Wilembewa na Luka 9:1-62
-
Atumwi 12 epasiwa malangizo okhuza ulaliki (1-6)
-
Helode esiliwa nzelu na venzechita Yesu (7-9)
-
Yesu elyesha ŵanthu 5.000 (10-17)
-
Petulo eziŵa kuti Yesu ni Khilisitu (18-20)
-
Yesu elaŵililatu za imfwa yake (21, 22)
-
Wophunzila ngaye-ngaye wa Yesu (23-27)
-
Yesu echinja kawonekedwe kake (28-36)
-
Mulumbwana wamene enze na chiŵanda epojekewa (37-43a)
-
Yesu elaŵililatu za imfwa yake kachiŵili (43b-45)
-
Ophunzila ekangana kuti nkulu ni ŵani (46-48)
-
Wala asashushana nase ali kumbali yasu (49, 50)
-
Munzi wa Asamaliya wikana Yesu (51-56)
-
Vangachite munthu kuti ankhale wophunzila wa Yesu (57-62)
9 Pavuli pake Yesu eunganija atumwi 12 ŵala noŵapasa mphamvu na ulamulilo pa viŵanda vonse, komasoti kuti akokwanisha kupojeka matenda.
2 Lomba eŵatumija kuti akolalikila za Ufumu wa Mulungu komasoti kupojeka ŵanthu.
3 Yove eŵauja kuti: “Osatakula kanthu pa ulwendo wamene uyu, olo ndodo, kachola ka vakulya, nkate, ndalama olo malaya aŵili.*
4 Mukafwika pa ng’anda iliyonse, mukonkhala mu ng’anda yamene iyo mpaka nthawe yofuma kwamene uko izakwane.
5 Kulikonse kwati akaleke kukulondelani munthu, pofuma mu tauni yamene iyo mukokunkhumula lukungu kumendo kwanu kuti unkhale umboni woŵashusha.”
6 Pamene apo enyamuka noloŵa mu dela yamene iyo munzi na munzi noyamba kulengeza uthenga uweme komasoti kupojeka ŵanthu kulikonse.
7 Lomba Helode,* wotonga chigawo,* echimvwa vinthu vonse venzechitika. Yove esiliwa nzelu chifukwa ayakine enzenena kuti Yohani waushiwa.
8 Koma ayakine enzenena kuti Eliya wawonekela. Ayakinesoti enzenena kuti mmozi wa aneneli akale wauka.
9 Lomba Helode enena kuti: “Yohani nimutenda mutu. Lomba ochita ivi vanikumvwa niŵani?” Tetyo enzefunishisha kuti amuwone.
10 Ŵala atumwi pechichokako efotokozela Yesu vechichita. Pechichita tetyo eŵatola noluta nawo kwaŵeka mu tauni yuitiwa kuti Besaida.
11 Koma gulu ya ŵanthu yeziŵa vamene ivi mwakuti imukonkhelela. Yesu eŵalondela luweme noyamba kuŵauja za Ufumu wa Mulungu, ndipo epojeka ŵala enzefunika kupojekewa.
12 Lomba nthawe yenze chakunchingulo. Tetyo atumwi 12 ŵala ewela kuli yove nonena kuti: “Kuno kuliye ŵanthu ndipo nthawe yasila, aujeni aŵa ŵanthu kuti anyamuke alute mminzi na mmadela apafupi kuti akafwane malo oyona komasoti chakulya chakuti alye.”
13 Koma yove eŵayankha kuti: “Mwewo muŵapase chakulya.” Ove enena kuti: “Tiliye chilichonse kupatulapo mitanda 5 ya nkate na nsomba ziŵili zeka mphela. Payakine tilute tikagule chakulya chokwanila ŵanthu onse amene aŵa.”
14 Penze analume pafupi-fupi 5.000 ndipo Yesu euja ophunzila ŵake kuti: “Aujeni ŵanthu amene aŵa kuti aungane mmagulu a ŵanthu 50.”
15 Ophunzila amene awo echita chendi vamene ivo, mwakuti ŵanthu onse amene awo enkhala pansi.
16 Tetyo etola mitanda ya nkate 5 na nsomba ziŵili zala nololesha kululu ndipo epeleka pemphelo ya chakulya chamene icho. Pechichita tetyo esuna-suna mitanda ya nkate yamene iyo noipeleka kuli ophunzila ŵake kuti ayaŵile ŵanthu amene awo.
17 Tetyo onse echilya nokuta, notola-tola visala ndipo vizula vitundu 12.
18 Pavuli pake yove penzepemphela payeka, ophunzila ŵake ewela kuli yove. Lomba yove eŵakonsha kuti: “Kansi ŵanthu onena kuti newo nine ŵani?”
19 Ove emuyankha kuti: “Onena kuti nimwe Yohani M’batizi, ayakine onena kuti nimwe Eliya, koma ayakine onena kuti nimwe mmozi wa aneneli akale.”
20 Pamene apo eŵakonsha kuti: “Lomba mwewo munena kuti nine ŵani?” Petulo eyankha kuti: “Nimwe Khilisitu wa Mulungu.”
21 Lomba eŵalangiza mwamphamvu kuti osati auje aliyense vamene ivi.
22 Pavuli pake enena kuti: “Mwana wa munthu afunikile kukumana na mavuto anyinji komasoti kukaniwa na akulu, ansembe akulu-akulu na alembi. Ndipo azapaiwe noushiwa pakazapita masiku atatu.”
23 Pavuli pake euja onse kuti: “Keno munthu ofuna kunikonkhelela, alikane yeka ndipo atakule chimuti chake chotamanilapo* nopitilija kunikonkhelela nsiku iliyonse.
24 Chifukwa aliyense ofuna kupulumusha moyo wake azautaye, koma aliyense wamene wataya moyo wake chifukwa cha newo azaufwane.
25 Kansi munthu angapindule chinji keno angafwane vinthu vonse va ichi chalo koma notaya moyo wake olo kuliwononga?
26 Chifukwa aliyense ochita nsoni nanewo komasoti mawu ŵangu, Mwana wa munthu azachite nayesoti nsoni akazawela mu ulemelelo wake, wa Atata ŵake na wa angelo atuŵa.
27 Koma shuwa nukuujani, pali ayakine pali aŵa apanama pano amene azalaulelini imfwa olo patontho mpaka poyamba azawone Ufumu wa Mulungu.”
28 Papita masiku pafupi-fupi 8 pavuli pakuti walaŵila mawu amene aŵa, yove etola Petulo, Yohani na Yakobo nokwela nawo lupili kuyapemphela.
29 Penzepemphela, mawonekedwe a chinso chake echinja ndipo chovwala chake chiwoneka chituŵa ngako na chong’anima.
30 Lomba pewoneka ŵanthu aŵili enzekambilana naye, ŵanthu amene aŵa enze Mose na Eliya.
31 Ove ewonekela na ulemelelo ndipo eyamba kukambilana vokhuza mwati azafumile Yesu muli ichi chalo, ku Yelusalemu.
32 Apa lomba n’kuti Petulo na ayake ŵenze nawo aŵeŵelatu na tulo. Koma tulo petwisila, ewona ulemelelo wake komasoti analume aŵili alipaname naye.
33 Lomba analume amene aŵa penzetaikana naye, Petulo euja Yesu kuti: “Mulangizi, vingankhale luweme kuti sewo tikonkhala pano. Tetyo timange matenti atatu pano, imozi yanu, imozi ya Mose na iyakine ya Eliya.” Koma yove enzeziŵalini venzenena.
34 Penzelaŵila vamene ivi, kwechita nkumbi ndipo weyamba kuŵaziŵilija. Nkumbi wamene uyo pewiŵaziŵilija, echita wowa.
35 Lomba pemvwika mawu kufumila mu nkumbi wamene uyo akuti: “Uyu ni Mwana wangu wenisankha, mukomumvwila.”
36 Penzemvwika mawu amene awo, ove ewona kuti Yesu aliyeka. Koma enkhala chelele ndipo aliyeuje aliyense mmasiku amene awo chilichonse pa vinthu vamene ivo vechiwona.
37 Nsiku yokonkhapo pechiseluka mulupili mwamene umo, chigulu cha ŵanthu chichizamuchinguja.
38 Munthu muyakine wamene enze mugulu yamene iyo eŵilikija kuti: “Mphunzisi, nukusengani kuti mukawone mwana wangu mwanalume, chifukwa ni yumo tyala wamene uyo.
39 Mzimu ukamuwela, mwazizizi oŵilikija, pavuli pake umuchitisha kuti apalapate nochita povu. Mzimu wamene uyu umuwononga ngako ndipo vunkhala vovuta kuti umuleke.
40 Nenze nasenga ophunzila ŵanu kuti aufumye koma akangiwa.”
41 Yesu eyankha kuti: “Mwewo m’badwo uliye chikhulupililo na wosokonezeka maganizo, kansi ninkhale namwe mphela mpaka nthawe yanji? Nipitilije kukupililani mpaka nthawe yanji? Wela naye kuno mwana wako wamene uyo.”
42 Koma olo penzeluta naye kuli yove, chiŵanda chamene icho chimuponeshela pansi nomuchitisha kuti apalapate ngako. Yesu ekalipila mzimu uipa wamene uyo nopojeka mulumbwana wamene uyo ndipo emupeleka kuli atata ŵake.
43 Ŵanthu onse edabwa na mphamvu zodabwisa za Mulungu.
Ŵanthu amene awo akalidabwa na vonse venzechita yove, Yesu euja ophunzila ŵake kuti:
44 “Tetekelani mosamala ndipo mukokumbukila aŵa mawu, chifukwa Mwana wa munthu azapelekewe mmanja mwa ŵanthu.”
45 Koma ophunzila amene awo aliyemvwishe vechiŵauja vamene ivo. Tanthauzo yake yenze yofisika kuli ove kuti osati aziŵe ndipo enzeyopa kumukonsha za mawu amene aŵa.
46 Pavuli pake ove eyamba kukangana vokhuza wamene enze nkulu pakati pawo.
47 Yesu pechiziŵa venzeganiza mmitima mwawo, etola mwana ntontho nomupanamika pa mbali pake.
48 Lomba eŵauja kuti: “Aliyense wamene walondela mwana ntontho monga ni uyu mu zina yangu walondelasoti newo. Ndipo aliyense walondela newo walondelasoti wala enituma. Chifukwa aliyense wamene ochita vinthu monga ni mwana ntontho pakati panu, wamene uyo niye nkulu.”
49 Pamene apo Yohani enena kuti: “Mulangizi, sewo tawona munthu muyakine ofumya viŵanda mu zina yanu lomba tamulesha, chifukwa oyendalini na sewo.”
50 Koma Yesu emuuja kuti: “Osamulesha chifukwa munthu wamene oshushana namwelini ali ku mbali yanu.”
51 Masiku akuti atolewe kuluta kululu penzevwendela,* yove esimikija ntima kuluta ku Yelusalemu.
52 Tetyo etuma ŵanthu kuti atangule, ŵanthu amene awo echiyaloŵa mmunzi wa Asamaliya kuti akakonzekele kuwela kwake.
53 Koma ŵanthu a mmunzi wamene uyo aliyemulondele luweme chifukwa yove enze esimikija mu ntima mwake kuti alute ku Yelusalemu.
54 Ophunzila ŵake Yakobo na Yohani pechiwona vamene ivi enena kuti: “Ambuye, kansi mufuna kuti tiŵaitile mulilo kufumila kululu kuti uŵanyeshe?”
55 Koma yove echunguluka noŵazuzula.
56 Tetyo Yesu na ophunzila ŵake eluta ku munzi uyakine.
57 Lomba ali pa ulwendo wamene uyo, munthu muyakine euja Yesu kuti: “Nikukonkheleleni kulikonse kwamungalute.”
58 Koma Yesu emuuja kuti: “Ankhandwe ali na misima ndipo tunyoni twa mmululu tuli na vivumbo, koma Mwana wa munthu aliyeletu olo pakuti angasamilishe mutu wake.”
59 Pavuli pake euja munthu muyakine kuti: “Unkhale wophunzila wangu.” Koma munthu wamene uyo enena kuti: “Ambuye, niloleni niyambe naluta kuyaika malilo ŵa atata.”
60 Yesu emuuja kuti: “Aleke akufwa aike akufwa ŵawo, koma wewo nkhoya ukalengeze vokhuza Ufumu wa Mulungu kulikonse.”
61 Muyakinesoti enena kuti: “Newo nikukonkheleleni Ambuye, koma munilole kuti nikayambe nalailana na ŵanthu a m’banja mwangu.”
62 Yesu emuuja kuti: “Aliyense okata gedjo nololeshesha vinthu vakuvuli oyenelelalini Ufumu wa Mulungu.”
Malizu a m'nyansi
^ Olo kuti, “chovwala choyangijila.”
^ Wamene uyu ni Helode Antipa. Onani matanthauzo a mawu ayakine.
^ Mu Chigiliki, “gavana wa chigawo cha 4 cha dela.”
^ Onani matanthauzo a mawu ayakine.
^ Mu Chigiliki, “pechikwana.”
