a ntundu wasu ndipo etimangila malo opemphelela.”
6 Tetyo Yesu enyamuka nawo pamozi. Koma pechisala patontho kufwika ku ng’anda kwamene uko, ekumana na ayake a wala nsogoleli wa masodja, ŵechituma kuti azamuuje kuti: “Ambuye osati muchite vutika kuwela, ninelini munthu woyenelela kuti muloŵe m’ng’anda mwangu.
7 N’chifukwa chake newosoti niliye liwone kuti nine woyenelela kuwela kuli mwewo. Koma mungolaŵila tyala mawu ndipo wantchito wangu wamene uyo apole.
8 Chifukwa nanesoti nili na akulu-akulu amene eikiwa kuti akonilolela komasoti nili na masodja ŵanulolela. Nikauja mmozi kuti, ‘Luta!’ oluta, muyakine nikamuuja kuti, ‘Wela!’ owela. Wantchito wangu nikamuuja kuti, ‘Chita chakuti!’ ochita.”
9 Yesu pechimvwa vamene ivi edabwa na munthu wamene uyo. Pavuli pake echunguluka nololesha gulu ya ŵanthu yenzemukonkhelela noŵauja kuti: “Kulaŵila chendi, olo mu Isilaeli niliye fwanemo aliyense wachikhulupililo chikulu monga ni chamene ichi.”
10 Koma ŵala ŵanthu etumiwa pechijokela ku ng’anda, echiyafwana kuti wala wantchito ali bwino-bwino.
11 Papita kanthawe katontho, enyamuka noluta ku tauni iyakine yuitiwa kuti Naini. Ophunzila ŵake komasoti gulu ikulu ya ŵanthu yenzeyenda naye pamozi.
12 Pechisala patontho kufwika pagedi ya tauni yamene iyo, ekumana na ŵanthu alinyamule malilo. Munthu emwalila wamene uyo enze mwana mwanalume mmozi tyala kuli amayi ŵake. Komasoti amayi ŵake amene awo enze mwanakazi wamasiye. Gulu ikulu ya ŵanthu ofumila mu tauni yamene iyo yenze pamozi na mwanakazi wamene uyo.
13 Ambuye pechiwona mwanakazi wamene uyo emumvwila chisoni, ndipo emuuja kuti: “Pujani mayi.”
14 Pechichita tetyo evwendela pafupi nokata chitanda chamene icho ndipo ŵanthu enyamula amene awo epanama. Pavuli pake yove enena kuti: “Wewo mulumbwana, nulaŵila na wewo, uka!”
15 Tetyo wala mulumbwana enze emwalila euka noyamba kulaŵila ndipo Yesu emupeleka kuli amayi ŵake.
16 Pechiwona vamene ivi ŵanthu onse echita wowa ndipo eyamba kutamanda Mulungu kuti: “Mneneli nkulu wawonekela pakati pasu.” Enenasoti kuti: “Mulungu wakumbukila ŵanthu ŵake.”
17 Nkhani yamene iyi yonena za Yesu, imvwikila paliponse mu Yudeya komasoti kuzenguluka mmadela onse.
18 Lomba ophunzila a Yohani emuuja vinthu vonse vamene ivi.
19 Tetyo Yohani eita ophunzila ŵake aŵili noŵatuma kuli Ambuye kuyakonsha kuti: “Kansi Mesiya wala watuyembekezela* ni mwewo olo tiyembekezele muyakine?”
20 Analume amene awo pechifwika kuli yove elaŵila kuti: “Yohani M’batizi watituma kuzakukonshani kuti: ‘Kansi Mesiya wala watuyembekezela ni mwewo olo tiyembekezele muyakine?’”
21 Pa nthawe yamene iyo yove epojeka ŵanthu anyinji amene enzevutika na matenda osiyana-siyana komasoti amene enzelwala mwakaya-kaya nofumya mizimu iipa. Eyavyasoti ŵanthu anyinji amene enze na vuto yosalola kuti ayambe kulola.
22 Tetyo poyankha euja ŵala analume aŵili kuti: “Nkhoyani mukauje Yohani vamwawona na kumvwa: Amene enze na vuto yosalola olola, olemala oyenda, amankhutu opojekewa ndipo amene enze na vuto yosamvwa akumvwa. Akufwa oushiwa ndipo osauka oujiwa uthenga uweme.
23 Wosangalala ni wala wamene ofwanalini chokhumudwisa muli newo.”
24 Ŵala ŵanthu ŵechituma Yohani pechifumapo, Yesu eyamba kuuja gulu ya ŵanthu vokhuza Yohani kuti: “Kansi mwenze mwaluta mu chipululu kuyawona chinji? Kansi mwenze mwaluta kuyawona tete yunyang’anyika na mphepo?
25 Lomba mwenze mwaluta kuyawona chinji? Payakine munthu wovwala vovwala vapalulu? Yayi, pala amene ovwala vovwala vapalulu komasoti ŵanthu amene onkhala na moyo wosasoŵa chilichonse opezeka m’ng’anda zachifumu.
26 Lomba mwenze mwaluta kuyawona chinji maka-maka? Payakine kuyawona Mneneli? Eye, nukuujani, Yohani ni mneneli komasoti ni wofunika ngako kupambana aneneli.
27 Malemba onena za yove kuti: “Ona! Newo nutumija nthumi yangu kuti itangule kuyakuwamyila njila.
28 Shuwa nukuujani, pa ŵanthu onse,* paliye nkulu kupambana Yohani koma munthu wamene ni ntonthoko mu Ufumu wa Mulungu ni nkulu kupambana yove wamene uyu.”
29 (Ŵanthu onse komasoti osonkhesha nsonkho pechimvwa vamene ivi, elengeza kuti Mulungu ni wolungama, chifukwa ove enze ebatiziwa na Yohani.
30 Koma Afalisi na ŵanthu oziŵa chilamulo enyala-nyaza malangizo ŵechiŵapasa Mulungu. Tetyo Yohani aliye ŵabatize.)
31 “Kansi ŵanthu a m’badwo uyu niŵalinganije na ŵani, ndipo kansi olingana na ŵani?
32 Ove ali monga ni ŵana atontho-atontho amene ankhala pansi mmaketi noŵilikija kuti: ‘Tikulijilani chinonje, koma muliyevine. Tilila moŵilikija koma mwewo muliyelile.’
33 Molingana na vamene ivi, Yohani M’batizi ewela ndipo akulyalini chakulya olo kumwa vinyu, koma mwewo munena kuti: ‘Ali na chiŵanda.’
34 Mwana wa munthu wawela ndipo yove akulya na kumwa, koma mwewo munena kuti: ‘Onani! Munthu wokonda kulya na wokonda ngako vinyu, shamwali wa osonkhesha nsonkho na ochimwa!’
35 Mulimonse mwavingankhalile nzelu yusimikijilika kuti ni yolungama chifukwa cha vokonkhapo vake.”
36 Lomba Mfalisi muyakine eyumilila Yesu kuti akalye naye. Tetyo eluta ku ng’anda ya Mfalisi wamene uyo ndipo emupasa chakulya.
37 Koma mwanakazi muyakine wamene enze woziŵika mu tauni yamene iyo kuti ni wochimwa, echimvwa kuti Yesu akulya chakulya m’ng’anda ya Mfalisi wamene uyo. Tetyo eluta kwamene uko na botolo yopangiwa na mwala wa alabasitala, muli mafuta onunkhila.
38 Pechifwika egwada kumendo kwake noyamba kulila, mwakuti eyamba kunanisha mendo amene awo na misozi, uku opukuta mendo amene awo na sisi ya mmutu mwake. Komasoti epasa kisi mendo amene awo mwachikondi noŵazoleka mafuta onunkhila amene awo.
39 Mfalisi wala emuita pechiwona vamene ivi, mu ntima mwake enena kuti: “Munthu wamene uyu kuti ni mneneli chendi, sembe waziŵa kuti mwanakazi omukata wamene uyu niŵani, komasoti kuti ni wotyani. Sembe waziŵa kuti ni wochimwa.”
40 Koma Yesu emuyankha kuti: “Simoni, nufuna nikuuje kanthu kayakine.” Yove enena kuti: “Niujeni Mphunzisi!”
41 “Analume aŵili etola nkhongole kuli munthu muyakine wokongolesha ndalama. Mmozi etola nkhongole ya madinali 500, koma muyakine etola nkhongole ya madinali 50.
42 Pechikangiwa kuweja nkhongole zamene izo, wala munecho eŵakhululukila na ntima wonse. Kansi niŵani mwa aŵili amene aŵa angakonde ngako wokongolesha wamene uyo?”
43 Poyankha Simoni enena kuti: “Nuganiza kuti ni wamene uyo ekhululukiwa madinali anyinji.” Yesu emuuja kuti: “Wayankha luweme.”
44 Pechichita tetyo echeukila wala mwanakazi nouja Simoni kuti: “Wamuwona mwanakazi wamene uyu? Olo kuti naloŵa m’ng’anda mwako, uliye nipase manzi akuti nisambe mmendo mwangu. Koma mwanakazi wamene uyu wananisha mendo ŵangu na misozi yake noŵapukuta na sisi yake.
45 Wewo uliye nipase kisi, koma kufumila panaloŵa muno, mwanakazi wamene uyu aliyeleke kupasa kisi mendo ŵangu mwachikondi.
46 Wewo uliye tile mafuta mmutu mwangu, koma mwanakazi wamene uyu wazoleka mendo ŵangu mafuta onunkhila.
47 Pa chifukwa chamene ichi nukuuja kuti, machimo ŵake akhululukiwa, olo kuti ni anyinji. N’chifukwa chake owonesha chikondi chikulu. Koma wamene wakhululukiwa machimo atontho owoneshasoti chikondi chitontho.”
48 Pavuli pake euja mwanakazi wamene uyo kuti: “Machimo ŵako akhululukiwa.”
49 Ŵanthu onse ŵenze nawo pa thebo pamene apo eyamba kulikonsha mmitima mwawo kuti: “Kansi munthu wamene uyu niŵani wamene okwanishasoti olo kukhululukila machimo?”
50 Koma yove euja mwanakazi wamene uyo kuti: “Chikhulupililo chako chakupulumusha. Luta mu ntendele.”
Malizu a m'nyansi
^ Mu Chigiliki, “Kansi wamene uyo akuza.”
^ Mu Chigiliki, “muli onse amene evyalika kwa anakazi.”