Wilembewa na Luka 8:1-56
-
Anakazi enzeyenda pamozi na Yesu (1-3)
-
Fanizo ya wokomola mbewu (4-8)
-
Chifukwa chenzekatishila ntchito mafanizo Yesu (9, 10)
-
Efotokoza tanthauzo ya fanizo ya wokomola mbewu (11-15)
-
Munthu akayasha laiti oivwinikilalini (16-18)
-
Amayi ŵake a Yesu komasoti enekwake (19-21)
-
Yesu elesha mphepo ya mphamvu (22-25)
-
Yesu etumija viŵanda kuti vikaloŵe mu nkhumba (26-39)
-
Mwana mwanakazi wa Yailo; mwanakazi ekata chovwala cha Yesu (40-56)
8 Pakaliye pita nthawe itali, Yesu eyamba kuyenda mu tauni na tauni komasoti munzi na munzi nolalikila komasoti kulengeza uthenga uweme wa Ufumu wa Mulungu. Ndipo ŵala atumwi 12 enze naye pamozi.
2 Enzesoti na anakazi ayakine ŵechifumya mizimu iipa komasoti kuŵapojeka matenda ŵawo. Ayakine mwa ove enze Maliya wamene enzeitiwasoti kuti Mmagadala, wechifumya viŵanda 7.
3 Juwana mwanakazi wa Kuza wamene enze kapiteni wa Helode, Suzana na anakazi ayakine anyinji, amene enzetumikila Yesu na atumwi amene awo pokatishila ntchito chuma chawo.
4 Lomba gulu ikulu ya ŵanthu peiungana, pamozi na ayakine enzemukonkhelela kufumila mmatauni osiyana-siyana, Yesu efotokoza fanizo yakuti:
5 “Wokomola mbewu eluta kuti akakomole mbewu zake. Penzekomola, ziyakine ziponela mmbali mwa nsewu nokandiwa-kandiwa ndipo zilyewa na tunyoni twa mmululu.
6 Ziyakine ziponela pamwala koma pezimela ziyuma chifukwa penzeve mnyontho.
7 Mbewu ziyakine ziponela paminga ndipo minga yamene iyo yenzekulila pamozi na mbewu zamene izo ndipo ikangisha mbewu zamene izo kukula.
8 Koma ziyakine ziponela pa nthaka iweme ndipo pezikula zitwala vitwazi kuwelejela maulwendo 100.” Pechilaŵila vamene ivi, elaŵila moŵilikija kuti: “Wamene ali na matu akumvwa, amvwe.”
9 Koma ophunzila ŵake emukonsha tanthauzo ya fanizo yamene iyi.
10 Yove enena kuti: “Mwewo mwapasiwa mwayi wakuti mumvwishe visinsi vopatulika va Ufumu wa Mulungu. Koma kuli ayakine amene awo vonse ni mafanizo ŵeka-ŵeka. Vamene ivi vili teti kuti kulola akololesha chendi, koma kunkhale kuliye pindu, kumvwa nako akokumvwa chendi, koma osati akomvwisha vulaŵiliwa.
11 Lomba fanizo yamene iyi tanthauzo yake ni iyi: “Mbewu zamene izo ni mawu a Mulungu.
12 Ziponela mmbali mwa nsewu zamene izo, ni ŵanthu amene akumvwa mawu amene awo. Pavuli pake Mdyelekezi owela nakuzachosa mawu amene awo mmitima yawo kuti osati akhulupilile komasoti kupulumuka.
13 Ziponela pamwala ni ŵanthu amene ochita kuti akamvwa mawu amene awo oŵalondela mosangalala koma onkhala aliye miju. Okhulupilila kwa kanthawe katontho koma nthawe yoyesewa ikakwana oleka.
14 Ziponela paminga, ni ŵanthu amene amvwa mawu a Mulungu koma chifukwa cha nkhaŵa, chuma na vosangalasa va moyo uno, okanga kukula luweme ndipo vitwazi vawo vukosalini.
15 Koma ziponela pa nthaka iweme, ni ŵanthu amene pavuli pakumvwa mawu amene awo na ntima uweme ngako, oŵakatishisha notwala vitwazi mopilila.
16 Paliye wamene ochita akayasha laiti oivwinikila na chiya olo kuiika ku nyansi kwa bedi. Koma oiika pa choikapo laiti kuti amene oloŵa awone kungweleŵela.
17 Chifukwa paliye chofisika chamene chikuti chizaleke ululika. Ndipo vinthu vonse vosungiwa mwachisinsi ngako vizaziŵike, vizafisikelini mpaka kale-kale.
18 Tetyo mukomvwishila mwatchelu ngako. Chifukwa ŵala ali navo, azapasiwe vinyinji, koma ŵala aliye azalondewe olo vala vakuganiza kuti ali navo.”
19 Lomba amayi ŵake nenekwake ewela kwamene uko, koma chifukwa cha kupaka kwa ŵanthu, ekangiwa kufwika kwenze yove.
20 Koma ayakine emuuja kuti: “Amayi ŵanu nenekwanu apanama panja ofuna awonane namwe.”
21 Poyankha Yesu eŵauja kuti: “Amayi ŵangu nenekwangu ni aŵa amene omvwishila mawu a Mulungu noŵachita.”
22 Nsiku iyakine Yesu na ophunzila ŵake ekwela bote ndipo eŵauja kuti: “Tiyeni titaukile silya iyakine ya nyanja.” Tetyo ove eyamba kuchapa.
23 Koma ali nkati mwa ulwendo, Yesu eyona. Pavuli pake panyanja pamene apo peyamba kuniyata chimphepo cha mphamvu ndipo manzi eyamba kuzula m’bote yamene iyo mwakuti sembe embila.
24 Pavuli pake eluta kuyamuusha ndipo emuuja kuti: “Mulangizi, Mulangizi, titifwe!” Pechimvwa vamene ivi euka nozuzula mphepo na mafunde amphamvu amene awo, mwakuti vileka, ndipo panyanja pamene apo penkhala chelele.
25 Lomba eŵakonsha kuti: “Chikhulupililo chanu chili kuni?” Koma ove echimvwa wowa ndipo esiliwa nzelu, mwakuti eyamba kukonshana kuti: “Kansi munthu wamene uyu niŵani maka-maka? Ndaŵa onani, okwanisha kulamulila mphepo na manzi ndipo vumumvwila.”
26 Lomba epanamika yala bote mu dela ya Agelasa, silya iyakine, pafupi na Galileya.
27 Yesu pechiseluka nofwika ku ntunthu, ekumana na munthu muyakine enze na chiŵanda wofumila mu tauni yamene iyo. Kwa nthawe itali munthu wamene uyo enzenkhala wosavwala, komasoti enzenkhalalini m’ng’anda, koma kumanda.*
28 Munthu wamene uyo pechiwona Yesu, eŵilikija ngako noliponeshela pansi pamenso pake. Pavuli pake eŵilikija mwamphamvu kuti: “Kansi mufuna chinji kuli newo Yesu Mwana wa Mulungu Wakululu? Pulizi nukusengani, osanitamanisha.”
29 (Chifukwa Yesu enzeuja mzimu uipa wamene uyo kuti ufume mwa munthu wamene uyo. Mzimu wamene uyu wimuwela mwamphamvu maulwendo anyinji.* Moweleja-weleja enzemumanga na matcheni komasoti mugoli nomulolela. Koma chifukwa cha mphamvu ya chiŵanda chamene icho, enzetenda matcheni amene awo nothaŵila kumalo kuliye ŵanthu.)
30 Yesu emukonsha kuti: “Zina yako niwe ŵani?” Yove eyankha kuti: “Gulu,” chifukwa muli yove mwiloŵa viŵanda vinyinji.
31 Viŵanda vamene ivo venzemupapatila moweleja-weleja kuti osati avilamule kuti vilute kuchisengu.
32 Lomba gulu ikulu ya nkhumba yenzekulya palupili kumalo kwamene uko. Tetyo viŵanda vamene ivo vimupapatila kuti avilole kuyaloŵa mu nkhumba zamene izo ndipo yove evivomeja.
33 Pevichitika tetyo, viŵanda vamene ivo vefuma muli munthu wamene uyo nakuyaloŵa mu nkhumba zamene izo. Nkhumba zonse zamene izo ziutukila kumpolipoli nodjumphila mu nyanja ndipo zimbila.
34 Koma achiŵeta a nkhumba zamene izo pechiwona vamene ivo vichitika, eutuka nakuyalaŵila vamene ivi mu tauni na mminzi.
35 Pavuli pake ŵanthu eluta kuyawona vamene ivo vichitika. Ove pechifwika kuli Yesu efwana munthu wala wechifumya viŵanda alinkhale pansi pafupi na Yesu. Munthu wamene uyo enzevwale bwino komasoti maganizo ŵake enze bwino-bwino ndipo ove echita wowa.
36 Amene ewona vamene ivo vichitika eŵafotokozela mwechipojekelewa munthu enze na viŵanda wamene uyo.
37 Pavuli pake gulu yonse ifumila mminzi yapafupi ya Agelasa imusenga kuti afumeko kwamene uko kwawo, chifukwa ichita wowa ngako. Pevichitika tetyo, yove ekwela bote kuti alute.
38 Lomba munthu wala efumyiwa viŵanda emusenga moweleja-weleja kuti akoyenda naye koma Yesu euja munthu wamene uyo kuti alute kwawo. Yove enena kuti:
39 “Nkhoya ku ng’anda ndipo ukafotokoze vawakuchitila Mulungu.” Tetyo munthu wala eluta chendi ndipo enzefalisa mu tauni yonse yamene iyo vechimuchitila Yesu.
40 Yesu pechijokela ku Galileya, gulu ya ŵanthu imulondela na manja aŵili, chifukwa onse enzemuyembekezela.
41 Pavuli pake kwiwela munthu ndipo zina yake enze Yailo. Munthu wamene uyu enze nsogoleli wa malo opemphelela. Tetyo eliponesha pa mendo a Yesu noyamba kumupapatila kuti alute ku ng’anda kwake.
42 Yailo echita vamene ivi chifukwa mwana wake mwanakazi wamene enze na vyaka pafupi-fupi 12, mwana mmozi tyala wamene uyo wenze naye, enze esala patontho kumwalila.
Yesu penzekuya, ŵanthu anyinji emukonkhelela ndipo enzemupanikija.
43 Lomba penze mwanakazi muyakine wamene enzelwala matenda otaya milopa kwa vyaka 12, ndipo paliye aliyense ekwanisha kumupojeka.
44 Mwanakazi wamene uyu ekonkhelela Yesu kuvuli nokata usalu wopyata wa mmbali mwa malaya ŵake akunja. Nthawe yamene iyoletu milopa yake ileka kufuma.
45 Lomba Yesu ekonsha kuti: “Niŵani wanikata?” Onse pechikana, Petulo enena kuti: “Mulangizi, muwonalini kuti ŵanthu onse amene aŵa ali kuzengulukeni ndipo okupanikijani?”
46 Koma Yesu enena kuti: “Shuwa alipo wanikata, chifukwa namvwa mphamvu yufuma muli newo.”
47 Mwanakazi wamene uyo pechiwona kuti vamene ivo vawachita vaziŵika, eluta kuli Yesu onjenjemela ndipo egwada noulula pamenso pa ŵanthu onse chemuchitisha kuti amukate, komasoti mwechipolela nthawe yamene iyo.
48 Koma yove euja mwanakazi wamene uyo kuti: “Mwanawe chikhulupililo chako chakupojeka. Luta mu ntendele.”
49 Ali nkati molaŵila, pefwika nthumi ya nsogoleli wa malo opemphelela wala, ndipo emuuja kuti: “Wala mwana wanu wamwalila. Musiyeni Mphunzisi wamene uyu osamuvutisha.”
50 Yesu pechimvwa vamene ivi emuuja kuti: “Osayopa, nkhala tyala na chikhulupililo, ndipo mwana wako wamene uyo ankhalesoti na moyo.”*
51 Pechifwika ku ng’anda kwamene uko aliyelole kuti aliyense aloŵe naye pamozi m’ng’anda kupatulapo Petulo, Yohani na Yakobo komasoti atata ŵake na amayi ŵake a msimbi wamene uyo.
52 Koma ŵanthu onse enzelila komasoti kuliniyata pa nganga chifukwa cha chisoni. Tetyo Yesu eŵauja kuti: “Pujani, chifukwa mwana wamene uyu aliye mwalile, koma aliyone.”
53 Pechilaŵila vamene ivi, ŵanthu amene awo eyamba kumuseka monyoza, chifukwa enzeziŵa kuti mwana wamene uyo wamwalila.
54 Koma yove emukata kwanja nomuita kuti: “Wewo msimbi, uka!”
55 Pevichitika tetyo, mzimu* wake wijokela ndipo nthawe yamene iyoletu euka. Tetyo Yesu eŵauja kuti amupase chakulya msimbi wamene uyo.
56 Pamene apo, makolo ŵake amene awo ekondwela ngako, koma Yesu eŵachenjeja kuti osati auje aliyense vamene ivo vachitika.
Malizu a m'nyansi
^ Olo kuti, “kumanda achikumbukilo.”
^ Mabaibolo ayakine onena kuti, “wimuwela kwa nthawe itali.”
^ Mu chigiliki, “apulumushiwe.”
^ Olo kuti, “mphamvu ya moyo.”
